????روتاک زرمبش بلوچی????
????دو شمبے » 27 #جولائی2020 | #زرمبش_ھال
????سرھال????
▪بی آر اے ءَ شھید کماندار کزاپی آئی ءِ کرد ءُ کارانی ساڑا ءَ گلزمین ءِ کوھسار ءِ نام داتگ
▪پہ سند ءُ بلوچستان ءِ آجوئی ءَ براس ءُ سندی سرمچارانی وت ماں وتی ھم سنتی ءِ جار
▪راشد ھسین ءِ درکنائینگ ءَ جرمنی، نیدر لینڈ ءُ زرباری کوریا ءَ زھرشانی ءُ آگاھی مھم برجم کنگ بیت
▪شال:بلوچستان زانشجاہ بدنامی کیس ءَ دو کارمند چہ کار ءَ کشگ ءُ کمک مستر ءِ بگیری ءَ آمیدگسی پٹ ءُ پول ءِ لوٹ کنگ بیتگ
▪ڈیرہ بگٹی: ٹریکٹر ءِ ٹالی چیرکرتگیں شوروانی سر ءَ گْوستگ|ڈرائیور ءَ ھوار چار مزدور زدگ
▪شال:مستونگ دگ ءِ سر ءَ تلاوگ ءَ جان ءِ شودگ ءَ زھگے بڈ اتگ ءُ بیران بیتگ
▪کوروناوائرس ءِ دگہ28 نوکیں نادْراہ | بیران بیتگیں مردمانی کچ 136 ءَ سربیتگ
▪چھبار: امام الی نادْراھجاہ ءِ سوبمندی | چہ ننک ءِ مژگ ءَ سیچن ءِ در کنگ ءَ سوبین
▪پھرہ ءِ زرباری نیمگ ءَ 3.2 ریکٹر ءِ زمین چنڈ| تاوان ءِ ھال نیست
???? #پاکستان | سرھال
????پی ٹی آئی سرکار ءَ گوستگیں سال ءَ 13 ارب ءُ 20 کروڑ ڈالر چہ ڈنی ڈیھاں وام زرتگ ۔
پاکستان ءِ ھزانگ ءِ وزارت ءِ رد ءَ پی ٹی آئی سرکار ءَ چہ گوستگیں سرکاراں گیش تر وام زرتگ کہ پاکستان ءِ گْوستانک ءَ اے وڑیں درور نیست ۔
????پاکستان ءَ چہ کورونا وائرس ءَ دگہ 4 مردم بیران بیتگ ۔ بیران بیتگیں مردمانی کچ 5822 ءُ نادراھانی کچ 273104 ءَ سر بیتگ ۔
????لاھور ءُ اوکاڑہ ءَ جتا جتائیں دگانی وئیل ءَ 9 مردم بیران بیتگ۔
????پاکستان پیپلز پارٹی ءِ سروک بلاول بھٹو زرداری ءَ پاکستان ءِ پارلیمان ءِ تہ ءَ تران کنان ءَ گْوشتگ لشکری گل 2018 ءِ ووٹ ءَ ھمینچک بدنام بیتگ اَنت کہ بھ چوش بدنام نہ بیتگ اَنت۔
????سرھال | #ایران ????????
