ریڈیو زْرمبش بلوچی | ریڈیو زْرمبش بلوچی,Banuk-Karima-Baloch,Karima-Baloch

تمپ: کیچ ءِ ھند تمپ ءَ پاکستانی لشکر مردماں شھید بانک کریمہ ءِ مانش ءِ شر کنگ ءَ نہ ھلگ ءَ اِنت

زْرمبش اھوالکار ءِ رد ءَ کھول ءِ مردماں پہ شھید بانک کریمہ ءِ مانش ءِ شر کنگ ءَ سمنٹ، بلاک ءُ سامان لوٹائینتگ اَنت پاکستانی لشکر مردماں کار ءَ دارگ ءَ اِنت۔ پاکستانی لشکر ءَ شھید ءِ مانش ءِ بندوکیں مستری وتی بُنجل ءَ لوٹائیتگ ءُ بیھار داتگ کہ اگاں تو مانش ءِ شر کنگ ءِ جھد کرت تو آوار جنگ ءُ بیگواہ کنگ بہ ئِے، تئی زھگاں ھم تاوان دیگ بنت۔ پہ مانش ءِ شرکنگ ءِ بگیری ءَ پاکستانی لشکر ءَ مستری ءَ اَبید آئی ءِ کھول ءِ مردم ھم بیھار داتگ اَنت۔

بنشون ءِ رد ءَ چہ شھید بانک کریمہ ءِ شھیدی ءَ پد ھمک وھد ءَ مردماں جھد کرتگ کہ آئی ءِ گُڈی ءَ وابجاہ ءَ شر بہ کن اَنت ءُ پہ مانش ءِ دیوالے بہ بند اَنت بلے ھمک وھد ءَ پاکستانی لشکر مردمانی کار ءِ دیم ءَ اڑاند ودی کنگ ءَ اِنت ءُ کار ءَ دارگ ءَ اِنت۔ سے روچ ءَ پیش مردماں مانش ءِ شر کنگ ءِ سامان لوٹائینتگ اَنت ءُ مستری گوشتگ پاکستانی لشکر ءَ مستری بیھار داتگ ء چہ کار ءَ داشتگ۔

ھندی مردمے ءَ وتی نام پدر نہ کرتگ ءُ گوں ریڈیو زْرمبش ءِ اھوالکار ءَ رھوت کرتگ ءُ گوشتگ کہ پاکستانی لشکر ءَ شھید بانک کریمہ ءِ کھول بیھار داتگ کہ اگاں شما مانش شر کرت ءُ دیوال بست گڑا ما مانش ءِ ھواری ءَ درسیں گساں ٹکٹر ءُ بلڈوزر ءِ رد ءَ ڈیرین ایں۔ باند ءَ شھید کریمہ ءِ دومی سالروچ اِنت لشکر ءَ مردم پہ مانش ءِ شر کنگ ءَ مکن کرتگ اَنت۔

  بنشون: اھوالکار | اکس: اھوالکار