ریڈیو زْرمبش بلوچی | ریڈیو زْرمبش بلوچی

منی زھگ ءَ دراجکشیں وھدے بیت کہ پاکستان ءِ چیریں آزار جاھاں بندیگ اِنت۔ زاکر مجید ءِ مات

منی زھگ ءَ دراجکشیں وھدے بیت کہ پاکستان ءِ چیریں آزار جاھاں بندیگ اِنت۔ زاکر مجید ءِ مات

NOV

22

شال: بیگواھیں بلوچانی توار ( وی بی ایم پی) ءِ پہ زور بیگوھیں مردم ءُ شھیداں برجاھیں زھرشانی گدان ءَ 4868 روچ سرجم بیتگ۔ مرچی وی بی ایم پی ءِ سرکماش نسراللہ، کمک سرکماش ماما کدیر، زور بیگواھیں نودربر سروک زاکر مجید ءِ مات ءُ سئید اھمد ءِ مات وی بی ایم پی ءِ گدان ءَ نندوک بیتگ اَنت۔ مرچی سے شمبے روچ ءَ بی ایس او ءِ سرکماش زبیر ءَ ھوار آدگہ مردم پہ ھمدردی درشان کنگ ءَ گدان ءَ آتکگ اَنت۔ زور بیگواھیں بلوچ نودربر سروک زاکر مجید ءِ مات ءَ تران کرتگ ءُ گوشتگ کہ منی زھگ ءَ دراجکشیں وھدے بیت کہ پاکستان ءِ چیریں آزار جاھاں بندیگ اِنت۔ آئی ءَ گوشتگ کہ ما چہ سیزدہ سالاں کراچی، شال ءُ اسلام آباد ءَ مدام دگانی سر ءَ زھرشانی کنگ ءَ ایں بلے انگت ءَ ریاست منی زھگ ءَ دیم ءَ آرگ ءَ نہ اِنت۔ زاکر مجید ءِ مات ءَ گوشتگ کہ اکوام متھدہ پہ زور بیگواھی ءِ بگیری ءَ توار چست بہ کنت دانکہ بلوچستان ءَ زور بیگواھی گرّ ءُ دار کنگ بہ بیت۔ وی بی ایم پی ءِ کمک سرکماش ماما کدیر گوں زور بیگواھیں مردمانی کھولاں لوٹ کرتگ ءُ گوشتگ کہ درسیں مردم زوتاں چہ زوتاں وتی زور بیگواھیں مردمانی کیساں بْیار اَنت ءُ جم بہ کنت ما کیساں سرجم کن ایں ءُ زور بیگواھیں مردمانی کمیشن ءَ سر کن ایں۔ آئی ءَ گوشتگ کہ میان استمانی مردمی اگبالانی دارہ بلوچستان ءَ ریاست ءِ زور بیگواھی ءِ سر ءَ توار چست بہ کن اَنت ءُ دانکہ بلوچستان چہ مردمگری ءِ تباھی ءَ دارگ بہ بنت۔ بنشون: درشان | اکس: ماما کدیر