ریڈیو زْرمبش بلوچی | ریڈیو زْرمبش بلوچی

شال: بیگواھیں بلوچانی توار ( وی بی ایم پی ) ءِ نیمگ ءَ پہ زورانسری بیگواھیں مردم ءُ شھیداں برجاھیں زھرشانی گدان ءَ 4767 روچ سرجم بیتگ۔ چارشمبے ءِ روچ ءَ چہ نوشکے ءَ سْیاسی ءُ چاردی کارکن امیر مھمد، داد مھمد ءُ آدگہ مردم مرد ءُ جنین پہ ھمدردی درشان کنگ ءَ گدان ءَ آتکگ اَنت۔ بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ ھمے وڑ ءَ زورانسری بیگواھیں مردمانی آجوئی ءِ جھد مھکم ءُ تیز بیگ ءَ اِنت ھمے وڑ ءَ ریاست وتی ناھکیں زوراکیانی تہ ءَ تیزی آرگ ءَ اِنت۔ چہ ھپتاد ءُ سے سالاں زورگر ءِ بگیری ءَ برجاھیں جھد ءِ گِس گِس ءَ سر کنگ ءِ بیر ءَ ریاست ءِ نیمگ ءَ ھزارانی کَچ ءَ سْیاسی کارکن ءُ سروک زورانسری بیگواہ ءُ شھید کنگ بیتگ اَنت اے درچ انگت برجاہ اِنت۔ ھزارانی کچ ءَ دوزواہ ریاست ءِ آزارجاھاں ناھکیں زوراکیانی دیمپان اِنت۔ آئی ءَ گوشتگ کہ ھزارانی کَچ ءَ بلوچ کارکنانی گس لُٹ ءُ پُل کنگ ءِ ھواری ءَ سوچگ بیتگ اَنت، جنین ءُ زھگ ھم زوراکیانی دیمپان کنگ بیتگ اَنت وی بی ایم پی ءِ کِر ءَ اے درسانی یاداشت ھست۔ بلے چہ ریاست ءِ نیمگ ءَ بیوکیں زوراکیانی تہ ءَ ھچ وڑیں کمی نہ یتکگ ءُ آ پہ وتی زورگپتی ءِ برجاہ دارگ ءَ بلوچ راج ءِ لڈینگ ءُ درد پہ در کنگ ءِ تہ ءَ تیزی آرگ ءَ اِنت۔ چہ ریاست ءِ نیمگ ءَ درسیں زوراکیانی گندگ ءَ پد ھم بلوچ سروک ءُ کارکنانی جھد ءِ تہ ءِ کمی نہ یتکگ۔ ماما کدیر گوشتگ کہ مردماں چہ اَبید گلانی مھکم کنوک ءُ ادارھانی جوڑ کنوکیں زمہ وار بلوچ راج ءِ دیم ءَ اَنت۔ ریاست ءِ زورانسری بیگواھی ءُ شھید کنگ ءِ تہ ءِ روچ پہ روچ تیزی پیداک اِنت۔ اے ناھکیں زوراکی زورگپت ءُ ایردست ءِ میان ءَ دودے جوڑ بیتگ۔ پہ بلوچی ءِ نام ءِ بٹاک جنوک مرچی ھم پارلیمنٹ ءَ نشتگ اَنت ءُ ریاست ءِ زورگپتی ءِ بھر اَنت۔ بلوچ ءِ ایردستی ھمنچو دراجکش بہ بیت مات ءُ گھار ریاست ءِ دست ءَ گیش زوراکی ءِ آماچ بنت۔ ماما کدیر گوشتگ کہ بلوچ راج ءَ گوں جْوانمردی ءَ وتی پُرایمنیں جھد شریں وڑے ءَ برجاہ داشتگ۔ پہ ھمک بھرگاں سْیادی داروکیں مردماں ھژدری اِنت کہ آ پہ وتی لَج ءُ ننگ ءِ رکینگ ءُ زورانسری بیگواھیں مردمانی آجوئی ءَ دُژمن درسیں پندلاں سرپد بہ بنت ءُ پُر ایمنیں جھد ءِ تہ ءَ جْوانیں کردے پیلو بہ کن اَنت نیکہ چہ دُژمن ءِ پندلاں رد بہ کپ اَنت۔ بنشون: درشان | اکس: ماما کدیر