ریڈیو زْرمبش بلوچی | ریڈیو زْرمبش بلوچی,دروشم-بلوچ

نوں جنزگی اِنت | دْروشم بلوچ

نوں جنزگی اِنت | دْروشم بلوچ

SEP

18
18 / 09 / 2020 نبشتانک 166

نہ زان آں چنچو گم تیاب ءَ وتی تہ ءَ جاگہ داتگ۔برےبرے انچوش سچ ءُ مچ بیت کہ نوں اے دمان ءُ آدمان ءَ ساہ دنت۔برےبرے انچوش جاہ سر ایت کہ گْوش ئے گوں وت ھور سرجمیں جھان ءَ زیراپ کنت۔زر ءِ اے جاوراں گند آں گڑا من ءَ انچوش گمان بیت کہ ما دوئیں یکیں جاورانی دیمپان ایں۔


انیگیں جاوراں مردم چنچو ناگیگ کرتگ۔دم ھم کشگ نہ بیت۔ادار گْوش ئے سال اَنت ءُ سال دھک اَنت۔مردم زندگی ءَ دمتوس کرتگ۔ھمک نیمگ ءَ کہ چماں شانک دئے داں ھچ نیست ایوک اندوھانی گرانیں بار اَنت کہ مردمانی سر ءَ چوش کوہ ءَ کپتگ اَنت۔بہ گندئےجھان ءِ آدگہ مردم وشھال بہ بہ اَنت بلے چیردستیں بلوچ داں من ھوش کرتگ ھزار رنگیں ھپمانیں درد ءُ تورشتانی دیمپان اِنت۔ھمک گس پرسیگ ءُ ھرچ چم ارسیگ اِنت۔نہ زان آں اے گرانیں روچ داں کد بلوچ ءِ چک ءُ گردن ءَ سوار اِنت؟


ننگ ءُ منگہ داریں بلوچ نوں ایردستی ءَ انچوش کور ءُ کر کرتگ کہ دژمن ءِ داشتگیں دلار پہ چار ٹکا،توپک ءُ گاڑی یے ءَ وتی جند ءِ بلوچ براتانی کُشگ ءُ چاریگری ءَ ھم چک ءُ پد نہ بیت۔بلوچ چاگرد ءَ وھدے کہ دو مردم وت ماں وت جنگ بوتگ اَنت ءُ اگاں آیانی میان ءَ جنینے اتکگ گڑا دوئیں مردماں سیل کرتگ جنین ءَ انچیں منگھے بوتگ بلے نوں چوشیں ھچ چیز پشت نہ کپتگ۔نوں و دلار جنیناں آوار جن اَنت ءُ دژمنیں پاکستانی لشکر ءِ دست ءَ دئے اَنت ءُ اے گپ ءَ پہ وت ءَ بلائیں نام ءُ مڑایے سرپد بہ اَنت۔نہ زان آں بلے اے باریگ ءَ وت ءَ دگہ چیزے سال ءَ برجاہ بہ دار ایت گڑا داستان دگہ وڑ بہ اَنت۔


انگت وھد باز بلوچ ءِ دست ءَ اِنت۔بایدیں راج سار بہ کنت ءُ دژمن ءِ بگیری ءَ یک مشت ءَ پاد بئیت ءُ چہ گیشاں گیش وتی راجی سرمچاراں چمانی سر ءَ بہ در ایت ءُ آھانی ھرچ وڑ ءَ کمک ءَ بہ کنت۔ترس نوں پاد ءِ چیر ءَ لپاشگی اِنت۔اگاں ما کمو بہ جیڑ ایں گڑا ترس ءِ جند چی یے؟
مردم ءَ پرچا ترس ایت؟
چہ چی ءَ ترس ایت؟


منی دل ءَ ما بلوچاں ھمک وڑیں ترس ءِ آپ نوں گْواز کرتگ۔ھما مردم بہ ترس ایت کہ چہ اے جاوراں نہ گْوستگ ما چہ ھرچ وڑیں جاوراں گْوازان ءُ پیداک اِنت،نوں و جاورانی جند ءَ گوں ما دم برتگ مئے ترس انگت برجاہ اِنت؟


اگاں نوں ما سار نہ کرت گڑا آؤکیں سال ءُ ماہ گیشتر دردناک بہ اَنت۔اگاں لھتیں چم کٹیں مردیناں وتی ایمان کر کرتگ گڑا جنین در بہ کپ اَنت کہ چد ءُ دیم دگہ ھچ راہ ءُ در پشت نہ کپتگ۔نوں ھرچ وڑ ءَ جنزگی اِنت۔پہ برْمش ءُ ملکناز،پہ کلسوم ءُ آئی ءِ چورھیں زھگاں،پہ جھدکار ءُ شھیدیں بچاں،پہ ھیات ءُ آدگہ نودربراں،پہ شاھینہ شاھین ءُ آدگہ جنیناں کہ تئ چاگرد ءَ یک رُژنائیں بانداتے دات کن اَنت۔بہ جنز اِت داں سرڈگار ءِ آجوئی ءَ کہ نوں جنزگی اِنت۔