ریڈیو زْرمبش بلوچی | ریڈیو زْرمبش بلوچی

وگانستان ءَ پجیگ دمگ ءِ سلامتی ءِ راہ چہ آجوئیں بلوچستان ءَ درکا اَنت۔چیئرمین ھلیل

وگانستان ءَ پجیگ دمگ ءِ سلامتی ءِ راہ چہ آجوئیں بلوچستان ءَ درکا اَنت۔چیئرمین ھلیل

SEP

02
02 / 09 / 2020 بی این ایم 102

اوگانستان ءَ پجیگ دمگ ءِ سلامتی ءِ راہ چہ آجوئیں بلوچستان ءَ درکا اَنت۔چیئرمین ھلیل
کابل : بلوچ راجی زْرمبشت (بی این ایم) ءِ بنجاھی جارکش ءَ گْوشتگ:کابل ءَ سیمسر ءُ تمنی جیڑھانی وزارت ءِ چیردستی ءَ برجم بیتگیں”بلوچ ءُ پشتون ھم سنتی روچ “ ءِ درگت ءَ مراگشے برجم دارگ بیتگ۔اے مراگش ءَ سیمسر ءُ تمنی جیڑھانی وزارت ءِ مھمد یاکوب اھمد زھی،ڈاکٹر مھمد آسپ کازی زادہ، سیمسر ءُ تمنی جیڑہ ءِ وزارت ءِ اگدھدار،وانگ ءُ زانگ ءُ ربیدگی مردم ، سائنس اکیڈمی ءِ باسک،تمنی سروک،راجی پترانی باسک،سول سوسائٹی ءِ باسک،جنین،ورنا،ٹیچر ءُ گوں رسانکدر ءَ بندوکیں مردمانی پجیگ ءَ بلوچستان ءُ پکتونووا ءِ مردماں بھر زرتگ۔مراگش ءَ بلوچ راجی زْرمبشت (بی این ایم) ءِ سرکماش ھلیل ءِ کلوہ سدرہ اکبال ءَ ونتگ۔
مراگش ءِ بندات ءَ سیمسر ءُ تمنی جیڑھانی وزارت ءِ کمک سرکماش مھمد یاکوب اھمد زھی ءَ چہ درساں پیش مراگش ءَ بھر زرتگیں مردم وش اتک کُرت اَنت ءُ پد ءَ تران کنان ءَ اے روچ ءِ گْوستانکی پژدر ءِ سر ءَ وتی ھیال ءُ لیکہ درشان کرت اَنت۔آ دگہ ترانکارانی تہ ءَ ڈاکٹر مھمد آسپ کازی زادہ،ابد الولی ھان،پشاور زانشجاہ ءِ ڈاکٹر سھیل ھان،جنرل کونسل آپ ٹرائب ءِ سرکماش زرجان شنواری، نزام الدین پترت بلوچ، نجیب اللہ منالی،بانک سدرہ اکبال، ابدل گپار رزاھی، وھید جان مھلس، ترکمن کونسل ءِ سرکماش ھکجو ءَ وتی تران ءُ گپ ءُ گالانی تہ ءَ بلوچ ءِ گْوستانکی پُژدر،دود ءُ ربیدگ،گْوستانکی سیادی،جھد ءُ پہ آجوئی ءَ آیانی دیمونی ءَ ھواری ءَ بازیں تک ءُ پھناتانی سر ءَ گپ کرتگ۔ترانکاراں پہ بلوچ ءُ پشتون راج ءَ ھستیں جاور ءَ سوبمندی،وشھالی ءُ پہ دیمروی ءَ ھم سنتی اولی راہ من اِتگ۔نامداریں لچہ کار مھمد ھاشم گمشریک، شپی اللہ بابرزھی ءُ زلمائی منک ءَ وتی وتی شیئر ھم ونت اَنت کہ ایشانی تہ ءَ راجی ھم پتی،سرڈگار ءُ راج ءِ مھر ءِ کلوہ مان اَت۔بلوچی شائری ءِ سرکماش واجہ نزام الدین پترت بلوچ ءَ ڈائریکٹر رسانکدر ءُ پبلک ریلیشنز ابدلواھد ھاوری ءَ آئی ءِ جوانیں کارانی ستا ءَ ساڑائی نمدی یے پیش کرت۔
مراگش ءَ بانک سدرہ اکبال ءَ تران کنان ءَ بلوچ راجی آجوئی ءِ سیاسی ءُ راجمستری جُھد ءِ برجاھیں گل بلوچ راجی زْرمبشت (بی این ایم) ءِ سرکماش ھلیل ءِ کلوہ ونت ۔
کلوہ ءَ گْوشگ بیتگ : پہ من شرپےکہ من گوں بلوچ اوگان دوستی ءِ روچ ءِ درگت ءَ منگھیں اوگان سرڈگار ءِ مڑھداریں پسگاں تران کنگ ءَ آں۔


