ریڈیو زْرمبش بلوچی | ریڈیو زْرمبش بلوچی,رجانک

مزھب ءُ سائنس

مزھب ءُ سائنس

AUG

26
26 / 08 / 2020 نبشتانک 123

مزھب ءُ سائنس

(اولی بھر)


 


نبشتکار: البرٹ آئن سٹائن
اردو: ھالد سھیل
بلوچی: ھنیپ بلوچ


البرٹ آئن سٹائن{Albert Einstein} ءِ کتاب Ideals and opinions ءِ لہتیں گچین دانک۔
(1)
وھدے ما بنی آدم ءِ راجدپتر ءَ دینی ءُ ارواھی
جُنز ءِ بُنرود ءَ سرپد بوگ ءِ جُھد ءَ کن ایں تاں دُرساں پیش اے جُست ودیگ بیت کہ بنی آدم ءِ آ کجام لوٹ ءُ جزبات بوتگ اَنت کہ پہ آھانی آسودگی ءَ بنی آدم ءَ دین ودی کُت۔وھدےکہ ما انسانانی بنرود ءِ بنداتی وھد ءَ وتی دیم ءَ ایر کنیں تاں ما آ دور ءِ مردماں بیم ءِ آماچے ءَ گندیں۔آ گُژن ءُ تُرس بہ بیت یا جنگلی سھدارانی تُرس،آ نادراھے ءِ تُرس بہ بیت یا مرگ ئے۔آھاں سرجمیں زند ءَ گوں تُرس ءَ دیم پہ دیم بوتگ اَنت۔آ وھد ءَ مردمانی سَسْا ءَ انچو بودشت نہ بوتگ کہ آ زندگی ءِ جیڑھاں گوں اگل ءِ چکاسگ ءَ بہ ماریت ءُ وتی نگیگیاں گیش ءُ گیوار کُت بہ کنت۔پمشکہ آھانی سَسّا آں انچیں ھیالی ھستی رودینتگ کہ چہ ایشانی نہ وشی ءَ جیڑہ ودی بوتگ اَنت ءُ پہ آ ھستیانی وش کنگ ءَ ھمک وڑیں دیمونی اِش داتگ۔آ وھد ءِ لیکہ ءُ لوٹ پدریچی ربیدگ ءِ بھر بوتگ اَنت ءُ دینی چھرگ اِش زُوران کُتگ۔مُردنئی ایں ما گْوشت کن ایں کہ آ وھد ءِ مزھب تُرس ءِ ودی کُتگیں بوتگ۔
مردمی بنرود ءِ آ دور ءَ کم کم ءَ دینی راھشونانی یک انچیں ٹولی یے ودی بوتگ کہ آھاں مردم دلمجی داتگ اَنت کہ آ آیانی ءُ ھما گُمانی ھستیانی میان ءَ ھما آں کہ آ بیم ءِ آماچ اَنت،یک وسیلھے ءِ کار ءَ کن اَنت۔آ وھداں بازیں سیاسی راھشون ءُ واکدار ھم گوں ھمے مزھبی راھشوناں ھوار بوتگ اَنت،چے ءَ کہ آیانی سیت یک بوتگ اَنت۔
تُرس ءِ ودی کُرتگگیں مزھب ءِ ھواری ءَ مردمانی دگہ یک لوٹے ءَ ھم مزھب دیمروی دات ءُ آ مردمانی مزنیں ارزشت،مھر ءُ براتی راھبندی ءِ پٹ ءُ لوٹ اَت۔اےلوٹ ءَ ھُدائےچاگردی ءُ کردانکی گُمان ودی کُرت۔آ انچیں ھُدائے اَت کہ مردماں پھریزگ ءَ اَت۔آئی پہ نیکیں کارانی سر ءَ بکشیش ءُ ردیں کارانی سر ءَ سزا دات اَنت۔انچیں ھُداے کہ نگیگیں وھداں آیانی کارےشرکُت اَنت ءُ آیان ءَ گھتریں زندگی ءِ گْوازینگ ءِ تْرام دات۔
آزمانی کتاب مار ءَ تُرس ءِ مزھب ءِ پرارزشت ءُ کردانکی مزھب ءِ بنرود ءِ کسھاں گْوش ایت۔جوانیں مردمانی مزھب تُرس ءَ ابید پُرارزشتیں مزھبے ءُ اے بنرود مردمی بُنرود ءِ راھشونی اِنت۔مرچی ھم جھان ءِ گیشتریں مزھباں دوئیں بھرگ ھست اَنت،بلئے یک چاگردے کہ چنچو جوان ءُ بنرود زوریت،چہ ایشاں پُر ارزشتیں مزھب ءِ کچ ھمنچک مزن بیت۔
