کراچی:ائید ءِ سیمی روچ ءَ سند ءِ بُنجاھی شھر کراچی ءَ زورانسری بیگواھیں مردمانی کھولاں کراچی پریس کلب ءِ دیم ءَ زھرشانی کُرتگ ءُ دومی نیمگ ءَ چہ بشی ھورانی سْوب ءَ سرجمیں شھر زیراپ اِنت۔دمک ءُ در چہ آپ ءَ پُرّ اَنت ءُ سرجمیں شھر ءِ مردم ناگیگیں جاورانی دیمپان اَنت۔ بلے اے وڑیں ناگیگیں جاوراں ھم زورانسری بیگواھیں مردمانی زھرشانی گدان برجاہ اِنت۔
چارسالی ماھروز گوں وتی مات،گُھار سئیدہ ھمید ءُ برات ھمل ھمید ءِ ھمراھی ءَ زھرشانی گدان ءَ اتکگ ءُ زورانسری بیگواھیں مردمانی یل کنگ ءِ لوٹ کُرتگ۔
اے درگت ءَ چہ کراچی ءَ زورانسری بیگواہ کنگ بیتگیں ابدُلھمید زھری ءِ زھگ ھمل ھمید یک تامُربندی کلوھے ءَ وتی پت ءِ یل کنگ ءِ سر ءَ بژن درشان کُرتگ ءُ گْوشتگ کہ پانزہ ماہ اِنت کہ منی پت بیگواہ اِنت۔
آئی وتی پِت ءَ ھوار چہ کراچی ءَ بیگواہ کنگ بیتگیں آدگہ مردمانی یل کنگ ءِ لوٹ کُرتگ۔ ھمل ھمید ءِ پِت چہ کراچی ءِ گُلستان جوھر ءَ بلاک نمبر 13 ءَ 10 اپریل 2021 ءَ شپ ءِ ادار سَے ءَ پاکستانی چیریں ادارھانی کارمنداں چہ گس ءَ زورانسری آوار جنگ ءَ پد بیگواہ کُرتگ۔
کراچی پریس کلب ءِ دیم ءَ زورانسری بیگواھیں مردمانی کھولانی زھرشانی گدان برجاہ اِنت ءُ زھرشانی گدان ءَ بلوچ یکجھتی کمیٹی کراچی ءِ پلہ مرزی گون اِنت۔گدان ءِ سروکی ءَ بلوچ یکجھتی کمیٹی کراچی ءِ سروک آمنہ کنگ ءَ اِنت۔
زھرشانی گدان ءَ ابدُلھمید زھری،شوکت،مھمد امران ءُ نوربکش ھبیب ءِ کھول نشتگ ءُ آیاں وتی مردمانی یل کنگ ءِ لوٹ کُرتگ۔
بنشون: دمگی اھوالکار /اکس: دمگی اھوالکار