چیئرمین ھلیل ءِ کلوہ


اوگان ءُ بلوچ چہ زمانگاں گوں براتی ءُ دوستی ءِ سیادی یے ءَ بندوک اَنت۔ما وشی ءُ گم ءَ یک دومی ءِ ھمراھداری کرتگ۔وھدے کہ اوگان راج ءِ سر ءَ ناگیگیں جاورے اتکگ آیاں دیم گوں بلوچ سرڈگار ءِ نیمگ ءَ کرتگ ءُ بلوچ راج ءَ پہ آھاں دست ءُ دل پچ کرتگ اَنت۔ ھمے پیم وھدے بلوچ راج ءِ سر ءَ ناگیگیں جاورے اتکگ گڑا مئےدومی گس اوگان سرڈگار بیتگ۔بلوچ اوگان راج ءِ اے زندہ دلی،دست پچی ءُ مردمگری ءَ مدام یات کنت۔
مروچی بلوچ ناگیگیں جاورانی دیمپان اَنت۔بلوچ ءِ گس سچگ ءَ اَنت۔بلوچ ءِ مال ءُ مڈی پلگ بیگ ءَ اَنت۔بلوچ ءِ ننگ ءُ منگہ لپاشگ بیگ ءَ اَنت گڑا منگھیں اوگان ھم نہ پھز اتگ۔چل سالی جنگ ءَ ایشیا ءِ اے منگھیں ڈیھ بے کچ تاوان بار کرتگ۔من سرپد بہ آں کہ اے منگھیں راج ءَ دگہ گیش تاوان بارکنگ مہ بیت۔بلکیں پہ ایشی ءِ دیمروی ءُ وشھالی ءِ گندگ بلوچ راج ءِ اوست ءُ ارمان اِنت۔
دوستاں! دوست بدل بوت کن اَنت۔سیادیانی تہ ءَ پْروشت ءُ پروش کا اَنت۔ڈیھی ءُ دمگی لوٹ ءُ گزر بدل کنگ بہ اَنت بلے زمین بدل کنگ نہ بہ اَنت۔مارا پھر اِنت کہ ما نہ ایوک ءَ زمینی ھساب ءَ گوں یکے دومی ءَ بندوک ایں بلکیں مئے براتی سیادی ءِ میان ءَ چوشیں چیزے ودی نہ بیتگ کہ مئےدوستی ءِ میان ءَ میلانک بہ بیت۔مئےدوستی بےکچ ءُ بےبھا اِنت۔مئےدوستی گْوستانک ءِ درسیں جھل ءُ بُرزاں یکیں ھساب ءَ برجاہ بیتگ۔ما وھد ءِ درسیں چکاساں سوبین بیتگ ایں۔
بلوچ ءُ اوگان دوستی تیوک ءَ دپ ءِ سر ءَ نہ اِنت بلکیں مئےدوستی ءِ منانک گْوستانک ءِ تاکدیماں نبشتگ اَنت۔1758 ءَ، اوگانستان ءِ بنداتی اوگان بادشاہ اھمد شاہ بابا ءُ بلوچستان ءِ منگھیں واکدار نسیر ھان ءِ میان ءَ بلوچ اوگان دوستی ءِ یک منتگیں مسامے بیتگ اَت۔ نسیر ھان منگھیں اھمد شاہ بابا ءِ درساں مستر ءُ کمکاریں دوست جوڑ بیتگ۔لشکری ساز ءُ سامان ءِ کمک کنگ بیتگ۔اھمد شاہ بابا ءِ پانی پت ءُ مشھد ءِ گْوستانکی جنگاں گْوستانک نبیس نسیر ھان ءِ مستری ءَ بلوچ لشکر ءَ منگھیں کرد سرپد بہ اَنت۔چہ نسیر ھان ءَ پد آئی ءِ جھگیراں ھم بلوچ اوگان دوستی منگہ دات۔