????ایرانی مھتر ھسن روھانی ءَ ڈیھ ءَ گْرانی ءُ سلپ ءِ برز روگ ءِ سر ءَ بے تاھیری درشان کنان ءَ گْوشتگ: سرکاری تْرامگیج گرانی ءِ دیم ءِ دارگ ءَ مادنیں گامگیج بہ زیر اَنت۔
???? ایرانی سال 1399 ءِ پی ایچ ڈی چکاس پنچ شمبے 9 مرداد ءَ بہ اَنت ءُ بھر زیروک دو شمبے ءِ روچ 6 مرداد ءَ چہ تندجاہ ءَ وتی چکاس تاکاں گپت کن اَنت۔
???? ایران ءِ راہ ءِ وزیر ءَ گْوشتگ: ماں تھران ءَ یک گچینی سرکاری بینکے ھزار ھورکیں گسانی واھند اِنت۔
???? شمبے ءَ گر داں یک شمبے ءِ نیم روچ ءَ ایران ءَ چہ کورونا ءَ 216 مردم مرتگ۔ 2 ھزار ءُ 333 نوکیں نادْراہ پجارگ بیتگ ءُ چہ آیاں یک ھزار ءُ 282 ماں نادْراھجاھاں نپادی کنگ بیتگ۔داں انیگ ءَ ایران ءَ 23 لک ءُ 27 ھزار ءُ 850 مردم کورونا ءِ نادْراھی ءَ گپتگ۔
???? استان کرمان ءِ شھر ماھان ءَ زرتشتی موبدے ءِ پجیگ ءَ دگہ دو کس کشگ بیتگ۔پولیس بن شون ءِ رد ءَ اے کوش ءِ پشت ءَ مالی جیڑہ بوت کنت چہ کشگ بیتگیں مردمے ءِ گاڑی ءَ 10 ھزار امریکی ڈالر دست کپتگ۔
???? #اوگانستان ???????? | سرھال
????ھندوستان ءَ 11 اوگانی سک شھریاں ھندوستان ءِ ویزہ داتگ ، اے مردم یک شمبے ءِ روچ ءَ نوکیں دھلی ءَ سربیتگ اَنت۔اے سک اوگانستان ءِ جاورانی پد ءَ ڈیھ ءَ یلہ دیگ ءَ اَنت۔اے سکانی ھشتمی رمب اِنت کہ ڈیھ ءَ یلہ کنگ ءَ اِنت۔
???? اوگانستان ءِ راجی ایمنی شورکار ءِ کارگس ءِ رد ءَ سرکاری پھزدار ءُ تالبانانی میان ءَ بیتگیں جنگاں گْوستگیں ھپتگاں 433 تالبان کشگ بیتگ ءُ تالبانان گْوستگیں ھپتگءَ ڈیھ ءِ 23 استاناں 401 ارش کرتگ ۔ اے ارشاں 46 در پھزدار بیران ءُ 93 ٹپی بیتگ۔
???? ھلمند ءِ استاندار ءِ جارکش امرزواک ءَ گْوشتگ کہ نھرسراج ھنکین ءَ پھزدارانی بنجل ءِ سر ءَ بیتگیں دو تْراکاں دو پھزدار بیران بیتگ۔
???? ماں اوگانستان ءَ امریکا ءِ گچینی جھگیر زلمی ھلیل زاد ءَ اوگانانی میان ءَ سیل آرگ ءِ کارانی بندات کرتگ۔آدینگ ءِ روچ ءَ آئی ءَ وتی سپر پہ گتر، پاکستان ،ا وگانستان ، ناروے ءُ بلگاری ءَ بنا کرتگ۔ امریکا ءِ دری کارانی وزارت ءِ نیمگ ءَ شنگ بیتگیں ھالانی رد ءَ ھلیل زاد چہ پاکستان ءَ اے گپ ءُ تْرانانی پلہ مرزی کنگ ءِ لوٹ کنت۔
زانگ بہ بیت کہ تالبان اوگانستان ءِ انیگیں سرکار ءِ منوک نہ اَنت ءُ آیانی ھمے گْوشگ اِنت کہ امریکا اوگانستان ءِ سر ءَ زورگر اِنت ءُ اگاں آ گوں کسے ءَ گپ ءُ تْران کنت گڑا آ امریکا اِنت ھمے ڈک ءِ بنیاد ءَ امریکا ءُ تالبان وت ماں وت نشتگ اَنت ءُ مسام بندی اش کرتگ بلے اے مسام ءِ تہ ءَ اوگانستان ءِ سرکار ءِ ھچ بھر گون نہ بیتگ۔ ءُ چہ اے مسام پد ھم اوگانستان ءِ تہ ءَ تالبانانی ارش برجاہ اَنت۔
???? مزن ھور ???? | سرھال
#مزن_ھور
#امان????????
???? امان: یک شمبے ءِ روچ ءَ ماں امان ءَ 1147 کورونا ءِ نوکیں نادْراہ، چر ایشانی تہ ءَ 94 ڈنی ءُ 1053 امانی اَنت۔ درسی نادْراھانی کچ 76005 اِنت۔
???? امان ءِ وزارت ءِ رد ءَ 13 کورونا ءِ نادْراہ بیران بیتگ، درسی بیرانیانی کچ 384 اِنت ءُ درسی 55299 مردم دْراہ کنگ بیتگ۔
???? امان ءَ سپریم کمیٹی ءِ پرمان ءِ پد ءَ 25 جولائی ءَ بہ گر داں 8 اگست ءَ بندآرگ بنگیج بیتگ ءُ گوْستگیں روچ ءَ سھب ءِ 6 ءَ بہ گر داں بیگاہ ءِ 7 ءَ بازار بتکگ اَنت ءُ شپ ءَ 7 ءَ پد اگاں کسے سوار بہ بیت یا پیادگ اے پرمان ءَ مان مہ یار ایت آئی ءَ 100 ریال ملام لڈگ بیت۔
#گتر????????
