ریڈیو زْرمبش بلوچی | ریڈیو زْرمبش بلوچی,مھمد-ازیم

بلوچ راجی جنز چون بوتیں؟ | ندکار : مھمد ازیم

بلوچ راجی جنز چون بوتیں؟ | ندکار : مھمد ازیم

SEP

06
06 / 09 / 2020 نبشتانک 105

جھان ءِ ھمک چیردستیں راج پہ وتی زندمان ءَ دو وڑیں راہ گچین کنت۔ یکے سرجھلی اِنت کہ زورگریں دژمن ءِ چیردستی ءِ منگ ئیگ انت ءُ دومی راہ گلامی ءَ پٹ دیگ ئیگ اِنت۔ بزاں اے راہ ءَ گلامیں راج  پہ وتی راجی آجوئی ءُ ڈیھ ءِ وتواجھی ءَ دژمن ءِ بگیری ءَ راجی آشوب ءُ راجی جُنزے اڈ دنت۔ چوناھیگا راجی آجوئی ءِ دو وڑیں جنز بہ اَنت یکے ءَ ایمنی ئیں جنز ءِ نام ءَ زانگ بیت کہ انگریزی ءَ نان وائلینٹ موومنٹ گْوش اَنت ئِے ءُ دومی چیرجنگ کہ انگریزی ءَ گْوریلا وار ئِے گْوش انت۔ اے نبشتانک ءَ ما دوئیں جُنزانی بارو ءَ کسانیں درنگازی یے کن ایں۔


ایمنی ئیں جُنز: ماں اے جنز ءَ راجی سیاسی راھشون وتی گلامیں راج ءِ مردماں راجی آجوئی ءِ بارو ءَ سرپد کن اَنت ءُ پہ آشوب ءِ آرگ ءَ چاگِرد ءِ تہ ءَ آجوئی ءِ بلائیں زْرمبشتے ودی کن اَنت۔ چر ایشی ءَ راج ءِ تہ ءَ راجی آجوئی ءِ بستار ءُ سسایے ودی بیت۔ بلکیں راج ءِ تہ ءَ انچیں مارشت ودی بہ اَنت کہ راج وت زانت کہ ما گلام ایں ءُ مئے راجی مڈی چَہ مئے دست ءَ پلگ بوگ ءَ اَنت۔ ماں ایمنی جنز ءَ ھرچ روچ زورگر ءِ بگیر ءَ زھرشانی ءُ روانک کشگ بہ اَنت۔ راج ءِ سسائی راھشون، نودربر ءُ زانتکار زھرشانی ءُ شدکشیں زھرشانیاں نند اَنت ءُ راجی جُنز ءِ زرمبشت ءَ گیدی ءِ کنڈ کنڈ ءَ سر کن اَنت۔ کہ نی اے راج چَہ وتی راجی آجوئی ءَ پد نہ کنز ایت۔ چہ زھرشانی ءُ روانکاں دژمن ءِ زر ودینوکیں کارجاہ بند کنائینگ بہ اَںت ءُ دژمن ءِ بگیر ءَ یک راجداری اندوھے (پولیٹیکل انسٹیبیلیٹی یے) بیت چر ایشی ءَ دژمن ءَ راج ءِ زیردستی گران کپ ایت گڑا ھمے رنگ ءَ چیردستیں راج وتی بنکی ھک ءُ آجوئی گِرگ ءَ سوبین بیت۔


