ریڈیو زْرمبش بلوچی | ریڈیو زْرمبش بلوچی,دْروشم

جنک زھگ ھرچ وڑ ءَ میاریگ اِنت | نبشتہ کار : دْروشم

جنک زھگ ھرچ وڑ ءَ میاریگ اِنت | نبشتہ کار : دْروشم

SEP

06
06 / 09 / 2020 نبشتانک 223

گپ،جیڑہ چوں کہ ودی بہ بیت میاریگ جنک اِنت پرچا کہ مئےچاگرد ءَ جنک اسپیتیں گد اِنت زوت پولنگ بیت۔نہ زان آں پرچا جنک ءَ ھچ ھک نیست،گھار داں ھما وھد ءَ برات ءَ دوست بیت داں آ وتی زرد ءِ سرجمیں واھگاں ایرموش کنت۔نبا نہ اِنت کہ جنک ھم واھگے بہ دار ایت۔گڑا برات ءُ کھول ءِ مردمانی منگہ ءُ ننگ ءِ جیڑہ بندات بہ اَنت ءُ جنک انچیں باریگے ءَ آرگ بیت کہ پہ آئی ءَ زند ءِ گْوازینگ ھم باز مشکل بیت۔


گپ کہ مردین ءِ وتی جند ءِ بارو ءَ بیت گڑا مردین ءِ ھیال آجو اِنت ھرچی کرت کنت پروا نیست کہ آ مردینے، بلے گپ کہ جنک ءِ بیت گڑا بلوچی وتگڑیں دود ءُ ربیدگ ءِ تاک پچ کنگ بہ اَنت ءُ جنک ءَ ھمے گْوشگ بیت کہ نو چہ تئ زند ءَ مرگ گھتر اِنت۔کھول ءِ ھمک مردین ءُ جنین ءِ گپ ھمیش بیت کہ تو مئےسرجھل کرت تو مارا شریں پونزے دیم ءَ دات۔نوں ما وتی دیم ءَ کس ءَ پیشداشت نہ کن ایں۔تو ھما روچ ءَ کہ ودی بوتگ اَت ئے بہ مُرتین ئے مروچی ما اے روچ نہ دیستگ۔جنک ءِ گپ ءَ کس گوش نہ دار ایت آئی ءِ دل ءِ واھگاں کس نہ پرس ایت،درسیں رژناسسائی درگور کنگ بہ اَنت گپ ایوک ءَ ننگ ءِ سر ءَ اوشت ایت۔ھمد ءَ مردم اجکہ بیت کہ جنک زاناں مردمے نہ اِنت آئی ءَ دلے لاپ ءَ نیست؟آ زاناں کس ءَ دوست داشت نہ کنت،ھچ واھگ وتی دل ءَ داشت نہ کنت؟


یک برے ایوک یک برے ، مردین وت ءَ جنک ءِ جاگاہ ءَ بہ کنت ءُ بہ جیڑ ایت باریں آ وتی واھگاں کُشت کنت؟مردین ءِ جنین کہ مر ایت شش ماہ اوپار کرت نہ کنت دگہ جنینی گیپت کہ ایوک ءَ زند ءِ گْوازینگ گران اِنت بلے جنین ءِ مرد کہ مر ایت گڑا گیشتر داں زندگ اِنت مات ءُ براتانی پادوناں کپتگ ءُ ازابیں زندے گْوازینگ ءَ لاچار بیت۔پرچا کہ آ جنکے آئی ءَ ھمے وڑ کنگی اِنت،وت ءَ زندگی ءَ درگور کنگی اِنت،درسیں واھگ آئی ءَ کُشگی اَنت بلے پہ مردین ءَ چوشیں ھچ راھبند نیست۔مردین اگاں کسے ءِ لوگ ءَ دور کنت یا کسے ءِ کلہ ءَ پروش ایت یا دگہ کھبگ جاھے ءَ روت،چاگرد اے چیز ءَ اوپار کرت کنت۔اگاں اوپار نہ کنت گڑا پہ جنین ءِ باریگ ءَ کہ آ چیر دست اِنت۔اگاں گپ چوش اِنت گڑا جنین پرچا ودی کنگ بوتگ؟مردین کمے وتی منگہ ءُ ننگ ءَ یک کِر بہ کن اَنت ءُ بہ جیڑ اَنت باریں آ چہ کجا اَتکگ اَنت کہ مروچی وت ءَ چو برزتر سرپد بہ اَنت۔اگاں من بے ھال نہ آں گڑا مردین چہ ھمے جنین ءِ شکم ءَ ودی بیت۔گڑا پرچا جنین چہ مردین ءَ کمتر بوت ءُ مردین برز تر؟