???? گتر: گتر ءَ کورونا ءِ 398 نوکیں نادراہ۔ درسی 109036 کورونا ءِ نادْراہ اَنت۔
#کویت????????
????کویت: کویت ءَ 684 کورونا ءِ نوکیں نادْراہ، درسی نادراھانی کچ 63309 اِنت۔
# سودی ارب????????
سودی ارب: سودی ارب ءَ کورونا ءِ 2201 نوکیں نادْراہ، درسی نادْراھانی کچ 264973 اِنت۔
????سودی ارب ءِ جاندْراھی وزارت ءِ رد ءَ یک شمبے ءِ روچ ءَ 31 مردم بیران بیتگ، درسی بیرانیانی کچ 2703 اِنت۔
???? جھان ???? | سرھال
????امریکا : امریکا ءِ بازیں شھراں ٹکی کینگ ءِ بگیری ءَ تُرندیں زھرشانیانی دْرچ برجاہ اِنت۔
????جرمنی : جرمنیءِ بُنجاھی شھر برلنءَ یک شمبے ءِ سھب ءَ مردمے ءَ وتی گاڑی مچیں مردمانی سر ءَ گْوازینتگ ءُ 7 مردم زدگ کرتگ۔ ھمے گاڑی ءِ تاچوک پولیس ءَ دزگیر کرتگ۔
????سرجمیں جھانءَ کورونا ءِ نادْراھانی کچ چہ 16 ملیونءَ گْوستگ۔
????کوریا: گوریچانی کوریاءَ کورونا ءِ بنداتی نادْراہ دیم ءَ اتکگ۔ کورونا ءِ آماچیں مردم چہ زرباری کوریا ءَ اتکگ۔
????ھندوستان: چین ءُ ھندوستان ءِ سیمسری جیڑھاں پد ھندوستان ءَ چین ءِ سوداگری سیتانی بگیری ءَ تُرندیں گامگیج زیرگ بنا کرتگ۔
????رودرتکی بلوچستان????????????
????بی آر اے ءَ شھید کماندار کزاپی آئی ءِ کرد ءُ کارانی ساڑا ءَ گلزمین ءِ کوھسار ءِ نام داتگ
???? #بلوچ_استمانی_لشکر ( #بی_آر_اے ) ءِ جارکش #بیبگر ءَ پہ رسانکدر ءَ شنگ کرتگیں وتی درشانے ءَ گْوشتگ: 24 جولائی ءَ مئے گل ءِ سرمچارانی گشتی رمب ءِ #پالام_گْوج #بلیدہ ءِ ٹک ءَ گوں پاکستانی لشکر ءَ دیم پہ دیمی جنگ بیتگ۔پنچ ادار ءَ برجاھیں اے جنگ ءَ پاکستانی لشکر بے وار بیتگ ءُ پہ وتی کمک ءَ بالگرد ئِے لوٹائینتگ اَنت۔
جارکش ءَ گْوشتگ: اے ارش ءَ کماندار کزاپی ءَ وتی سنگتانی کمان کنان گوں بھادری ءَ لشکر ءِ دیم داشتگ۔کماندار کزاپی ٹپی بیتگ بلے پد ءَ ھم یکشل ءَ داں سئے ادار ءَ دژمن ءِ دیم ءَ میلانک بیتگ ءُ جنگ ئِے داشتگ۔ آئی ءَ دژمن ءِ انگر پْروشتگ ءُ وتی سنگت پہ دْراھی چہ آ اود ءَ در کرتگ اَنت ءُ وت شھید بیتگ۔
جارکش ءَ گْوشتگ: اے دراجیں میڑ ءَ دژمن ءِ ھم بازیں سپاھیگ کشگ بیتگ۔
جارکش ءَ درائینتگ: کماندار کزاپی پنام بھار چہ گْوستگیں پنچ سال ءَ گوں گل ءَ ھمگرنچ بیتگ آئی ءِ مستریں برات شھید اکرم پنچ سال پیش چہ بی آر اے ءِ نیمگ ءَ گوں دژمن ءَ جنگ کنان شھید بیتگ اَت۔کماندار کزاپی کسانسالی ءَ گوں گل ءَ ھمگرنچ بیتگ ۔ آ گوں وتی بودشت ، کار ءُ بھادری ءِ برپشت ءَ چیرجنگی گدان ءِ دومی کماندار ءِ بستار ءَ زمہ واری دیگ بیتگ اَت۔آئی ءَ وتی زمہ واری جوانیں وڑے ءَ پیلو کرتگ اَنت ءُ گل ءِ کارانی دیم ءَ برگ ءَ بنکی کرد ئِے گون کرتگ۔آ جوانیں جنگولیں کماندارے اَت۔آئی ءَ ماں کسانسالی ءَ سنگتانی کمان کنان دژمن ءِ بگیری ءَ مزنیں میڑاں سوب کرتگ۔