بلے المی نہ اِنت کہ ھرچ راج پہ وتی راجی آجوئی ءَ ایمنی ءِ جنز ءَ گچین بہ کنت۔ انچوش کہ ایمنی ئیں جنز ءِ وتی جتائیں ھمروانی یے ھست۔پمیشکا ھرچ راج پہ وتی ڈیھ ءِ وتواجھی ءُ راجی آجوئی ءَ ایمنی ئیں جنز ءَ گچین کرت نہ کنت۔ انچوش کہ ایمنی ئیں جنز ھما وھد ءَ سوبین بیت وھدے کہ تئی دژمنیں ڈیھ ءَ راستیں راجمستری ءُ راجداری یے بہ بیت۔ رسانکدر ئِے راستیں ھال ءُ اھوالاں بہ دنت۔ تئی جِند ءِ آبادی چہ تئی دژمن ءَ گیشتر یا برابر بہ بیت، تئی ندکار ءُ وانندگیں آبادی چہ دژمن ءَ کم مہ بیت۔ راجداری منہ ءَ تئی باسکی ھم باز یا جْوانیں کچے ءَ بہ بیت ءُ پد ءَ ھم تئی ھک دیگ مہ بہ اَنت۔ بزان تئی دژمن دودمانیں راجے بہ بیت ءُ تئی ایمنیں جنز ءِ مز ءَ تئی گپ دلگوش دیگ بہ بیت، تئی راج ءَ پہ راجی آجوئی ءَ زھرشانی ءُ روانک ءِ کشگ ءَ ھچ وڑیں تکانسری مہ بیت گڑا ایمنی جنز جْوانتر اِنت۔
بلے اگاں تئی دژمن بے دودمانیں(اَنسوّلائیزڈ) راجے ءُ دژمن ءِ ڈیھ ءِ واکداری ءَ لشکری زورانسری (ملیٹری ڈکڈیٹرشپ) اِنت۔چر ایشی ءَ زورگیں دژمن تئی ایمنی ئیں جنز ءِ مز ءَ تئی سر ءَ زورانسری ءُ کھر کنت، تئی ورنائیں نودربر ءُ سیاسی جھدکار آوار جنگ ءَ رند گار ءُ بیگواہ کنگ بہ اَنت۔ پد ءَ ماں زنداناں ھرچ وڑیں چابک ءُ لٹ شاپی ءَ رند آیانی جوناں  ماں ویرانیں جنگلاں دور دنت۔ یا یک گوریں مانشاں کل کنت۔ تئی لوگ ءُ میتگاں ماندار ایت ءُ تئی راجی دود ءُ ربیدگاں لگتمال کنت۔ تئی گْوھار ءُ براتاں تئی چمانی دیم ءَ کم منگہ کنت ءُ کش ایت۔ گڑا اے وڑیں دژمن ءِ بگیری ءَ ایمنی ئیں جنز راج ءِ بیرانی اِنت اے آسر ءَ ترا دگہ راہ ءُ توجیل نیست ابید چَہ چیرجنگ ءَ پمیشکا اے وڑیں جاوراں زیردستیں راجانی پوہ ءُ زانتکارییں سرکماش ءُ سروگان مدام چِیرجنگیں جُنز ءَ گچین کن اَنت۔ انچوش کہ بنگلہ دیش ،کردستان ءُ دگہ بازیں راجانی چیرجنگی جنز مئے دیم ءَ اَنت کہ اے وڑیں راجاں پہ وتی راجی آجوئی ءَ چیرجنگ گچین کرتگ۔


نی ما بلوچ راجی آجوئی ءِ جنز ءَ چمشانکے بہ دے این ءُ زان ایں کہ بلوچ راج ءَ چیا چیرجنگیں جنز گچینت۔ انچوش کہ ما زان ایں کہ 1971 ءَ وھدے کہ کہ پاکستان ءِ وتگڑیں دو راجی سسا ءَ پْروشتگ ءُ بنگلہ دیش ءِ آجوئی ءِ آسر ءَ پاکستان دو بھر ءَ پرشت۔ گڑا پاکستان ءِ واکداری بے دودمانیں پنجابیانی دست ءَ آتک چر ایشی ءَ پد پنجابی زوراک ءَ بلوچ راج ءِ سر ءَ ھرچ وڑیں زوراکی ءُ لگتمالی بندات کرت، توری بلوچی دود ءُ ربیدگ ءُ زبان ءِ ڈالچار کنگ ءِ ساز کتگیں پندلاں ما بہ چار ایں یا ورنائیں نودربر، سیاسی جھدکار، راجی راھشون، لچہ کار، کواس ءُ ندکارانی آوار جنگ، آیاں ماں زِنداناں لٹ شاپ کنگ ءُ تنگوئیں بچانی تیر سمب اتگیں جونانی دور دیگ بہ بیت یا بلوچانی لوگانی پٹ ءُ ھنڈ کنگ ءُ گساں آس دیگ بہ بیت، یا منگہ داریں گْوھارانی سر ءَ زورانسری کنگ ءُ براتانی سر ءَ ھرچ وڑیں لٹ شاپی ءُ تورشتانی آماچ کنگ ءُ رند ءَ کشگ ءِ اندوھاں ما گِند ایں کہ زورگریں دژمن ءَ بلوچ ءِ سر ءَ ھرچ وڑیں زوراکی کرتگ۔ پمیشکا پہ مئے راجی راھشوناں ابید چیرجنگ ءَ دگہ ھچ وڑیں گزینگ (آپشن) نیست اِنت۔ چیا کہ بلوچ راج ءَ ماں پاکستانی مھترھند ءَ ھچ برابری ءُ بستار نیست!!


