ریڈیو زْرمبش بلوچی | ریڈیو زْرمبش بلوچی

پاکستانی لشکر بلوچستان ءَ چہ بازیں بنّامی ءَ پد نوں سی ٹی ڈی ءَ دیم ءَ آرگ ءَ اِنت۔ ماما کدیر

پاکستانی لشکر بلوچستان ءَ چہ بازیں بنّامی ءَ پد نوں سی ٹی ڈی ءَ دیم ءَ آرگ ءَ اِنت۔ ماما کدیر

MAR

26

شال: پہ زور بیگواھیں مردم ءُ شھیداں برجاھیں شدکشیں زھرشانی گدان ءَ 4994 روچ سرجم بیتگ۔ یکشمبے ءِ روچ ءَ چہ پسنی ءُ جتائیں ھنداں سیاسی ءُ چاگردی کارکن سلمان، سئید سلمان، یاسر، راشد ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ نوک آبادیں زورگپتی ءِ نوک آبادکاریں لشکر دست ھالیگیں مردماں مدام مچی زوراکی ءِ نشانگ کنگ ءَ اِنت۔ زوراکانی کار انت پہ نزورینانی توار ءِ گُٹگیر کنگ ءَ زوراکی ءِ دُرسیں سیمسراں گْواز کنت۔ ماما کدیر ءِ گوشگ اِنت کہ گْوَستگیں روچاں دو بلوچ پسگ ءِ سر ءَ ناھکیں کیس جنگ ءُ سزا دیگ بیتگ اَنت ھمے ٹاپار جنگ بیتگ کہ سلاہ بندیں گَلے ءِ باسک اَنت ءُ سی ٹی ڈ ءِ بندیگ اَنت اے تچکیں دروگے۔ ساکب ءُ پرھاد گْوَستگیں سال ءَ پاکستانی لشکر ءَ زور بیگواہ کرتگ ءُ آیانی دزگیری گْوَستگیں ماہ ءَ پدر کنگ بیتگ۔ آئی ءَ گوشتگ کہ پاکستانی لشکر بلوچستان ءَ گوں وتی ناشریں زوراکیاں پد ءُ چہ بازیں بنّامی ءَ نوں سی ٹی ڈی ءَ دیم ءَ آرگ ءَ اِنت۔ پاکستانی چیریں ادارہ سی ٹی ڈی ءَ دیم ءَ آرگ ءُ کارمرز کنگ ءَ اِنت دانکہ مردم چہ پاکستانی لشکر ءِ زوراکیاں بے ھال بہ بنت ءُ اے زوراکیاں سی ٹی ڈی ءِ کاروائی سرپد بہ بنت۔ بنشون: درشان | اکس: ماما کدیر