بیبگر ءَ گْوشتگ: گل شھیدکزاپی ءِ کرد ءُ کارانی ساڑ ءَ آئی ءَ*گلزمین ءِ کوھسار* ءِ دادنام دیگ ءِ جار ءَ جنت۔
بیبگر بلوچ ءَ گْوشتگ:زورگر ءِ بگیری ءَ شھیدی پہ بلوچ ورنایاں چہ یک مزنیں دادے ءَ کمتر نہ اِنت۔ دیمونیانی درچ داں بلوچستان ءِ آجوئی ءَ برجاہ بیت۔
—★—
????پہ سند ءُ بلوچستان ءِ آجوئی ءَ براس ءُ سندی سرمچارانی وت ماں وتی ھم سنتی ءِ جار
???? بلوچ سرمچارانی سنت « #بلوچ_راجی_آجوئی_سنگر» ( #براس) ءِ جارکش #بلوچ_ھان ءَ وتی درشانے ءَ گْوشتگ: براس ءَ ھواریں گل #بلوچستان_آجوئی_سنگر ( #بی_ایل_ایپ) ، #بلوچ_استمانی_لشکر
( #بی_آر_اے) ، #بلوچ_استمان_پانک ( #بی_آر_جی )، #بلوچ_آجوئی_لشکر ( #بی_ایل_اے) ءُ #سند ءِ سرمتابیں گل #سندودیش_آشوبی_لشکر ( #ایس_آر_اے) ءِ پرماندارانی نیادے بیتگ۔
اے نیاد ءِ تہ ءَ اے گپ گیشینگ بیتگ کہ پہ چیردستیں #بلوچستان ءُ #سند ءِ آجوئی ءَ بلوچ ءُ سندی راج ءِ میان ءَ جنگی سنتے جوڑ کنگ ءُ یکیں شوندات ءِ رد ءَ دیم ءَ جنزگ بیت۔
نیاد ءِ تہ ءَ نوکیں زمینی ، جنگی ءُ سیاسی جاورانی سر ءَ دلجمی ءَ گپ جنگ بیتگ۔
اے گپ منگ بیتگ کہ سندی ءُ بلوچ راج ءِ وت ماں وتی ھزاراں سالانی یکجاھیں گْوستانک، سیاسی، دودمانی ءُ ربیدگی سیادی اَنت۔انیگیں جاوراں دوئیں راجانی لوٹ آجوئی اِنت ءُ دوئینانی دژمن یکیں #پاکستان (پنجاپ) زوراک اِنت۔پمیشکا دوئیں گْوستانکی ءُ ھمساھگیں راجانی ھم سنتی ءُ یکجاھیں جنگی سنگر ءِ جوڑ کنگ مروچیگیں جاورانی پرارزشیں لوٹے۔
آئی ءَ گْوشتگ: سند ءُ بلوچستان اے وھدی #پاکستان ءُ #چین ءِ گیشواھی ءُ زورگری ءِ یکیں وڑ ءَ آماچ اَنت۔چین پاکستان گزرانکی راھداری (سی پیک) ءِ پارست ءَ دوئیں زوراکیں ڈیھ ، سند ءُ بلوچستان ءِ سرڈگار ءَ دست ءَ کنگ ءُ اے دمگ ءَ وتی ناراھیں سیاسی ، گزرانکی ءُ جنگی سیتاں رسگ لوٹ اَنت ءُ گوادر ءَ بہ گر داں بدین ءَ مئے تیاب، مڈی ءُ زر ءَ پہ مدامی دست ءَ کنگ لوٹ اَنت۔