چَہ اے زوراکی ءِ آسر ءَ بلوچ راج ءِ تہ ءَ ابرمی زھر ءُ کینگے گندگ ءَ آتک چر ایشی ءَ بلوچ چاگرد ءَ گلامی ءِ مارشت ودی بوت کہ ما بلوچ راج زوراکیں پنجابی ءِ گلام ایں۔


چوناھا گلامیں بلوچ راج وَ زانت کہ وھدے چیردستیں راجانی سر ءَ زوراکی بیت گڑا آجوئی لوٹوکیں راج ھمے زوراکی ءُ زھر ءَ دژمن ءِ بگیر ءَ وتی مستریں سِلاہ لیک ایت۔ پاکستان ءَ بلوچ راج ءِ سر ءَ انچیں بدیں جنگی ءُ لشکر کشی گوں بے روائیں زوراکیاں کرتگ اَنت کہ راج ءِ لوگ لوگ اے لشکر کشی ءِ بدسان اِنت۔ ھرچ بلوچ لوگ ءِ سْیادے یا کسے پاکستان ءِ لشکر ءَ شھید کرتگ۔چمیشکا مروچی تیوگیں بلوچ راج پاکستان ءِ سر ءَ زھر اِنت۔ اگاں ما گْوستگیں بلوچ چیرجنگاں بہ وان ایں گڑا ما سرپد بہ ایں کہ چَہ گْوستگیں راجی آجوئی ءِ چیرجنگیں جنزاں مروچیگیں ھستیں وھد ءِ چیرجنگیں جُنز ءَ  گیشتر  ردوم زرتگ ءُ مروچی سوبین اِنت۔ کہ ھمے جنز ءِ پد ءَ  زر کاری، گزرانک، لشکری تاوان ءُ واکداری ءِ رد ءَ دژمن ئِے سک ژند ءُ پند کرتگ۔ پمیشکا دژمن بلائیں ترسے ءِ آماچ اِنت انچوش کہ مروچی دژمن ءِ بگیری ءَ بلوچستان ءِ ھرچ میتگ ءَ راجی سرمچار ھست اَنت ءُ مُدام دژمن ءِ سر ءَ ھکلیں اُرش کن اَنت۔ پد ءَ دژمن بے وانک بیت ءُ شھید ھیات بلوچ ءِ داب ءَ بازیں بے میاریں بلوچاں شھید کنت۔ اے وڑیں ناھکیں کشت ءُ کوش اے پدر کنت کہ دژمن ءَ نی پْروش وارتگ ءُ اے وڑیں زوراکی راج ءِ تہ ءَ دژمن ءِ بگیری ءَ زھر ءُ کینگے ردین انت۔ گُڑا میتگ ءُ دمکاں گیشتر زھرشانی ءُ روانک کشگ بہ اَنت۔چہ ایشی ءَ راج ءِ چاگرد وتی راجی جنز ءِ بارو ءَ گیشتر سرپد ءُ آگاہ بیت۔ دژمن ءِ بگیری ءَ ابرمی راجی آشوب گیشتر تْرند بیت۔


بلوچی راجی چیرجنگیں جُنز سوبین بات ءُ بلوچ شالا آجو بہ بات اَنت۔