ریڈیو زْرمبش بلوچی | ریڈیو زْرمبش بلوچی

ھنیپ ءُ کرومگ

ھنیپ ءُ کرومگ

MAY

27
27 / 05 / 2021 نبشتانک 32

ھنیپ ءُ کرومگ


کْرومگ اَنت تئ کرک پُلیں ھیال رکانی
گگل اَنت شیرگیں ارسانی کمندیں دْروھاپ


شائری ھدائی دادے بلے اگاں اے داد گوں اِزم ءَ سنگارگ بہ بیت،گڑا یک جُتکے ءِ پرّیچگ ءَ شرگدار ءَ دو یا سَے تاکدیم نبشتہ کنگ لوٹیت۔
چوشکہ من نا شائرے آں ءُ نا کہ شرگدارے بس وت ءَ شریں وانوکے سرپد باں۔


بلوچی ءَ ابید کجام زُبان ءَ کہ چیزے ءِ وانگ ءَ بندات کناں گڑا منی جُھد ھمیش بیت کہ وتی ونتگیناں سرپد بہ باں۔چونائی ءَ ھمک تھر ءِ وانگ ءُ سرپد بوگ ارزان نہ اِنت بلے شائری و گنتر اِنت،کہ شائری پہ سر سری وانگ ءَ ھچ پیم من ءَ ھوار ھرکس بہ بیت سرپد بوت نہ کنت۔


یک روچےشال ءَ من ءَ منی دوستیں ھمبلے ءَ پون کُت کہ کورونا ءَ کلاس نیست تو بیا منی نیمگ ءَ یک ءُ دو روچ دیوان ءُ تر ءُ تابے کنیں ءُ کتابے وانیں ءُ وت ماں وت کتاب ءِ سر ءَ گپ کنیں۔ھیر گڑا من درکپت ءُ ھمائی ءِ نیمگ ءَ شُتاں۔ھمبل ءِ کوٹی ءَ بازیں کتابے ھست اَت بلے سَے کتاب وانگ ءِ ٹیبل ءِ سر ءَ ایر اَت کہ چہ اے کتاباں یکے ھنیپ ءِ کرومگ اَت۔من کہ کتاب ءِ نام دیست گڑا یکبرے چہ وتی ھمبل ءَ جُست گیپت،اَزگر اے کرومگ ءِ بزانت چے اِنت؟
ازگر ءَ پسو ءَ ھمے گْوشت کہ کْرومگ پُلے ءِ گرمچہ ءَ گْوش اَنت۔پد ءَ من ھنیپ ءِ بابت ءَ جُست کُت کہ اے مردم کج ءَ نشتگ ءُ کئ اِنت؟ گڑا ازگر ءَ ھمے گْوشت کہ من چو نزاناں بلے من برے برے میسنجر ءَ ھال کُتگ چہ گالوار ءَ تربت ءُ ھمے دمگ ءِ مردمے بیت۔


گڑا من کتاب پچ کُت ءُ چہ ازگر ءَ سیاھیں چاھے ءِ تلب کُت کہ من بےسیاھیں چاہ ءُ سگریٹ ءَ ھچ ونت نہ کناں۔


کتاب من یکبرے سر ءَ داں پاد ءَ یکشل ءَ ونت ءُ سرپد بوگ ءِ ھچ جُھد نہ کُت،ازگر ھم کش ءَ نشتگ ءُ دگہ کتابے وانگ ءَ اَت۔اگاں من بہ گْوشاں اے کسانیں کتاب پہ سرسری من گوں یکیں سیاہ چاہ ءُ دو دانگ سگریٹ ءِ ھواری ءَ ھلاس کُتگ بگندئےکس ءَ باور مہ کنت بلے انچوش اِنت کہ سرسری کتاب ءِ وانگ سک وش اِنت۔