مردمی گْوستانک ءَ ھدا ءُ مزھب ءِ دو گُماناں ھوار دگہ یک سیمی گمانے ءَ ھم ردوم زُرتگ،چہ ایشی ءَ دور بس لھتیں درچتگیں مردم آشنا بوتگ اَنت ءُ آ گمان مزھب ءُ ھدا ءِ یک گیھانی گُمانے۔اے گُمان ءِ بیان کنگ ءُ آ مردمانی سرپد کنگ،ھمایاں کہ ایشے ءَ ھیلکار مہ بنت آیانی سرپد کنگ مزنیں کارے۔مزھب ءِ اے ھیلکاری ءَ مردم جند ءُ گیھان ءَ یک نوکیں سیادی ءَ گوں بندوک بیت۔بُدّا ءُ آدگہ پیگمبراں وتی وانگیاں اے ھیلکاری ءِ درگت ءَ گپ کُتگ۔ مردمی گْوستانک ءِ ھما سوھو ءُ زانتکاریں ھستی کہ چہ اے ھیلکاری ءَ گْوستگ اَنت آ چہ ھُدا ءِ آ گُماناں دیم ءَ شُتگ کہ مردماں گوں وتی کسانیں سسا ءَ تراشتگ اَنت۔چوشیں مردم چوش کہ مزھب،ھدا ءُ آزمانی کتابانی دوداں نہ منّ ایت۔پمشکہ باز مردم ایشاں بےدین ءُ باز سوپی۔
اے جُست ودی بیت اگاں مزھب ءِ اے گیھانی گُمان ءُ ھیلکاری ربیدگی مزھب،ھدا ءُ آزمانی کتاباں مان میاریت گڑا ھمک مردم تاں ایشاں چوں سربوت کنت۔منی ھیال ءَ اے گُمان ءُ ھیلکاری تاں دومی مردماں سرکنگ ءِ کار سائنس ءُ ازم ءِ زمہ واری اِنت۔اے دوئیں چیز مردمانی دلاں ھما آس ءَ روک کنت کہ مزھب ءِ اے گیھانی ھیلکاری ءِ ڈیوا ءِ روک کنگ ءَ ھژدری اِنت۔
اگاں ما در ربیدگی ھساب ءَ پگر بہ کنیں گڑا مئےمزھب ءُ سائنس ءِ نوکیں سیادی ءَ دزرسی بیت۔ربیدگی پگر ءِ رد ءَ مزھب ءُ سائنس یکے دومی ءِ بگیری ءَ گندگ بنت۔ربیدگی پگرداروک وھدے کہ گیھان ءِ ترام ءَ ابرمی کانود ءِ پابند سرپد بنت گڑا پہ آھاں چوشیں ھدائِے ءِ منّنگ مُشکل بیت کہ کہ اے کانود ءِ تہ ءَ دزمانجنی بہ کنت ءُ کجام وھد ءَ بہ لوٹیت آئی ءَ بدل کنت۔آھانی گُمان ءَ چوشیں ھُداکہ بکشیش ءُ سزا دنت بےمانا اِنت،چے ءَ کہ آ سرپد بنت کہ مردمی کِرد آھانی تھی ءُ ڈنی لوٹانی چپ اِنت۔آھانی چماں مردم چہ وتی کرداں گیھان ءِ آدگہ سھدارانی وڑ ءَ کہ چہ ایشاں درچک ءُ دار دابھ ھم ھوار اَنت،ھُدا ءِ چماں زمہ وار نہ اَنت۔
سائنس ءِ سر ءَ اے بھتام جنگ بوتگ کہ آ کردانکی بنیاداں نزور کنت۔منی ھیال ءَ اے نہ منّنگ ناتوان اِنت۔مردم ءِ کردانکی زندگی ءَ ھمدردی،وانگ ءِ زانگ،چاگردی لوٹانی پابند بوگے اِنت۔اگاں مردم ءِ کردانکی زندگی مرگ ءَ پد جزا ءُ سزا ءِ سر ءَ بندوک بہ بیت گڑا من ءَ اے ھم جوانیں بنیادے گند ءَ نئیت۔
اے راستیانی بنیاد ءَ اے سرپد بوگ ارزان اِنت کہ مردمی گْوستانک ءَ مزھب ءُ سائنس چے ءَ یکے دومی ءِ بگیردار بوتگ اَنت۔منی ھیال ءَ پہ مزھب ءَ گیھان ءِ گُمان سائنس ءِ پٹ ءُ پول ءَ دیمروی ءِ یک جوانیں سوبمندی یے بوت کنت۔اگاں سائنسدانانی ھستی ءَ اے گیھانی ایمان مہ بیت،گڑا آ وتی پٹ ءُ پول ءَ انچو سوبمند نہ بنت۔نیوٹن ءُ کیلیر ءَ جھانی زندگی گیشتر پہ مالی ءُ چاگردی آسراتیاں دیمونی داتگ ءُ وتی پٹ ءُ پول ءِ سر ءَ دلگوش گْور کُتگ۔پہ سائنسداناں اے ایمان ءِ آرگ ءَ ابید سائنس ءِ ساچشی ءُ پولکاری سپر برجاہ دارگ نہ بیتگ آمردم چوشیں سائنسی پولکاریاں ھوار نہ اَنت۔پہ ایشاں بوت کنت بازیں بےسوبیاں ابید ھم سپر ءِ برجاہ دارگ ءِ کار ءِ سرپد بوگ نگیگ بہ بیت۔منی ھیال ءَ مزھب ءِ آ گیھانی گُمان پہ آ سائنسداناں دلبڈی یے،ھمت ءُ توانمندی بکشیت ھماکہ اے دُرسیں چکاساں سوبمند کنت۔پمشکہ منی ھیال ءَ اے جسدی ءِ دور ءَ سائنس ءِ سنگینیں کار ءَ بس ارواھی مردم جوانی ءَ کُرت کن اَنت۔
---  
آئن اسٹائن ءِ نبشتانک: Religion and seince ءِ لھتیں گچینی دانکانی رجانک کہ New yark times Magazinine ءَ شنگ بوتگ۔