ریڈیو زْرمبش بلوچی | ریڈیو زْرمبش بلوچی

بلوچستان ءَ زورگریں ریاست پہ وتی زورگری ءِ مھکم کنگ ءَ جنگل ءِ کانود ءَ برجاہ دارگ ءَ اِنت- ماما کدیر

بلوچستان ءَ زورگریں ریاست پہ وتی زورگری ءِ مھکم کنگ ءَ جنگل ءِ کانود ءَ برجاہ دارگ ءَ اِنت- ماما کدیر

AUG

25
25 / 08 / 2022 وی بی ایم پی 84

شال: بیگواھیں بلوچانی توار ( وی بی ایم پی ) ءِ نیمگ ءَ پہ زورانسری بیگواھیں مردم ءُ شھیداں برجاھیں زھرشانی گدان ءَ 4740 روچ سرجم بیتگ۔ پنچ شمبے ءِ روچ ءَ گیشیں ھورانی سوب ءَ گدان ءَ بازیں جنجالانی دیمانی اِنت- بیگواھیں بلوچانی توار ( وی بی ایم پی ) ءِ کمک سرکماش ماما کدیر ءَ رسانکدر ءَ وتی شنگ کرتگیں درشان ءَ گوشتگ کہ گوستگیں شپ ءَ پاکستانی لشکر ءَ مستونگ ءَ زوراکی ءِ سیمسر گواز کرتگ- آیانی رد ءَ وتگڑیں لشکر بنّامیں سی ٹی ڈی ءَ گوستگیں شپ ءَ مستونگ ءِ پڑنگ آباد ءَ کلی شادی ھان ءَ گساں بیڑ برتگ تیر ءُ بمبگواری کرتگ دو ورنا سلاہ الدین ءُ سلمان شھید کرتگ اَنت ءُ ھشت مردم درکانودی آوارجتگ- آیانی تہ ءَ مستونگ وانشجاہ ءِ پروپیسر سالہ مھمد شاد ءُ ڈسٹرکٹ بار ایسوسی ایشن ءِ کھلانیں کمک سرکماش اتاء اللہ ایڈوکیٹ ھوار اَنت- ماما کدیر گوشتگ کہ پاکستانی لشکر ءِ دست ءَ دروگیں میڑ ءَ بے میاریں مردمانی کوش ءِ بگیری ءَ ما پیسر ءَ زھرشانی کنگ ءَ ایں – اَبید مئے گپانی گوش دارگ ءُ زوراکی ءِ گر ءُ دار کنگ ءَ زورگریں لشکر ءِ نیمگ ءَ گسانی سر ءَ بیڑ برگ بلوچانی چادر ءُ چار دیوالی ءِ لپاشگ، گسانی سر ءَ تیر ءُ بمبگواری کنگ ءُ بے میاریں ورنایانی شھید کنگ ءَ اِنت- پیر ءُ کماشیں شھریاں گون ٹپ ءُ ٹوریں جاوراں آوار جنگ ءَ اِنت- بلوچستان ءَ زورگریں ریاست پہ وتی زورگری ءِ مھکم کنگ ءَ جنگل ءِ کانود ءَ برجاہ دارگ ءَ اِنت- پاکستانی لشکر رھبند ءُ کانود ءَ مان نیاریت ءُ وتی زوراکی ءَ برجاہ دارگ ءَ اِنت- سانمندیں کھول وھدے دیم ءَ کاینت ءُ توار چست کن اَنت گڑا ریاستی ادارہ اھوالکاراں بیھار دے اَنت ءُ آیانی توار ءَ دارگ لوٹ اَنت- وھدے کہ آ پہ زھرشانی کنگ ءَ لاچار بنت ءُ در کاینت گڑا ریاست لس شھریانی رد ءَ آیاں دلسیاہ کنت- ماما کدیر گوشتگ کہ ما گوں ڈیھ ءُ میان استمانی مردمی اگبالانی ادارھاں دزبندی کن آں کہ مستونگ ءَ ریاست ءِ زوراکی ءُ ناشرکاریانی سر ءَ ھیال ءَ گور بہ کن اَنت، کشندھیں لشکر ءِ بگیری ءَ توار چست بہ کن اَنت ءُ بلوچانی کوش ءِ جُست ءَ بہ کن اَنت – بنشون: درشان / اکس: ماما کدیر