ریڈیو زْرمبش بلوچی | ریڈیو زْرمبش بلوچی

ماہ اگست:70 لشکری لشکر کشی،7کس شھید،113بیگواہ،سدانی کچ ءَ گس سوچگ بیتگ - بی این ایم

ماہ اگست:70 لشکری لشکر کشی،7کس شھید،113بیگواہ،سدانی کچ ءَ گس سوچگ بیتگ - بی این ایم

SEP

05
05 / 09 / 2020 بی این ایم 15

ماہ اگست:70 لشکری لشکر کشی،7کس شھید،113بیگواہ،سدانی کچ ءَ گس سوچگ بیتگ - بی این ایم


 5 ستمبر 2020 | زرمبش ھال


????بلوچ راجی زْرمبشت (بی این ایم) ءِ رسانکدری کارگشاد دل مراد ءَ اگست 2020 ءِ سرجمیں گزارش شنگ کُرتگ ءُ گْوشتگ:بلوچ راجی گْوستانک ءِ ھونواریں ماہ اگست اے سال ءَ ھم بلوچ راج ءِ ارواہ ءِ سر ءَ مزنیں نشانے ایرکُرت ءُ شُت۔اے ماہ ءَ سرجمیں بلوچستان ءَ بیست سالاں برجاھیں پاکستانی لشکر ءِ زوراکیانی تہ ءَ گیشی اتکگ۔ 70 ءَ گیش لشکرکشی ءُ بیڑاں 113 مردم بیگواہ کنگ بیتگ۔7 مردم شھید،سدانی کچ ءَ لوگ سوچگ بیتگ۔گچک ءَ 50 ءَ گیش جنین ءُ زھگ چہ کوھی دمگ ءَ دزگیرکنگ ءُ لشکری گداناں زوراکی ءِ نشانگ کنگ بیتگ۔پد ءَ لھتیں مردین ءُ جنین ناگیگیں جاوراں یلہ کنگ بیتگ۔
دل مراد ءَ گْوشتگ:اگست ءِ ماہ ءَ شھید بیتگیں مردمانی تہ ءَ کراچی زانشجاہ ءِ نودربر ھیات مرزا ءَ آپسر کیچ ءَ پاکستانی لشکر ءَ مات ءُ پت ءِ دیم ءَ شھید کُرت۔یک ورناھے دزگیر کنگ ءَ پد بندیگجاہ ءَ شھید کنگ ءُ آئی ءِ جون چگل دیگ بوت۔دو سرمچار گوں پاکستانی لشکر ءَ جنگ دیان ءَ شھید بوت اَنت۔یک سرمچارے کاروائی ءِ میان ءَ ھار ءِ برگ ءَ شھید بوت۔یک مردمے گوادر ءَ پاکستانی لشکریاں گاڑی سر ءَ لپاشت،وھدے کہ یک راجی جُھدکارے روکپتی بلوچستان ءَ آئی ایس آئی ءِ چریکاں شھید کُرت۔
آئی ءَ گْوشتگ:بلوچستان ءَ اگست مدام ھون ءُ ھونریچ بیتگ۔ھمےماہ ءَ پاکستان جوڑ کنگ بیتگ کہ نا ایوک ءَ بلوچ راج بلکیں پہ مردمگری ءَ شومک ءِ نادراھی یے جوڑ بیتگ۔چہ ایشی شیتانی ءُ زوراکیاں چوشیں روچے نیست کہ بلوچستان ءَ بلوچانی شرپ ننگ،جان ءُ مال ءُ گسانی سر ءَ پاکستانی لشکر اُرش مہ کنت۔
دل مراد ءَ گْوشتگ:اے ماہ ءَ پنجگور، آواران، واشک ءِ میانی دمگ گچک، مزن بند، جاؤ ءِ بازیں جاھاں ءُ مستونگ تباھی ءِ لشکرکشیانی زد ءَ بیتگ۔گچگ ءِ کوھی دمگ ءَ آبادیں ھزاراں گساں پاکستانی لشکر ءَ پنجاہ ءَ گیش جنین ءُ زھگ دزگیر کُرتگ ءُ گداناں بُرتگ۔لوھڑی،کلانچ، تاک ڈن، ٹوبہ ءَ ھوار بازیں جاھاں سدانی کچ ءَ گس سوچگ بیتگ۔پس ءُ مال لُٹ ءُ پُل کُرتگ اَنت۔زوراکی ءِ سر ءَ زوراکی کوھی دمگاں چہ کرناں آبادیں مردم توپک ءِ زور ءَ چہ دمگ ءَ درکُرتگ اَنت۔چمگانی آپ درچک ءُ دار زھر جتگ اَنت۔چہ ایشی ءَ بازیں کچے ءَ پس ءُ مال مُرتگ۔نی اے کھول لشکری گدانانی کش ءُ پھناتاں زندگی گْوازینگ ءَ لاچار اَنت۔
دل مراد ءَ گْوشتگ:جاؤ ءِ کوھی دمگ سورگر بازیں سالاں پاکستانی لشکر ءِ زوراکی ءِ آماچ اِنت۔اے ماہ ءَ سورگر ءِ بازیں جاھاں بمبگواریں بالگردانی تیرگواری ءُ زمینی لشکر ءِ تباھی کُرتگیں کارروائیانی زد ءَ بیتگ۔مردمانی گس سوتکگ اَنت ءُ بازیں مردم دزگیری ءَ پد بیگواہ کُرتگ اَنت۔وھدے کہ مستونگ ءِ بازیں جاھاں ھم پاکستانی لشکر ءَ زوراکی ءِ ھد توام کُرتگ۔
آئی ءَ گْوشتگ:گْوستگیں بازیں سالاں پاکستان مچی سزا ءِ کارشونی ءِ سر ءَ کار کنگ ءَ اِنت۔چہ ایشی ءَ مردمان ءَ زْرمبشت ءَ گوں بندوکی ءِ سر ءَ مچی نشانگ جوڑ کنگ بیگ ءَ اِنت۔اے ماہ ءَ ھم اندوھناکیں ندارگ دیم ءَ اتکگ،بلئے ایشی ءَ ابید ھم پاکستانی مھترھند ءَ چہ بلوچ راج ءِ دلاں پہ آجوئی زْرمبشت ءِ ھلاس کنگ ءَ بےسوب اِنت۔پمشکہ بازیں پندل سازگ ءَ اِنت۔ھمے درچ ءَ آواران، جاؤ، مند ءِ گیشتریں جاھاں پاکستانی لشکر ءَ بمبگواریں بالگردانی سر ءَ پنتاک دور داتگ ءُ مردم بیھار داتگ اَنت کہ پاکستانی لشکر ءِ گون ءَ کمک بہ کن اِت ءُ بلوچ سرمچارانی ٹِک ءُ نشاناں ءُ آیانی تر ءُ گرداں مار ءَ سرپدی بہ دیئت۔
دل مراد ءَ گْوشتگ:داں زمہ واریں جھانی ترامگیج پاکستان ءِ بگیری ءَ گامگیج مہ زور اَنت۔بلوچ راجی چکچینی ءِ تہ ءَ کمی نئیت۔بلوچستان ءَ چکچینی،مچی سزا ءَ چہ ودی بیتگیں مردمی جاور لوٹ کن اَنت کہ میان استمان ءَ ھوار مردمی اگبالانی ترامگیج دیم ءَ بیا اَنت ءُ وتی پرز ءَ پیلو بہ کن اَنت ءُ بلوچ راجی چکچینی ءَ گِر ءُ دار بہ کن اَنت۔