سند ءُ بلوچستان ءِ سرجمیں تیاب نا ایوک ءَ گوں ھند ءِ زر ءَ ھور اِنت بلکیں گوں ھرمز ءِ تنگ ءَ ھم ھمگرنچ اِنت کہ جھان ءِ پر ارزشیں زری راھے ۔چین ءُ پاکستان بلوچ زر ءُ ھندوستان ءِ زر ءَ پہ وتی جنگی توان ءِ گیش کنگ ءَ بلوچ ءُ سندیانی تیاب ءُ زر ءَ گوں تیزی ءَ وتی گیشواھی لوٹانی آماچ کنگ ءَ اَنت۔ اے پرارزشیں دمگ ءَ چین ءُ پاکستان ءِ گیش بیوکیں گیشواھی سیاسی ، گزرانکی ءُ جنگی زور ءِ دارگ ءَ #ھندوستان ءِ پجیگ ءَ دمگی ءُ جھانی واکاں چیردستیں سندی ءُ بلوچ واکانی کش ءَ اوشتگ لوٹ ایت پرچا کہ ھمے جنگی ءُ سیاسی سْرپ بندی ءُ یک دومی ءِ کمک مئے درسانی راجی سیت، دمگی ءُ جھانی ایمنی ءُ مھکمی ءَ پھریز اِت کن اَنت۔
ھشت ھزار سال کوھنیں « انڈس دودمان» ءِ واھندیں #سندی ءُ یازدہ ھزار سال کوھنیں « مھر گڑ دودمان» ءِ واھند #بلوچ چہ ھزاراں سال ءَ اے گلزمین ءِ واھند اَنت کہ گْوستانک ءِ جتائیں باریگ ءَ بازیں ارش کنوک ، زورگر ءُ ڈنگانی دیم ءَ در اتکگ اَنت ءُ وتی ڈیھ ، دومان ءُ آجوئی ءِ پھریزگ ءَ سوبمند بیتگ اَنت۔مروچی ما گْوستانک ءِ اے جاہ ءَ گوں دگہ یک ناابرمی مھترھند پاکستان(پنجاپ) ءِ رنگ ءَ ارش کار ، زورگر ءُ ڈنگے ءَ دیم پہ دیم ایں۔وھد اتکگ کہ ما سندی ءُ بلوچ چہ یکیں سنگر ءَ اے زورگریں ڈنگ ءَ چہ وتی گلزمین ءَ پْروش بہ دئے ایں ءُ ڈن ءَ بہ کش ایں۔
بلوچ ءُ سندی راج ءِ گْوستانکی سیادی، یکیں راجی سیت ءُ وھد ءِ لوٹانی گندگ ءَ پد بلوچ سرمچارانی سنت « براس» ءُ سندی سرمتابیں گل « ایس آر اے» دوئیں راجانی دژمن (پاکستان) ءِ بگیری ءَ ھم سنتیں سنگرے ءِ ٹاھینگ ءِ جار ءَ جن اَنت۔
اے سنت گوں پاکستانی زورگری ءِ پنجگاں زندانی ئیں دگہ چیردست ءُ زوراکی ءِ آماچیں راج ءُ سرمتابیں گلاں ھم گیش اتگیں ڈک ءُ کردانکی راھبندانی رد ءَ سیادی جوڑ کنت داں پاکستان ءَ زندانی ئیں درسیں زوراکی ءِ آماچ ءُ چیردستیں راجانی آجوئی الم کنگ بہ بیت۔
—★—
????پاکستانی لشکر ءَ بلیدہ ءَ لشکرکشی ءِ میان ءَ سرمچار گزاپی ء اھمد شھید کرتگ | لشکرکشی برجاہ
???? تربت: پاکستانی لشکر #ایپ_سی ءِ بن شون ءِ رد ءَ آیاں ماں #بلیدہ ءَ لشکرکشی کرتگ ءُ لشکرکشی ءِ میان ءَ #بلوچ_آجوئی_لشکر ( #بی_ایل_اے) ءِ باسک #گزاپیءاھمد جاھمنند #جائین #پروم #شھید کرتگ۔
گوں چاریگانی کمک ءَ بیتگیں اے بیڑ ءَ شھید بیتگیں سرمچار ءِ دست ءِ توپک، چار میگزین،واکی ٹاکی، موبائل ءُ دستی تْراکے ھم دژمن ءِ دست ءَ کپتگ اَنت۔
دیمتر ءَ پاکستانی لشکر ءَ وتی چاریگانی کمک ءَ پیش گامی کنان سرمچارانی بندر انگر کرتگ۔چہ آ اود ءَ وردن، چار پرپٹ ءُ دگہ مڈی در جتگ ءُ برتگ اَنت۔
ایپ سی ءِ گْوشگ اِنت کہ دمگ ءَ آیانی پٹ ءُ پول انگت برجاہ اِنت۔