کْرومگ ءِ وانگ ءَ پد بازیں جاگھاں لچہ ءُ دستونکانی تہ ءَ نوکیں گال ءُ گالبند،چھر ءُ شبین کہ انگت مزن ءَ چہ مستریں شائر ءَ کارمرز نہ کُتگ اَنت اے کتاب ءِ تہ ءَ من دیست اَنت ءُ بازیں نزوری ھم منی چماں کپت،گڑا من ازگر ءِ دست ءِ کتاب پچ گیپت کہ دری ناول ئِے وانگ ءَ اَت ءُ گْوشت کہ بیا مرچی ھنیپ ءَ گوں کْرومگ ءَ سرپد بوگ ءِ جُھد ءَ کنیں۔
گڑا ازگر ءَ گْوشت کہ کْرومگ ءِ وانگ سک گران اِنت من یکرندے ونتگ سرپد نہ بوتگاں پد ءَ ایر کُتگ،من گْوشت کہ شریں چیز ءِ وانگ ارزان نہ بیت،چوش کہ من سرپد بوگ ءَ آں ھنیپ انچو بازاری ءُ رھرواجی شائرے نہ اِنت۔چو وانوک ءُ پٹ ءُ پولی سرپدیں مردمے ءِ رنگ ءَ درا بیت۔


کتاب ءِ بندات ءِ دو سَے شیئر ءَ پد ما سرجمیں روچ ءَ گوں یک شیئرے ءَ سر ءُ پُٹ بوتیں کہ اے شیئر چہ کتاب ءِ گچینی شیئر ءَ یکے کہ ایشی تہ ءَ گال ءُ گالبند،چیدگ،چھر ءُ شبین گوں اِزم ءِ مزنی ءَ کارگرگ بوتگ اَنت۔

کْرومگ اَنت تئ کرک پلیں ھیال رکانی
گلگل اَنت شیرگیں ارسانی کمندیں دروھاپ


ایر مُرتگ گْوش ءِ اوژاناگریں ایرماد ءِ سدپ
باچکاں باج گر اَنت بانڈم ءِ کھریں انساپ


دریگتے کہ من شرگدارے بوتیناں گڑا اے شیر من پہ وانوکاں الم پریتکگ اَت۔


کتاب ءِ تہ ءَ یک ھائیکوے ءُ یک نوکیں تھرے کہ چد ءُ پیش کس ءَ نبشتہ نہ کُتگ اولی رند ءَ نزاں ھنیپ ءَ نبشتگ ءُ انچو گوں ازمی مزنی ءَ نبشتگ کہ دیم ءَ اگاں کسے نبشتہ کنگ بہ لوٹیت اے رنگ ءَ نبشتہ کُت ئِے نہ کنت۔


باید و ھمیش اَت کہ من پہ وانوکاں اے تراھیلے سرجم ءَ اِد ءَ نبشتہ بہ کُتیں بلے پد ءَ نبشتانک سک مزن بیت ءُ مئے وانوک کہ نبشتانک ءَ پہ مزنی ءَ بہ گند اَنت گڑا چم جن اَنت ءُ نبشتانک ءَ نہ وان اَنت۔بلے یک ءُ دو بند پہ شُما ایر کناں کہ داں شُما بزان اِت اِزم کجام مزنی ءِ نام اِنت۔


زھیر ءِ بیگھاں رنگانی شھم دنت الماس
ودار ءِ ساھگاں کرنانی توکلے نشتگ
شپانی شُشتگیں بالاد ءِ شنگ بنت ھمباس


اے تراھیلے ءِ تہ ءَ سرجم ءَ ھنیپ ءَ اِزم کار گیپتگ بس وانوکے بہ بیت ءُ سرپد بوگ ءِ جُھد ءَ بہ کنت۔من اجکھاں کہ کتاب ءِ پیشگالانی نبشتہ کنوکاں شریں شیئر پرچہ نہ دیستگ اَنت ءُ بس سرسری گپ کُتگ۔


کْرومگ پہ نوک باھند ءُ پہ ھما مردماں شائری ءِ آسان کنگ ءُ لس زُبان ءَ سرپد بوگ ءِ گپ ءَ کن اَنت ءُ شائری اِش زوال کُتگ کْرومگ ءَ الم بہ وان اَنت کہ اے کتاب ءِ تہ وانوک ءَ ھرچی رس ایت بس سرپد بوگ ءِ جُھد ءَ بہ کنت۔

