ریڈیو زْرمبش بلوچی | ریڈیو زْرمبش بلوچی

شال: پہ زور بیگواھیں مردمانی آجوئی ءُ شھیداں برجاھیں شدکشیں زھرشانی گدان ءَ 5060 روچ سرجم بیتگ۔ سے شمبے ءِ روچ ءَ چہ شال ءَ سیاسی ءُ چاگردی کارکن ابرار، وھاب، رھیم ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ گوں مردماں تران کنان ءَ وی وی ایم پی ءِ کمک سرکماش ماما کدیر گوشتگ کہ گوستانک ءِ تہ ءَ ھما مردم اَبدمان بنت کہ آ پہ وت ءَ نہ بلکیں پہ آدگہ مردماں جھد کن اَنت، پہ پدریچ ءِ وشالی ءَ چہ وتی زندگی ءَ سر گوز اَنت۔ آئی ءَ گوشتگ کہ بلوچستان ءِ جاور روچ پہ رو گنتر بوان اَنت، بلوچیں مات وتی زھگاں پہ وانگ ءَ روگ ءَ ڈن ءَ در کپگ ءَ نہ ھل اَنت، آیان ءَ ھمے تُرس اِنت کہ چوش مہ بیت مئے زھگ زور بیگواہ کنگ بہ بنت یا درکانودی کشگ مہ بنت۔ ماما کدیر گوشتگ کہ بلوچ ورنا شھید کنگ ءُ آیانی ژانگولیں جون گاڑیانی پشت ءَ بندگ ءُ گراں کنگ بنت۔ ھیات ءِ وڑیں ورنا ءَ آئی مات ءُ پت ءِ دیم ءَ لشکر آئی ءِ دل بند ءَ ھژدہ تیر گوار ایت ءُ ناھک ءَ شھید کنت۔ آئی ءَ گوشتگ کہ بلوچ مات وتی زھگاں پہ ریاست ءِ زوراکیانی آماچ کنگ ءَ نہ رودین اَنت، بلکیں واھشت ھمیش اِنت کہ مئے زھگ جْوانیں زندمانے بہ گواز این اَنت۔ ماما کدیر گُڈی ءَ گوں میان استمانی مردمی اگبالانی گلانی گون ءَ لوٹ کرتگ ءُ گوشتگ کہ آ بلوچستان ءَ ریاست ءِ زوراکیاں لشکرکشی ءُ زوریں بیگواھی ءِ گِر ءُ دار کنگ ءَ وتی کرد ءَ پیلو بہ کن اَنت۔ بنشون: درشان | اکس: ماما کدیر