ریڈیو زْرمبش بلوچی | ریڈیو زْرمبش بلوچی

شش ماہ ءِ تہ ءَ روس ءِ 46 ھزار ءَ گیش لشکری کارمند کُشتگ - یوکرین

شش ماہ ءِ تہ ءَ روس ءِ 46 ھزار ءَ گیش لشکری کارمند کُشتگ - یوکرین

AUG

28
28 / 08 / 2022 جھان 79

کیِپ: یوکرینی لشکر ءِ سروک ءَ وتی درشانے ءَ گوشتگ کہ شش ماہ ءَ گیشیں برجاھیں جنگ ءَ روسی لشکر ءِ 46 ھزار ءَ گیش کارمند کشگ بیتگ. یوکرینی لشکر ءِ سروک ءَ چاگردی رسانکدر پیس بُک ءَ وتی درشانے ءَ گوشتگ کہ روس ءُ یوکرین ءِ برجاھیں جنگ ءَ داں اے وھد ءَ روس ءِ 46 ھزار ءُ 550 لشکری کارمند مُرتگ، اے در شان ءِ رِد ءَ روس ءِ 250 لشکری کارمند گوستگیں آدینگ بزاں 26 اگست ءَ کُشگ بیتگ. آئی ءَ گوشتگ کہ اے جنگ ءِ تہ ءَ یوکرین ءِ 9 ھزار لشکری کارمند مُرتگ ءُ اے ھساب ءِ رِد ءَ ما یک یوکرینی لشکری کارمندے ءِ بدل ءَ 5 روسی لشکر ءِ کارمند کُشتگ. یوکرین ءِ لشکر ءِ گوشگ انت کہ اے جنگ ءَ چہ 46 ھزار ءُ 550 لشکری کارمندانی تاوان ءَ ابید روسی لشکر ءِ 1940 جنگی ٹینک، 1045 آرٹلری سسٹم، 836 ڈران ءُ 3165 لشکری گاڑی ھم تباہ بیتگ اَنت. یوکرینی لشکر ءِ اے ھساب دنیگت جھانی رسانکدراں راست نہ کرتگ بلے برتانیا ءِ دیمپانی وزیر ویلیس ءَ وتی یک گلگدارے ءَ گوشتگ کہ روس ءُ یوکرین ءِ جنگ ءَ اگاں روسی لشکر ءِ مُرتگیں ءُ تتکگیں کارمنداں ھوار بہ کن ئے گڑا آھانی کساس 80 ھزار بیت. یو این ءِ رِد ءَ اے جنگ ءِ تہ ءَ داں انیگ ءَ یوکرینی 5587 لس مردم کُشگ بیتگ. بنشون: جھانی رسانکدر | اکس: دامگ