کْرومگ ءِ دگہ یک گچینی دستونکے ءِ لھتیں بند ایر کناں داں وانوک بزان اَنت کہ ھنیپ ءِ شائری ءِ کد چہ اے دگہ بازیں نامداریں شائراں کمتر نہ اِنت ءُ ھنیپ شائری ءِ اِزم ءَ سرپد اِنت ءُ اِزم ءِ کارگرگ ءَ گوں زگریں گال ءَ سک سرپد اِنت ءُ زانت کہ انچوش کہ چوشیں شائری گوں ازم ءُ زگریں گالاں سید ھاشمی،جی آر ملا ءُ دگہ یک ءُ دو مزن نامیں شائراں اے کار کُتگ،بلے ھنیپ ءَ ھم اے کار گوں سوبمندی ءَ کُتگ ءُ پیشداشتگ نوں وانوک بزان اَنت کہ کرومگ ءَ چوں مانا کن اَنت۔بیا اِت اے دستونک ءِ لھتیں بند ایر کنیں ءُ چاریں کہ ھنیپ ءَ چے نبشتگ ءُ چے گْوشتگ۔


اے کیچ ءِ تبد ءُ تئی سنگھانی زپتیں زھیر
شِد اَنت کلپریں اوستانی تراولیں اِشکند
شپیت چہ دیگریں رکاں وپائےمُروارد
کُد اَنت شمشُکیں لبزانی کرومگیں گُلکند


نوں اے شیئرانی پریچگ ءُ گیش مانا دیگ شرگدارانی کار اِنت منی رنگیں وانوکے بس چیزاں سرپد بیت ءُ وانوکاں شون دات کنت کہ کْرومگ ءَ پہ دربرگ ءَ باز
چیز ھست بس دربروکے لوٹیت۔


رُستگیں پگر ءِ ھمک لھڑیں ھیال
گوھریں لبزانی دپگال اِنت منی


نھنگ دروشمیں وابانی اِلّتاں سراپ کن
تنابیں مھپراں سرگوات ءِ ھکمتاں شینزار


تھیپیں دیدگاں آزمان ءِ واجہ ءَ جکسیں
بہ شنز کادیں رکانی برکتیں باماں


ا
ھنیپ ءَ مردم ھرچی کہ بوان ایت ءُ سرپد بہ بیت مردم ءِ چاڑ چیست بیت ءُ اگاں کسے شائرے مہ بیت ھم گْوش ئے شائری کنگ ءِ تماہ ءَ دار ایت۔
ھنیپ ءِ اے سلھیں دستونک ایشی ءِ لھتیں جُتک من جھل ءَ ایر کناں،اے دستونک سرجم ءَ جوان ءُ سنگین اِنت،ایشی ھمک یک جُتکے وت سرجمیں شیئرے۔
اے بند ءَ بچار:-


جُلگمینتگ جل مہ جلیں ساھتاں
دریپگ ءَ اِنت درگت ءِ جاڑیں ھوس


چیلگ ءَ اِنت چیروکائی شپ وت ءَ
آڈھور اِنت ملکت ءِ گیڈیں زھیر


روچگریں کولانی روتگ چُنک جنت
ساھگیں روتاپ ءِ بالاد ءَ بہ کُش


اے سلھیں دستونک ءِ سرجمیں جُتک بےمٹ ءُ سرجم ءُ پُرمانا اَنت۔اگاں کسے کتاب ءَ وانیت گڑا اے دستونک ءَ چار ءُ پنچ رند ءَ بوانیت اگاں نہ پہ سر سری شریں کلانیں شائر ھم نزان اَنت چے بوگ ءَ اِنت،پرچہ کہ ازم ءِ ھواری ءَ زگریں گال ھم پہ جوانیں کارگرگ بوتگ اَنت۔