مئے بےبھائیں دوستی مئے راجی نپ ءُ سیتانی تہ ءَ اِنت۔بلے چہ ایشی ءَ مئے ازلی دژمن پاکستان ءَ وش نہ بیت۔دو راجانی دوستی ءَ کس ءَ زھر مئیت بلے پاکستان ءَ بلوچ ءُ اوگان دوئیں راجاں وتی دژمن سرپد بیت۔پاکستان ءِ”اسٹریٹیجک جھلانکی“ ءِ بنکی لوٹ اوگانستان ءِ تہ ءَ ناایمنی جوڑ کنگ اِنت۔اوگانستان ءِ نا ایمن کنگ ءَ پاکستان ءَ چے چے کرتگ اے گپ ءِ گیشینگ ھژدری نہ اِنت۔بلوچ راجی زْرمبشت (بی این ایم)سرپد بیت کہ پاکستان اوگانستان ءَ دزمانجی ءُ ناشرکاری ءِ سرپرستی مہ بوتیں گڑا مروچی اوگانستان دیمروی کُرتگیں ڈیھے بیتگ اَت۔مروچی اوگانستان،باپاری،مالی ءُ پہ سیل ءُ سواد ءَ ایشیا ءِ بنجاہ بیتگ اَت۔بلے پاکستان ءِ دزمانجی ءَ پاکستان ءِ ناشرکاری ءَ اوگانستان ءِ چاگرد ءَ ناشرکاری ھوار کرت ءُ اوگانستان تباہ کرت ءُ اے جھد مروچی ھم برجاہ اِنت۔
ھمے وڑ ءَ بلوچ راج ھم پاکستان ءِ رستری ءِ دیم پہ دیمی ءَ کنگ ءَ اِنت۔شما دیستگ کہ چہ گْوستگیں روچاں اکسے ترگ ءَ اِنت کہ مات ءُ پت وتی ورنائیں زھگ ءِ جون ءِ سر ءَ نشتگ ءُ سوگی اَنت۔اے ھیات بلوچ اِنت،زانشجاہ ءِ نودربرے۔پاکستانی لشکر ءَ آئی مات ءِ گشان ءِ سر ءَ آئی دست ءُ پاداں بستگ اَنت ءُ پت ءُ مات ءِ دیم ءَ تیر گواری کرتگ ءُ کشتگ۔ھیات ایوک ءَ یک درورے۔مئےورنائیں برات ھمک روچ ھمے وڑ ءَ کُشگ بیگ ءَ اَنت۔پہ مات ءُ گھارانی سریگاں بلوچ ءُ اوگان سرانی دیمونی ءَ دیگ ءَ اَنت۔پہ پاکستان ءَ اے چیز ھچ ارزشت نہ دار اَنت۔
پاکستان چی یے؟ بلوچستان بلوچ ءِ سرڈگار اِنت۔اوگانستان اوگان ءِ سرڈگار اِنت،سند سندیانی سرڈگار اِنت بلے پاکستان کئ سرڈگار اِنت۔نا گْوستانک ءُ نا دود ءُ ربیدگے ھست۔زورگریں انگریز ءَ وتی سیتانی پد ءَ پاکستان جوڑ کرتگ۔اے مھترھند یک رستریں لشکری ءِ دست ءَ اِنت۔ما درس زان ایں کہ پاکستان ءِ درسیں سوڑگاں لشکر کنت۔
بلوچ چہ دمگ ءِ کْوھن تریں راجاں یکے ءُ یک کوھن تریں دود ءُ ربیدگے ءِ واھند اِنت۔بلوچ بھادری، زبان ءِ پاسپانی،زوراکی ءِ بگیری ءَ جنگ ءُ پہ مھمانداری ءَ زانگ بیت۔چہ 1666 ءَ بلوچ یک مھترھندے ءِ واھند اِنت۔13نومبر 1839 ءَ انگریز مئےسر ءَ زورگر بوت۔انگریز مزنیں زوراکے اَت بلے زورگری ءِ بنکی انگیز اوگانستان ءِ سر ءَ زورگری کنگ ءَ بلوچ ءِ کمک کنگ ءَ مکن کنگ اَت۔گْوستانگ گواہ اِنت کہ 1838 ءَ برتانیا ءِ ھند ءِ نوآبادیاتی لشکر وھدے وتی اولی اینگلو اوگان جنگ ءَ دیم ءَ جُنز اِت،گڑا کچی ءُ بولان پاس ءِ دمگاں بلوچ راج ءَ انگریزی لشکر بےکچ تاوان دات۔اے پہ انگریز ءَ اوپار کنگی تاوانے نہ اَت۔