ریڈیو زْرمبش بلوچی | ریڈیو زْرمبش بلوچی

وائس پار مسنگ پرسنز آپ سند ءَ انوگیں زور بیگواھیانی پژدر ءَ وتی شنگ کرتگیں درشان ءَ گوشتگ کہ 30 اگست ءَ زوربیگواھیں مردمانی میان استمانی روچ ءَ تیوگیں سند ءَ ترندیں زھرشانیاں اَبید پاکستانی لشکر ءِ لشکرکشی برجاہ اِنت۔ آئی ءَ گوشتگ کہ گوستگیں روچ ءَ پاکستانی چیریں ادارہ ءُ پولیس ءَ سند زانشتجاہ ءِ کانود بھرگ ءِ نودربر ساجن ملوکھانی ھیدر آباد ءَ وتی میتگ ءَ روگ ءِ وھد ءَ آوار جنگ ءَ پد بیگواہ کرتگ۔ چہ ایشی ءَ پیش اے کھول ءِ دو مردم راول ملوکھانی ءُ نئیم ملوکھانی ءَ کازی اھمد نوابشاہ ءُ ٹنڈو آدم ءَ آوار جتگ ءُ بیگواہ کرتگ۔ آئی ءَ گوشتگ کہ پاکستانی لشکر سند ءَ مردمی ھکاں لگتمال کنگ ءُ زوریں بیگواھی ءَ روچ پہ روچ تیز کنگ ءَ اِنت۔ اے درگت ءَ ما ایمنسٹی انٹرنیشنل، اکوام متھدہ ءُ درسیں میان استمانی ادارھانی پورمانی تہ ءَ وتی کیس ءَ ایر کن ایں ءُ اے جیڑہ ءِ بارو ءَ میان استمانی ادارھانی گون ءَ یک رندے پد ءَ لوٹ کن ایں کہ آ سند ءُ بلوچستان ءَ پاکستانی لشکر ءِ رستری کارپد ءُ مردمی ھکانی لگتمال کنگ ءَ دلگوش ءَ گور بہ کن اَنت ءُ میان استمان زور بد اَنت۔ آئی ءَ گوشتگ کہ دومی نیمگ ءَ وائس پار مسنگ پرسن آپ سند انوگیں زوریں بیگواھیانی درگت ءَ تیوگیں سند ءَ وتی زھرشانیانی تیز کنگ ءِ جار ءَ جنت۔ بنشون: درشان / اکس: وی ایم پی