شھید گزاپی ء اھمد ، پنام بھار ءِ شھیدی ءَ پد اکسے ھم چہ زوراکیں لشکر ءِ نیمگ ءَ شنگ کنگ بیتگ۔
ریڈیو زْرمبش ءَ سر بیتگیں ھالانی رد ءَ پاکستانی لشکر ءَ اے دمگ ءَ گوں بالگرداں تیرگواری ھم کرتگ۔ بلوچ سرمچاراں دژمن ءِ دیم گوں تمردی داشتگ۔ سنگر ءُ سنگتانی دیمپانی کنان سرمچار گزاپی ، شھید بیتگ ءُ آ دگہ چہ جنگجاہ ءَ گوں سوبمندی ءَ درکپتگ اَنت۔
—★—
????شال:بلوچستان زانشجاہ بدنامی کیس ءَ دو کارمند چہ کار ءَ کشگ ءُ کمک مستر ءِ بگیری ءَ آمیدگسی پٹ ءُ پول ءِ لوٹ کنگ بیتگ
????شال: #بلوچستان_زانشجاہ ءَ چہ چیریں کیمرھاں تامر جوڑ کنگ ءِ بھتام ءَ دو کارمند چہ کار ءَ در کنگ بیتگ۔ چہ ایشاں زانشجاہ ءِ پانکجنانی مستر #مھمدنئیم چہ کار ءَ مدامی کشگ ءُ پانکجن #سیف_اللہ ماٹو کنگ بیتگ۔پیشگیں رجسٹرار #تارک_جوگیزھی ءُ پیشگیں ٹرانسپورٹ ءِ کارمستر #شریپ_شاھوانی ءِ دوسال ءِ انکریمنٹانی دارگ ءِ لوٹ کنگ بیتگ۔
اے لوٹ چہ زانشجاہ ءِ جند ءِ پٹ ءُ پولی پتر ءِ نیمگ ءَ کنگ بیتگ اَنت۔
زانشجاہ ءِ پٹ ءُ پولی پتر ءَ زانشجاہ ءِ پیشگیں کمک مستر #ڈاکٹر_جاویداکبال ءِ بگیری ءَ آمیدگسی پٹ ءُ پول کنگ ءُ آئی ءَ رس اتگیں دادانی پچ گرگ ءِ لوٹ کرتگ۔
زانشجاہ بدنامی کیس بلوچستان مزن آمیدگس ءَ گوش دارگ بیگ ءَ اِنت۔ 30جون ءَ مزن آمیدگس ءَ زانشجاہ ءِ پٹ ءُ پولی پتر ءَ پرمان داتگ کہ آ ایپ آئی اے ءِ گزارش ءِ پد ءَ کارروائی بہ کنت۔انگت ایپ آئی اے ءِ گزارش سرجمے ءَ دیم ءَ نے اتکگ۔رھبندانی رد ءَ زانشجاہ ءِ پٹ ءُ پولی پتر زانشجاہ ءِ کمک مستر ءِ بگیری ءَ کارروائی کنگ ءِ واک نہ دار ایت۔
بنشون ءِ رد ءَ چہ دو چیریں کیمرھاں سلیں تامر جوڑ کنگ بیتگ۔ ایپ آئی اے ءِ گْوشگ اِنت کہ چہ اے کیمرھاں 12 چوشیں تامر گرگ بیتگ ءُ اے تامر زانشجاہ ءِ پانکاں یوایس بی ءَ کرتگ ءُ پیشیگیں کمک مستر ڈاکٹر جاوید اکبال ءَ سر کرتگ اَنت۔
زانشجاہ بدنامی کیس ءِ پاشک بیگ ءَ پد بلوچستان ءِ نودربراں زھرشانی کرتگ ءُ وئیل ءِ دلجمیں پٹ ءُ پول ءِ لوٹ کرتگ اَت۔
—★—
????راشد ھسین ءِ درکنائینگ ءَ جرمنی، نیدر لینڈ ءُ زرباری کوریا ءَ زھرشانی ءُ آگاھی مھم برجم کنگ بیت
???? #راشدھسین_پدجنی_پتر ءِ نیمگ ءَ اگست ءِ ماہ ءَ جرمنی ،نیدر لینڈ زرباری کوریا ءَ ھوار آدگہ ڈیھاں زھرشانی ءُ آگاھی مھم برجم دارگ بیت۔
راشد ھسین پدجنی پتر ءِ جارکش #زامران ءَ گْوشتگ: راشد ھسین ءِ دراج کشیں بیگواھی ءُ آئی ءِ پدر نہ کنگ بژنی گپے۔مردمی اگبالانی کارکن راشد ھسین دسمبر 2018 ءَ چہ مزن ھور ءِ ڈیھ شارجہ ءَ امارات ءِ چیریں ترامگیجاں آوار جتگ ءُ داں شش ماہ ءَ دارگ ءَ پد درراھبندی پاکستان ءِ دست ءَ داتگ۔