وھدے برتانیا ءِ لشکر چہ اوگانستان ءَ واتر اتک گڑا آئی 13 نومبر 1839  ءَ بلوچستان ءِ بندر کلات ءِ سر ءَ ارش کرت ءُ مئے ھان کلات بلوچ واکدار مھراب ھان ءُ ھمراھاں جنگ ءِ راہ گچین کرت۔ ءُ سرڈگار ءِ پھریزگ ءَ شھید بوت اَنت۔چہ ایشی ءَ پد انگریز ءَ بلوچ ءُ اوگانستان یک نیمگی انچائین ءُ وتگڑیں ڈیورنڈ باؤنڈری لائن، گولڈ اسمت ءِ باؤنڈری لائن ءُ میک میکون با ڈر لائن ءَ دوئیں راج بھر کرت اَنت۔
ما11اگست 1947 ءَ چہ انگریز ءِ دست ءَ  آجو بیت ایں بلے ھپت ماہ ءِ کسانکیں مدت ءَ پد ءَ پاکستان ءَ مئےآجوئی لپاشت۔چہ ھما روچاں بلوچ وتی آجوئی ءِ سیاسی ءُ راجمستری جھد ءَ کنگ ءَ اِنت۔ما اے گپ ءِ سر ءَ پھر کن ایں کہ مئے جنگی راھشون آگاابدالکریم ھان ءَ شما پناہ داتگ۔ ایشی ءَ پد مئے میزبانی کرتگ۔مئے جھد برجاہ اِنت۔اے جھد ءَ ما بےکچ دیمونی داتگ۔مئےدیمونیانی پند داں راجی آجوئی ءَ برجاہ مان ایت۔
مئے آجوئی ءِ جھد میان استمانی راھبندانی رد ءَ برجاہ اِنت۔باز کنونشز مئے جھد ءِ منوگر اَنت کہ آ میان استمان ءِ باسک ڈیھاں من اتگ اَنت۔من ایوک ءَ یک راھبندے ءِ درگت ءَ گْوشگ لوٹ آں۔3 دسمبر 1992 ءَ میان استمانی اھدنامہ نمبر37/43 پاس کنگ بیتگ آئی ءِ رد ءَ جنگی زورگری، نوآبادیاتی زوراک، نوآبادیاتی ترام ءِ بگیری ءَ جھد کرت کن اَنت ءُ میان استمان وتی باسک ڈیھاں پابند کرت کنت کہ آ مھتر ھندی زوراکی،جنگی لشکر ءِ بگیری ءَ راجمستری،سیاسی ءُ سلاہ بندیں جھد ءَ بہ من ایت۔اے اھد نامہ ءِ پُژدر ءَ پلستین، انگولا،ساؤت اپریکا، موزنبیک ءِ زْرمبشت کمک کنگ بیتگ اَنت۔
مئے گْوستانکی دوستی چہ ما لوٹ کنت کہ دیم ءَ بہ یا ایں ءُ یکے دومی ءِ کوپگ بہ بہ ایں۔شما مھتر ھند اِت ءُ ما بےمھترھند چیر دستیں راج۔مارا مئےجُھد ءَ شمئے سیاسی ءُ کردانکی کمک لوٹ ایت۔مروچی مئے ھزاراں ورنا شھید کنگ بیتگ۔ھزاراں ورنا چیریں آزارجاھاں بند اَنت۔چوشیں روچے نیست کہ بلوچ سرڈگار ءِ سر ءَ آس ءُ ھون ءِ ھور مہ گْوار ایت۔
بلوچ رجی زْرمبشت سرپد بیت کہ چہ اوگانستان ءُ بلوچستان ءِ انیگیں تباھیں جاوراں درکپگ ءِ مستریں راہ چہ آجوئیں بلوچستان ءَ درکئیت۔مئے دراجیں سیمسر،دوستی ءِ وت ماں وتیں گْوستانک،ربیدگی بستار،مالی سیتانی وت ماں وت بندوکی اِنت کہ اے وتگڑیں پاکستان ءَ جتا کرتگ اَنت۔مئے آجوئی پاکستان ءَ سرین پروش کنت۔مئے آجوئی ءَ اوگانستان ءَ ھوار سرجمیں دمگ ءَ آشوبے چیست بیت۔بہ یا اِت مئےتوار جوڑ بہ بہ اِت ءُ دوستی ءِ ڈبو ءَ سرجم بہ کن اِت۔