شھبیریں دیدگانی شھکاری ءَ نہ اِنت
شیپگ تبیں ھیالاں اشکر نبیس اِتگ


____
تئ مھر ءِ برھنگی ءِ ستاھاں کپن گْور ءَ
مئےدیدگانی ستک ءَ تھاری گْور ءَ کتگ


اوستانی گریشگ ءَ دل ءِ پیڑاپ بُتکگ اَنت
ھورکیں زھیر ءِ کاسگ ءَ واری گور ءَ کُتگ


شیئر چہ شیر ءَ گچین۔کرومگ ءِ سر ءَ اگاں شرگدارے گپ بہ کنت ءُ ھنیپ ءِ اِزم ءِ مزنیں بالاد ءَ وانوکانی دیم ءَ بیاریت گڑا جوان اِنت کہ پہ منی سرسری گپاں کرومگ ءِ وڑیں کتابے ءِ گون ءَ ناھکی یے۔



گُمبدیں اوست ءَ شپادانی تلمبیں زیارت
ستک بےباور ءُ سانائیں سلاتاں ڈمبینت


چاگلے ترمپ ترھینت گریشگیں ھوشام ءِ لداں
دیدگاں رھن دل ءَ آپتیں آپدان کُمبینت


____
انجیر اناریں دردانگ
ارسانی کٹور ءَ میچل کن
رنگانی تھیپیں ملگوراں


____
زاپراں سنجیں نگاھاں ارس ھولمب اَنت ھنیپ
نیلگیں رکانی آپ رند کُنٹ کنت پند ءَ دل ئے


انجیڑ ساوڑیں پُل کہ یک کلاسیکل شیرے ءُ ایشی تہ ءَ نوکیت،چھر ءُ شبین گوں گال ءُ گالبنداں انچوش کماتگ کہ اے یکیں شیئر ءَ اگاں من کتاب ءِ گچین تریں شیئر بہ گْوشاں ھم رد نہ باں۔


گرانیں اگبالے ھیالان آژنا گوں تو نہ بیت
لبز پاھو داتگ اَنت ءُ جند ارزان ءَ جتگ


ھنیپ ءِ شائری ءِ ھمک تھر گچینی اِنت کجام وڑ ءَ کہ نبشتہ کنت۔زگریں گال کارمرز کنت یا آسانیں بلے ازم ءَ سرجم ءَ کارگیپت گُڈی ءَ سلھیں دستونکے ءِ لھتیں جُتک ایر کناں ءُ اے ھم گْوشاں کہ کرومگ ءَ الم بوان اِت کہ کرومگ ءِ تہ ءِ ھمک شیئر چو کرومگ ءَ ڈولدار اِنت۔


رولھیں درد نہ ترومب اَنت روچ رھمانیں دل ءِ
شپ رواج گیپتیں زھیراں تراس دنت نا مھرمیں


کھربا رنگیں لِکرکاں جان پیڑاتگ دل ءِ
مھپریں بچکند ودار ءِ بند ءُ بوگاں ترکُل اَنت


پچ مہ لرزیت سُرمگیں بولان تلاھاں شیپگیں
تبد ھامین اِنت کپاتاں کیچ سودائی مہ بیت



کرومگ ءِ سر ءَ ھرچوں گپ بہ کن ئے گپ بوت کنت ءُ اے شیئر کہ من نبشتانک ءِ تہ ءَ آورتگ اَنت ایوک ءَ کرومگ ءِ گچینی شیئر اے نہ اَنت،کتاب ءِ نزوری ھم باز ھست بازیں شیئر کہ کرومگ ءِ وڑیں کتابے ءَ مان مہ بوتین اَنت مان کُتگ اَنت بلے کرومگ پہ ھمک تب ءِ مردم ءَ رد ءُ بند دیگ بیتگ۔ پہ شائری کتابے ءَ اے منی اولی چمشانک اِنت کہ کرومگ ءِ وڑیں کتاب ءُ ھنیپ ءِ مزنیں اِزم ءُ زگریں گالانی ساچگ ءِ سر ءَ بیتگ۔ردی ءُ کوتاھیانی پھلی ءَ چہ ھنیپ ءُ وانوک ءَ لوٹاں۔



شُمئے کستر اومیتان اومر :-بلوچستان یونیورسٹی شال