جارکش ءِ رد ءَ مئےکِر ءَ درسیں کاگد ھست اَنت کہ امارات ءَ مردمی اگبالانی کارکن راشد ھسین چہ راھبند ءَ ڈن پاکستان ءِ دست ءَ داتگ ءُ پاکستانی رسانکدراں اے ھال وت ھم شنگ کرتگ بلے مروچی پاکستان اے گپ ءِ منگ ءَ ساڑی نہ اِنت کہ راشد ھسین آئی ءِ دست ءَ اِنت۔مارا گمان بیت کہ آ راشد ھسین ءَ تاوان دنت۔
جارکش ءِ رد ءَ راشد ھسین ءِ کھول گْوستگیں دوسالاں کراچی ءُ شال پریس کلب ءِ دیم ءَ زھرشانی کنگ ءَ اِنت ءُ ھمے وڑ ءَ درانڈیھ ءَ جاھمنندیں بلوچ ھم زھرشانی کنگ ءَ اَنت کہ راشد ھسین پہ دراھی پدرکنگ بہ بیت ءُ ما پاکستان ءِ آمیدگساں مزدانک ءِ واھگدار ایں۔
آئی ءَ گْوشتگ : پاکستان ءِ چیریں ترامگیج وتی ڈیھی راھبند ءُ مئےزھرشانیاں ھوار ایمنسٹی انٹرنیشنل ءِ دزبندیاں مان آرگ ءَ نہ اَنت ءُ راشدھسین ءَ انگت دیم ءَ آرگ ءَ بےسوب بیتگ اَنت۔
زامران ءَ گْوشتگ:ایمنسٹی انٹرنیشنل ءَ ھوار چہ جھان ءِ منگھیں راجانی جست گوں امارات ءَ ھمیش اِنت کہ راشد ھسین کجام میار ءِ بنیاد ءَ چہ راھبنداں ڈن پاکستان ءِ دست ءَ دیگ بیتگ؟
زامران ءَ گْوشت: راشد ھسین ءَ ھوار درسیں بلوچ سیاسی کارکنانی بیگواھی مردمی اگبالانی بدتریں بگیری یے۔ما جھانی ءُ پاکستانی راھبندانی رد ءَ مُزدانک ءِ لوٹوک ایں۔
—★—
????ڈیرہ بگٹی: ٹریکٹر ءِ ٹالی چیرکرتگیں شوروانی سر ءَ گْوستگ|ڈرائیور ءَ ھوار چار مزدور زدگ
???? #ڈیرہ بگٹی: #پاترشیپ #پیرکوہ ءَ ٹریکٹر ءِ ٹالی چیر کرتگیں شوروانی سر ءَ گْوستگ۔چہ ایشی ءَ ڈرائیور ءَ ھوار چار مزدور *مھمد دین ء گلام مھمد، مزار ء سوبانی ،کمال ء درے* ءُ *لشکر ء الی مراد* زدگ بیتگ۔لیویز ءَ زدگ بیتگیں مردم پہ درمان کنگ ءَ نادراھجاہ ءَ سرکُرتگ اَنت۔
—★—
????شال:مستونگ دگ ءِ سر ءَ تلاوگ ءَ جان ءِ شودگ ءَ زھگے بڈ اتگ ءُ بیران بیتگ
???? شال:مستونگ دگ ءِ سر ءَ کسانسالیں *مھمد یونس* تلاوگ ءَ جان ءِ شودگ ءَ بیتگ کہ بُڈ اتگ ءُ بیران بیتگ۔پولیس ءَ جون نادْراھجاہ ءَ سرکُرتگ ءُ ھژدری کارروائی ءَ پد کھول ءِ دست ءَ داتگ۔
—★—
????کوروناوائرس ءِ دگہ28 نوکیں نادْراہ | بیران بیتگیں مردمانی کچ 136 ءَ سربیتگ
???? شال: #کورونا وائرس ءِ دگہ 28 نوکیں نادراہ دیم ءَ اتکگ۔سرجمیں نادْراھانی کچ 11577 ءَ سربیتگ ءُ بیران بیتگیں مردمانی کچ 136 اِنت۔
????روکپتی بلوچستان????️????
