ریڈیو زْرمبش بلوچی | ریڈیو زْرمبش بلوچی

ھوشاپ وئیل ءَ بیران بیتگیں زھگانی کھول ءِ لاشانی ھواریءَ زھرشانی ننداک برجاہ اِنت

ھوشاپ وئیل ءَ بیران بیتگیں زھگانی کھول ءِ  لاشانی ھواریءَ زھرشانی ننداک برجاہ اِنت

OCT

11

کیچ ءِبنجاھی شھر تربت ءَ گوستگیں روچ ءَ پاکستانی لشکر ءِ دست ءَ کشگ بیتگیں زھگانی کھول لاشانی ھواری ءَ مرچی دو روچ اِنت تربت ءَ شھید پدا چاراہ ءَ نندانک برجاہ اِنت۔ نندانک ءَ آل پارٹیز کیچ، سول سوسائٹی، نودربر گَل ءُلس مردم ءُ جنینانی مزنیں کچے ساڑی بیتگ۔ نندانک ءَ دمگدار ھسین جان ءَ نندانک ءَ آتکگ ءُ کھول ءَ گوں نندانک ءِ ھلاس کنگ ءِ لوٹ کرتگ ءُ گوشتگ کہ وئیل ءَ ایپ سی ھوار نہ اِنت۔ ایپ سی بے میار ءَ کس ءَ نہ جنت۔ کیچ دمگدار ءَ گوشتگ کہ من ایپ سی ءِ پلہ مرزی ءَ کنگ ءَ نہ آں، بلکیں اے وئیل ءَ ایپ سی ھوار نہ اِنت۔ آئی ءَ گوشتگ کہ چہ وئیل جاہ ءَ گرنیڈ ءِ کلچے دست کپتگ۔ آئی ءَ گوشتگ کہ آل پارٹیز کیچ، اھوالکار ءُ سول سوسائٹی ءِ سروکانی ھواری ءَ یک کمیٹی ءِ ٹھینگ بہ بیت، من آھانی ھواری ءَ روان جاہ ءَ چاراں۔ اد ءَ نندگ ءَ کسے ءَ ھوار کنگ ءُ ارزی نبیسگ نہ بیت۔ ھمے وھد ءَ زھگانی کھول ءَ گوشتگ کہ مئے مردم ایپ سی ءَ جتگ اَنت۔ کھول ءَ گوشتگ کہ زھگ گِس ءِ پُشت ءَ لیب ءَ بیتگ اَنت کہ چہ نزیکیں بُنجل ءَ یک گولھے جنگ بیتگ۔ کھول ءَ گوشتگ کہ ایپ سی ءِ بنجل مئے گساں چہ ھمنچو نزیک اِنت کہ شپ ءَ آھانی لیٹانی روژنائی مئے گساں سربیت۔ وئیل ءَ پد ایپ سی اتکگ ءُ نشانی گوں وت برتگ اَنت۔ ھمے وھد ءَ گوستگیں ماہ ءَ ایپ سی ءِ دست ءَ شھید بیتگیں جنین تاج بی بی ءِ سیادے ساڑی بیتگ آئی ءَ کیچ ءِدمگدار ءَ گوشتگ کہ ھمے وڑ ءَ تاج بی بی ءِ ازری پجار نہ بیتگیں مردمانی نام ءَ نبشتہ بیتگ، مارا گمان بیت کہ اے وئیل پجار نہ بیتگیں مردمانی نام ءَنبیسگ ءُ ھلاس کنگ بیت۔ نندانک ءَ ساڑی ئیں اتا شات وانشجاہ ءِ نودربر جمیل ءَ گوشتگ کہ من ءَانچش گمان بیت کہ سیاسی ٹولی ایپ سی ءِ بگیری ءَ نندانک کنگ ءِ گرانیں بار ءَ زرت نہ کن اَنت ءُ کھول ءَ لاچار کن اَنت کہ آ دمگدار ءِ دیم ءَ لھتین لوٹ ایر کن اَنت، لاشاں کنڈ کناھین اَنت۔ جمیل ءَ گوشتگ کہ تربت ءِ لَس مردم ءُ ورنا گوں کھول ءَ ھوار بہ بنت، آھانی دلبڈی بیت۔


بنشون:اھوالکار/اکس:اھوالکار