ریڈیو زْرمبش بلوچی | ریڈیو زْرمبش بلوچی

چیرجنگی مردمی کچ ءُ نوکیں سلاھانی گون ءَ نہ،بلکیں گوں مھکمیں پگر ءُ سَسّا ءَ کَٹّگ بنت۔ ڈاکٹر اللہ نزر

چیرجنگی مردمی کچ ءُ نوکیں سلاھانی گون ءَ نہ،بلکیں گوں مھکمیں پگر ءُ سَسّا ءَ کَٹّگ بنت۔ ڈاکٹر اللہ نزر

OCT

06
06 / 10 / 2020 بی ایل ایپ 16

چیرجنگی مردمی کچ ءُ نوکیں سلاھانی گون ءَ نہ،بلکیں گوں مھکمیں پگر ءُ سَسّا ءَ کَٹّگ بنت۔ڈاکٹر اللہ نزر


بلوچ راجدوستیں راھشون ڈاکٹر اللہ نذر ءَ وتی شکساتگیں درشانی ءَ گْوشتگ:مئےدُژمن بس تْرندی ءِ زُبان ءَ سرپد بیت۔مئے دُژمن بُزدلے۔آ نہ چہ وتی توانمندی ءَ آشنا اِنت ءُ نہ مئے۔ما وتی ءُ وتی دُژمن ءِ توانمندی ءَ شری ءَ سرپدیں۔آ نزانت کہ جنگاں سلاہ نہ بلکیں مھکمیں پگر،سَسّا ءُ گوں سوھوی ءَ کَٹّگ بنت۔اے یک دمبروکیں جنگے۔اے جنگ ءَ بلوچ ابرمی جنگی ھنکینے ءَ (Natural War Zone) اِنت۔پمشکہ بلوچ دم نہ بارت بلئے پنجابی لشکر ءِ دمبرگ آئی ءِ کسمت ءَ اِنت۔بلوچ راج اے جنگ ءَ گوں دانائی ءُ سوھوی ءَ کَٹ ایت۔


آئی ءَ گْوشتگ:پہ پاکستان ءَ گْوستانک سازیں جُھد کنوکیں بنگالیان ءَ پنجابی استان ءَ وتی کچ ءَ کجا آھان ءَ مردم ھم سرپد نہ بیتگ۔آھانی بازیں کچ درامد گْوشتگ ءُ آھانی سر ءَ ھاکمی کُرتگ۔بلئے وھدےکہ آ پاکستان ءِ راستیں چھرگ ءَ سرپد بوت اَنت ءُ وتی پھریزگ ءِ راہ اِش گچین کُرت گڑا وتگڑیں مومنیں لشکر بھادُریں بنگالی راج ءِ دیم ءَ چوگَجّ ءِ وڑ ءَ نشت۔


ڈاکٹر اللہ نذر ءَ گْوشتگ:مرچی ما چیرجنگی مِڑگ ءَ ایں۔بازیں وتگڑیں راجدوست مئے جنگی رپک ءَ انچا ءُ بےسیت گْوشگ ءُ راج ءَ بدل کنگ ءِ جُھد ءَ کنگ ءَ اِنت۔ما زانیں کہ پاکستان ءِ وڑ ءَ آھاں وتی آوکیں باندات تھار گندگ بیگ ءَ اِنت،چے ءَ کہ ما پاکستان ءِ برابری ءَ ھرھساب ءَ دیم ءَ اِنت۔بلوچستان ءِ زمین زانتی پہ چیرجنگی ءَ چہ جنت ءَ کمتر نہ اِنت۔چیر جنگی جنگول راجی دریا ءِ تہ ءَ چو ماھیگ ءِ وڑ ءَ اِنت۔بلوچ چیرجنگی جنگولاں داں بیست سالاں بلوچ راجی دریا ءُ بلوچستان ءِ بےدروریں زمین زانتی ءَ وتی گْورمبازاں پناہ داتگ۔زوراکی ءِ دُرسیں پندلانی چکاسگ ءَ ابید پاکستان ءَ بلوچ چیرجنگی جنگولانی راجی مھر ءُ دوستی تُشے ھم کم کُرت نہ کُرتگ۔


آئی گْوشتگ:چیرجنگی ءَ مردمی کچ ءُ نوکیں سلاھانی برابری ءَ ھما مردم کن اَنت کہ آ چیر جنگی گْوستانک ءَ سرپد نہ اَنت۔چیرجنگی لشکر مردمی کچ ءَ کم،سلاہ ءَ نزور،بلئے جُنزگ،توانمندی،شاھوکاری،سرپدی ءُ گوں مھکمیں پگر ءُ سَسّا ءَ ھر وڑیں توانمندی ءَ ناکُن ءِ گَٹ پاچگ پرمائیت۔بلوچ گْوستانک وتی جاہ ءَ،بس بیست سال ءِ ھیلکاری پدر اِنت کہ پاکستان بلوچ رورل ءُ اربن وارپیئر ءِ گر ءُ دار کنگ ءَ سک بےسوب بیتگ۔مرچی ھم ھزاراں بلوچ جنگول کوھاں ھست اَنت ءُ تھار ماھیں شپاں چو گُرک ءَ ناگھانی کھر ءِ وڑ ءَ دُژمن ءِ سر ءَ کپ اَنت۔وھدےکہ شھراں ھیلکاریں چیرجنگی جنگول، سلیپر سیلز ءُ ریزور پورس ءِ بلوچ راج ءِ تہ ءَ ھچ کمی نیست۔


ڈاکٹر اللہ نذر ءَ گْوشتگ:نی ھژدری اِنت کہ مئے ھمساھگیں ڈیھ ءُ جھانی توانمندیں ڈیھ بلوچ راجی زْرمبشت ءِ سیاسی ءُ سلاہ بندیں تک ءِ کمک ءَ بہ کن اَنت۔چے ءَ کہ آجوئیں بلوچستان ءِ زمین زانتی،مردمگری ربیت داریں راج ءُ گرانبھائیں مڈی نہ ایوک ءَ دمگ بلکیں پہ سرجمیں جھان ءِ ایمنی،سلامتی،دیمروی ءُ وشھالی ءَ جوانیں کردے پیلو کُرت کن اَنت۔