اے سرھال ءِ سر ءَ کہ مردم نبشتہ کنگ ءَ بندات کنت داں گپ سک باز ھست بلے کجام گپ ءَ مردم بہ کنت درسیں گپانی بن ءُ جنین ءِ بزگ کنوک مردین اِنت کہ وت چہ ھمے جنین ءِ شکم ءَ ودی بیت بلے انگت پہ مردین ءَ جنین ءِ کش ءَ دمانے وپسگ ءُ وشی زورگ ءَ پد پد ءَ پادون ءَ چگل دیگ ءَ ابید دگہ ھچ نہ اِنت۔گپ کہ جنین ءِ واھگ ءِ بیت ھزار لج داریں مردین درکیت ءُ دست ءَ گوش ءَ بارت ءُ توبہ کنت۔وت یک مردینے ءِ دل ھرچی بہ لوٹ ایت سانگ کرت کنت۔گوں کھبگ ءُ دگہ باریں چنچو جنک ءَ آشکی کنت۔مردین ھمک جنک ءَ پہ چارگ ءُ آئی کش ءِ وپسگ ءِ واھگ ءَ دار ایت بلے مجال نہ اِنت جنکے بہ گْوشیت کہ من ءَ ھم اے بچک دوست بیت من گوں ایشی ءَ چاگردی وتگڑیں راھبندانی رد ءَ سانگ کنگ لوٹ آں بزاں برات ءُ کھول ءِ آدگہ مردمانی سر ءَ آزمان کپ ایت۔جھان ءَ سر ءَ زور اَنت گُڈی ءَ انچش کن اَنت کہ جنک وتکشی بہ کنت یاکہ برات ءِ کھول ءِ مردم وت کش اَنت ءُ کل ئِے کن اَنت۔نہ زان آں جھان ءَ چینچو دیمروی کرتگ ءُ ما چینچو پد منتگ ایں بلے کمے مارا ھم جیڑگ لوٹ ایت۔مردمگری ءِ نیمگ ءَ دلگوش گْور کنگ لوٹ ایت پدمنتگ ءُ وتگڑیں چاگردی دودانی سانکل نوں سندگ لوٹ اَنت۔


زیکیں روچ ءَ شاھینہ شانین ءِ کوش ءُ ایشی ءَ پیش ما مدام دیستگ کہ مئے وتگڑیں چاگرد ءَ جنین ننگ ءِ نام ءَ کشگ بوتگ اَنت یا پہ وتکشی کنگ ءَ لاچار کنگ بوتگ اَنت۔چونائی ءَ ما درس زان ایں کہ مردم آسانی ءَ وت ءَ وت کشت نہ کنت۔زندگی ءِ آسر کنگ آسان نہ اِنت۔پمیشکا بلوچاں گْوشتگ ساہ ءَ زورے کش ایت۔پہ مردم ءَ انچیں گرانیں باریگ آرگ بیت کہ پہ آھاں زند ءِ گْوازینگ مشکل بیت۔گڑا یک راھے پشت کپ ایت کہ وت کُشی بہ کنت ءُ منگہ داریں کھول ءِ منگہ ءَ بہ دار ایت۔نوں بایدیں ما کمو بہ جیڑ اتیں۔نو ما وانندگ ءُ سرپد بوتگ ایں،نو ما کمو باز گوں آدگہ جھان ءَ وت ءَ بندوک سرپد بہ ایں۔نو چہ وتگڑیں دوداں گامے دیم ءَ  بہ جنز ایں ءُ جنکاں مردم سرپد بہ بہ ایں۔بہ زان ایں کہ آھانی دل ءَ ھم واھگ ھست آھم لھتیں چیز پہ وت دوستدار اَنت۔آھاں ھم وتی زندگی ءِ سوڑگ کنگ ءِ اگبال دیگ بہ بیت۔داستان ءَ چینچو دراجکش بہ کن آں ھمنچک در پچ بیت۔مئےچاگرد ءِ زوراکیانی داستان بھ نہ کٹ اَنت۔ھرچی نبشتہ بہ کن آں دل گیشتر درد کنت۔اے وھد ءُ چوشیں رستریں باریگے ءَ کہ ما گْوزگ ءَ ایں۔دگہ جاہ گندگ نہ بیت۔پمیشکا ھمنچک گیش مردم جیڑ ایت ھمنچک دل درد کنت ءُ جگر بن گر اَنت۔