بارکان:پنچ ماہ ءَ پیش زورانسری بیگواہ کنگ بیتگیں ڈاکٹر جمیل ءِ کھول ءَ ائید ءِ سیمی روچ ءَ زھرشانی روانکے کش اِتگ۔
روانک چہ نادراھجاہ چاراہ ءَ داں پریس کلب ءَ کشگ بیتگ،روانک ءَ ڈاکٹر جمیل ءِ کھول ءَ ھوار ھندی مردم، سول سوسائٹی ءُ بارکان گھبودی گل ءِ باسکاں بھر زُرتگ۔
ڈاکٹر جمیل ھمے سال ءِ 23 پروری ءَ چہ بارکان ءَ پاکستانی لشکر ءَ زورانسری آوار جنگ ءَ پد بیگواہ کُرتگ اَت کہ انگت بیگواہ اِنت۔
مردماں بلوچستان ءَ ھوار چہ پاکستان ءِ آدگہ شھراں زورانسری بیگواہ کنگ بیتگیں ورنا ءُ بلوچ نودربرانی ماں وانگجاھاں انگِر کنگ ءُ تُرسینگ ایر جتگ ءُ چہ بلوچستان سرکار ءُ واکداراں ڈاکٹر جمیل ءُ آدگہ مردمانی یل کنگ ءِ لوٹ کُرتگ۔
زھرشانی روانک ءِ مردماں تران کُرتگ ءُ گْوشتگ کہ بلوچستان ءَ ھمک روچ مردم زورانسری بیگواہ کنگ بیگ ءَ اَنت،ریاست ءِ ادارہ مردمانی پھریزگ ءِ جاہ مردماں زورانسری بیگواہ کنگ ءَ اَنت۔مردم وھدے لشکریاں گند اَنت وتی پھریزگ ءِ مارگ ءَ گیش تُرس اَنت۔پھازداری ءِ نام ءَ بلوچستان ءَ آوار جنوک نادینگ بیتگ اَنت۔
زھرشانی روانک ءَ بیگواھیں ڈاکٹر جمیل ءِ کسانسالیں جنک مھر ناز تران کُرتگ ءُ گْوشتگ کہ منی پِت ءِ بیگواھی ءَ پنچ سال سرجم بیتگ انگت بیگواہ اِنت۔
آئی گْوشتگ کہ اے پنچیں ماھاں ما باز رند ءَ زھرشانی کُرتگ ءُ وتی پِت ءِ یل کنگ ءِ لوٹ کُرتگ۔بلے انگت منی پِت یل کنگ نہ بیتگ۔
ترانکاراں تران کُرتگ ءُ گْوشتگ کہ سرجمیں بلوچستان ءَ مردمانی زورانسری بیگواہ کنگ ءِ دْرچ برجاہ اِنت۔ھزارانی کچ ءَ ورنا بیگواہ کنگ بیتگ اَنت،ریاست ءِ ادارہ بلوچستان ءَ برجاھیں اے ناشرکاری ءَ گِر ءُ دار بہ کنت ءُ بیگواھیں مردمانی زوت یل کنگ ءَ گامگیج بہ زور ایت۔ آیاں گْوشتگ کہ ریاست ءِ اے شونداتانی سْوب ءَ مردمانی دلاں کینگ ودی بیت،جاورانی گھتر کنگ ءِ جاہ گیش ناگیگ بیگ ءَ اَنت۔
آیاں گْوشتگ کہ ڈاکٹر جمیل دمگ ءِ چاگردی جیڑھانی سر ءَ یک توانمندیں توارے بیتگ،آئی مدام ھندی مردمانی اُگبالانی گپ کُرتگ ءُ مرچی آ ھمے بنیاد ءَ بیگواہ کنگ بیتگ۔
ترانکاراں تران کُرتگ ءُ چہ مردمی اگبالانی ادارھاں دزبندی کُرتگ کہ بلوچستان ءَ برجاھیں زورانسری بیگواھیں مردمانی یل کنگ ءُ زورانسری بیگواھیانی گِر ءُ دار کنگ ءَ وتی کِرد ءَ پیلو بہ کن اِت۔
بنشون: دمگی اھوالکار / اکس: اھوالکار
