ریڈیو زْرمبش بلوچی | ریڈیو زْرمبش بلوچی

مردم وتی بیگواھیں مردمانی بابت ءَ گپ کنگ ءَ پرچا ترس اَنت ؟

مردم وتی بیگواھیں مردمانی بابت ءَ گپ کنگ ءَ پرچا ترس اَنت ؟

AUG

29
29 / 08 / 2021 نبشتانک 162

بلوچستان ءَ پاکستانی لشکر ءُ چیریں ترامگیجانی دست ءَ  مردمانی دزگیری ءَ پد بیگواہ کنگ ءِ تہ ءَ گیشی اتکگ بلے چہ ایشاں باز کم مردمانی ھال رسانکدر ءَ سر بیگ ءَ اَنت۔ برے برے انچیں مردم گوں ریڈیو زرمبش ءَ رھوت کنت ءُ وتی گزارش ءَ سر کنت کہ آھانی مردمانی بیگواھی ءَ سال پر گْوستگ اَنت۔ برے برے انچیں بیگواھیں مردمانی گزارش مارا سر کنگ بنت کہ آھاں دہ یاں پازدہ روچ اِنت بیگواہ کنگ بیتگ اَنت۔ برے برے لھتیں بیگواھیں مردمانی کھول گوں زرمبش ءَ رھوت کن اَنت ءُ گوش اَنت کہ مئے مردم دوشی  یا زی پاکستانی لشکر ءَ دزگیر یا آوار جتگ ءُ بیگواہ کرتگ، بلے شما اے ھال ءَ دو روچ ءَ پد شنگ بہ کن اِت۔ وھدے ما ھمے گار ءُ بیگواھیں مردمانی کھولاں جست کن ایں مارا جتا جتائیں گپ دیم ءَ کیت ءُ ھر مردم ءَ جست کن ایں آ ترس ءِ آماچ اِنت۔ چوناھی ءَ بلوچستان ءِ گیشتریں دمگ کوہ ءُ کوچگ اَنت یکے دامگ مردمانی دزرس ءَ نہ اِنت مستریں ترس سرکار ءِ جند اِنت۔ ھما مردم کہ مارا دہ پازدہ روچ ءَ پد رھوت کن اَنت وتی گزارش ءَ سر کن اَنت ما آمردماں جست کن ایں شما پرچہ وتی بیگواھیں مردمانی گزارش پہ وھد نہ داتگ ، چہ اے جُست ءَ دو گپ دیم ءَ کیت۔یک گپے ھمیش اِنت ما چہ دامگ ءَ دور بیتگیں پمیشکا گزارش دات نہ کرتگ۔ دومی گپ اے دیم ءَ کیت کہ مارا ھندی میر ءُ مستراں دروگیں دلبڈی داتگ کہ ما پہ شمئے مردم ءَ سپارش کن ایں ، زوت یل کنگ بنت، شما دیم ءَ گوں کس ءَ گپ مہ کن اِت شمئے مردمانی کیس ھراب بنت ءُ یل کنگ نہ بنت۔ بس ھمے گپ ءَ گوش اَنت کہ سرکار آھاں کمے جست ءُ پد کنت،  رند ءَ یل کنگ بنت۔ وھدے ما ھما مردماں جُست کن ایں کہ آھانی مردم دوشی یا زیک پاکستانی لشکر  ءُ چیریں ترامگیجانی کارمندانی دست ءَ چست کنگ بیتگ۔ ما آھاں گوش ایں کہ شمئے مردم بیگواہ کنگ بیتگ اَنت ءُ شما گزارش کنگ ءَ چی ءَ ترس اِت؟ آھانی گپ ھمیش بیت کہ ما تنگ کنگ بہ ایں مارا ھمے گپ گوشگ بیت کہ اگاں شمارا گوں آجوئی لوٹوکیں ( مردمی اگبالانی پد جنوکاں) ھال نیست گڑا اے ھال چہ کج ءَ در آتک؟ مارا تنگ کنگ بیت کہ الم ءَ شمارا گوں آجوئی لوٹوکیں گلاں ھال ھست، بلکیں یکیں کھول نہ درسیں میتگ ءِ مردم آئی ءِ زوراکی ءِ نشانگ کنگ بنت۔ برے برے مئے مردم بیگواہ کنگ بنت، چہ پاکستانی لشکر ءِ دست ءَ آزار دیگ ءَ پد دو یا سے روچ ءَ یل کنگ بنت ما پمیشکا کمے اوپار کن ایں۔ گیشتریں مردمانی بیگواھی ءِ ھال ءَ دیم ءَ نیار ایں، مردمانی یک ءُ دو روچ ءِ بیگواھی ءُ آزار دیگ مئے میتگاں رواج گپتگ۔ مئے میتگانی تہ ءَ مردیں زات دائم پاکستانی لشکر ءِ بُنجل ءُ پانگساں لوٹائینگ ءُ یک ءُ دو روچ ءِ آزار دیگ ءَ پد یل کنگ بنت۔ زھگ ءُ جنین ھر لشکر کشی ءَ پاکستانی لشکر ءِ دست ءَ زاہ ءُ بد کنگ، لٹ دیگ بنت۔ برے برے مارا مردم رھوت کن اَنت کہ مئے مردماں سالے یا دو سے سال بیت بیگواہ اَنت۔ شما مئے نام ءَ مہ یار اِت ءُ مئے مردمانی بیگواھی ءِ ھبر ءَ دیم ءَ بیار اِت۔ ما دائم مردمان ءَ ھمے گپ ءَ الّم گْوشیں کہ بےتوار بیگ ءَ ھچ نپ نیست پہ وتی مردماں وت توار چست بہ کن اِت۔  بیگواھیں بلوچانی گِدان ءَ ( وائس پار بلوچ مسنگ پرسن)  کیس ءَ یاداشت کن اِت یاں گوں مردمی اگبالانی ترامگیجاں رھوت الم بہ کن اِت۔ مارا اے گپ ءِ پسو دو رنگ ءَ گوشگ بیت، اول پاکستان سرکار ءِ زوراکی ءِ تُرس، دومی مردمانی نیزگاری ءَ مردم وائس پار بلوچ مسنگ پرسن ءَ روگ، نشت ءُ توار چست کرت نہ کن اَنت۔ ریڈیو زرمبش یک رندے پد ءَ وتی گوشدارکاں گوش ایت کہ وتی مردمانی بیگواھی ءَ بےتوار مہ بہ اِت، شمے توار ءِ چست کنگ ءَ شمے مردمانی جان رک اِت کنت۔ اگاں کسے بیگواھیں بلوچانی گِدان ءَ ( وائس پار بلوچ مسنگ پرسن ) ءَ سربوت نہ کنت۔ آ لوٹ ایت کہ پہ مئے بیگواھیں مردماں توار چست کنگ بہ بیت۔ گڑا آ وتی مردمانی بیگواھی ءِ روچ، بیگواھی ءِ جاہ، بیگواہ کنوک پاکستانی لشکر یا چیریں ترامگیجانی مردم بیتگ اَنت، وتی سرجمیں ھالاں تامُربندے ءَ پہ مارا دیم دات کنت۔ ما مردماں ھمے گوشگ لوٹ ایں کہ پہ وتی بیگواھیں مردماں توار چست بہ کن اِت۔