ریڈیو زْرمبش بلوچی | ریڈیو زْرمبش بلوچی

بلوچستان ءَ مردمی اگبالانی لپاشگ ءِ تہ ءَ روچ پہ روچ ءَ تیزی پیداک اِنت۔ ماما کدیر

بلوچستان ءَ مردمی اگبالانی لپاشگ ءِ تہ ءَ روچ پہ روچ ءَ تیزی پیداک اِنت۔ ماما کدیر

JAN

25

کراچی: بیگواھیں بلوچانی توار ( وی بی ایم پی ) ءِ نیمگ ءَ پہ زور بیگواھیں مردم ءُ شھیداں برجاھیں زھرشانی گدان ءَ 4932 روچ سرجم بیتگ۔ چارشمبے ءِ روچ ءَ چہ ھب چوکی ءَ سْیاسی ءُ چاگری کارکن گپور ءُ بیبرگ ءَ ھوار دگہ باز جنین پہ ھمدردی درشان کنگ ءَ گندان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ مردم ءِ زندگی ءَ مول مراد بہ بیت، پہ مول ءِ پیلو کنگ ءَ اے جھان ءِ تہ ءَ بے کَچ ءَ مردم ودی بیتگ اَنت۔ یک روچے ھمک مردم مرگ ءِ پنجگاں کپ ایت، بلے آیانی تہ ءَ گرانبھائیں مردم ھما اَنت کہ پہ دومی ءَ وتی زندگیاں ندر کن اَنت۔ آ پہ ھما اوست ءَ وت ءَ ندر کن اَنت کہ مرگ آیانی زندمان ءِ لوٹاں پیلو کنت اچمن ءَ پد ایشی ءِ مُز منی آھوکیں پدریچ ءَ رسیت۔ آئی ءَ گوشتگ کہ ھمے وڑ ءَ دیمونیانی سر ءَ چمشانک دیگ ءَ ھمے گندگ بیت بلوچ سرڈگار ءَ ھزارانی کَچ ءَ شھید دست کپ ایت کہ آیاں وتی زندگی پہ ماتیں سرڈگار ءِ پھازدادی ءَ ببا داتگ ءُ وتی مول ءَ سوبین بیتگ اَنت۔ بلوچ ءِ ھزارانی کَچ ءَ پیر ءُ ورنا، زھگ ءُ جنیناں شھیدی ءِ گرانبھائیں نام کٹ اِتگ۔ آیانی تہ ءَ چہ ھژدہ سال ءَ بگر داں ھشتاد سالی مردم ھوار اَنت۔ ماما کدیر گوشتگ کہ بلوچستان ءَ مردمی اگبالانی لپاشگ ءِ تہ ءَ روچ پہ روچ ءَ تیزی پیداک اِنت۔ زوریں بیگواھی ءُ ژانگولیں جونانی کپگ کم بیگ ءَ اَبید روچ پہ روچ گیش بیگ ءَ اِنت۔ زوربیگواھیں مردمانی کھول مدام بیھار دیگ بیگ ءَ اَنت۔ آئی ءَ گوشتگ کہ بلوچستان ءَ پاکستانی لشکر مدام لشکرکشی کنگ ءَ اِنت۔ چہ یک دھکے ءَ برجاھیں پُرایمنیں جھد ءَ مردمانی تہ ءَ سرپدی آورتگ زور بیگواھیں مردمانی کھول پہ وتی آزیزانی سلامتی آجوئی ءَ جھد کنگ ءَ اَنت۔ بنشون: درشان | اکس: ماما کدیر