????چھبار: امام الی نادْراھجاہ ءِ سوبمندی | چہ ننک ءِ مژگ ءَ سیچن ءِ در کنگ ءَ سوبین
???? #چھبار : #امام_الی_نادْراھجاہ ءَ #گھ ءِ جاھمنندیں ھپت ماھی شیرمچیں ننکے ءِ سر ءِ مژگانی تہ ءَ گرچ اتگیں سیچن ڈاکٹراں سوبمندیں برءُ بین ءَ پد در کرتگ چہ سوبمندیں بر ءُ بین ءَ پد نادْراھجاہ ءِ ڈاکٹراں وشی ءُ نادراھجاہ ءِ آسراتی ءُ کارمندانی بودشت ءِ سر ءَ دلجمی درشان کرتگ۔
ننک چہ گھ ءَ 115 ءِ ایمبولینس ءَ کنگ ءُ چھبار ءِ سرکاری نادراھجاہ امام الی ءَ آرگ بیتگ۔
مژگ ءُ ماژگانی بر ءُ بین ءِ زانوک #ڈاکٹرسیداھسان_دارکیاسی ءَ اے رد ءَ گوں اھوالکاراں گپ جنان ءَ گْوشتگ: وھدے کہ ننک نادراھجاہ ءَ سر بیتگ آئی ءِ سر ءِ سی ٹی اسکین گرگ بیتگ چہ ایشی ءَ آئی ءِ مژگ ءَ چیزے گندگ بیتگ۔ما گمان کرتگ کہ اگاں اشتاپ کنگ مہ بیت ھون در کئیت ءُ سر گژ ایت پمیشکا ما اشتاپی ءَ ننک بر ءُ بین جاہ ءَ برتگ۔
آئی ءَ گْوشتگ: وھدے کہ ننک بربین جاہ ءَ برگ بیتگ آ اود ءَ ساڑی ئیں کرانیوٹومی ءِ زانوگر ءِ کمک ءَ کہ سر ءِ کانپول ءَ دور کنگ ءِ کار ءَ کنت گوں مایکروپ اسکوپ ءَ مننجیز ءِ پردگ دیر کنگ بیتگ ءُ چہ ننک ءِ مژگ ءَ سیچنے کشگ بیتگ۔چہ ایشی ءَ پد ھون بند کنگ ءُ مننجیز ءِ پردگ ءُ کانپول پد ءَ وتی جاہ ءَ کنگ بیتگ اَنت ءُ ننک گوں دراھی ءَ چہ بر ءُ بین جاہ ءَ در کنگ بیتگ۔
آئی ءَ گْوشتگ:ننک ءِ جاور شر اِنت۔ آئی ءِ سی ٹی اسکین ھم گرگ بیتگ ءُ ما چہ بر ءُ بین ءَ دلجم ایں۔ما چہ جاندْراھی تک ءِ کارمندانی کوشست ءُ ھدا ءِ مھروانی ءَ ننک ءِ زند ءِ پھزگ ءَ سوبین بیتگ ایں۔
—★—
???? پھرہ ءِ زرباری نیمگ ءَ 3.2 ریکٹر ءِ زمین چنڈ| تاوان ءِ ھال نیست
???? پھرہ : #پھرہ ءِ زرباری نیمگ ءَ 3.2 ریکٹر ءِ #زمین_چنڈ بیتگ دنیگت ھچ وڑیں تاوان ءِ ھال نیست۔
بلوچستان ءُ سیستان ءِ استانداری ءَ ناگیگیں جاورانی چارگزار #اباس_الی_ارجمندی ءِ رد ءَ پھرہ شھرستان ءِ ھند « مسجد ء ابولپزل » ءَ 3.2 ریکٹری زمین چنڈے گزارش کنگ بیتگ۔
آئی ءَ گوں اھوالکاراں گپ جنان ءَ گْوشتگ: یک شمبے ءِ بانگواہ ءَ پھرہ ءِ زرباری نیمگ ءَ زمین چنڈ بیتگ۔ تھران ءِ جیوپزیکس زانشجاہ ءِ رد ءَ زمین چنڈ ءِ جھلی چہ زمین ءِ سر بر ءَ 10 کیلومیٹر بیتگ۔دنیگت تاوان ءِ ھال نیست۔
????
