ریڈیو زْرمبش بلوچی | ریڈیو زْرمبش بلوچی

شال: بیگواھیں بلوچانی توار ( وی بی ایم پی ) ءِ نیمگ ءَ پہ زورانسری بیگواھیں مردم ءُ شھیداں برجاھیں زھرشانی گدان ءَ 4766 روچ سرجم بیتگ۔ سے شمبے ءِ روچ ءَ بی ایس او ءِ پیشگیں سرکماش مھیم ھان، چہ نوشکے ءَ زورانسری بیگواھیں نسیب اللہ بادینی ءِ کھول ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ بے میاریں شھری، نودربر، سْیاسی کارکن ءُ سْیاسی سروکانی نشانگ کنگ برجاہ اِنت۔ ھما کہ گوں زورانسری بیگواھیں مردمانی کھولانی ھمدرد ءُ دوزواہ بیتگ اَنت آ ھم زوراکی ءِ نشانگ کنگ بیتگ اَنت۔ پاکستانی لشکر ءَ ھزارانی کَچ ءَ مردم آوار جنگ ءَ پد بیگواہ کرتگ کہ آیانی تہ ءَ زھگ ءُ جنین ھوار اَنت۔ ھزارانی کچ ءَ زورانسری بیگواھیں مردمانی تیرسپتیں جون بلوچستان ءِ جتاھیں جاھاں جنگلاں دور دیگ بیتگ اَنت۔ پاکستان ءِ درسیں ادارہ رسانکدر ءُ پارلیمنٹ پاکستانی لشکر ءُ چیریں ادارھانی کمکار اَنت۔ آ تچکی ءَ بلوچ راج ءِ دُژمنی بستار ءَ گندگ بیگ ءَ اَنت۔ ماما کدیر گوشتگ کہ پاکستان ءِ پارلیمنٹ، آمیدگس ءُ جھان ءِ درسیں گَل ءُ میان استمان ءِ بے تواری پاکستانی لشکر ءَ پہ ناھکیں زورانسری بیگواھی ءَ گیش کمک کنگ ءَ اَنت۔ ھزارانی کَچ ءَ بلوچ پاکستان ءِ چیریں ادارھانی آزار جاھاں زوراکیانی دیمپان اَنت۔ پاکستانی لشکر چہ شرپمندیں جھان ءَ پہ وتی میارباریانی چیر دیگ ءَ جتاھیں ھیلہ سازگ ءَ اِنت۔ اے ھبر راستے بلوچ بیگواہ نہ اَنت پاکستانی لشکر ءُ چیریں ادارھانی آزار جاھاں بندیگ اَنت۔ آئی ءَ گوشتگ کہ چہ دوھزار بگر داں انوں پاکستانی لشکر ءَ چنچو بلوچ پُسگ شھزانت، سْیاسی کارکن ءُ سروک شھید کرتگ آ نوں چون وتی زوراکیاں چیر داتگ کنت۔ اے راستی یے کہ بلوچ پہ وتی پدریچ ءِ رکینگ ءَ کانود ءِ رد ءَ جنگ کنگ ءَ اِنت۔ پاکستانی لشکر چنچو مردماں ناشرکار لیکگ ءِ جھد ءَ کنگ ءَ اِنت۔ پاکستان پہ بلوچانی سر ءَ زوراکی کنگ ءَ جھان ءِ داتگیں کمکاں کارمرز کنگ ءَ اِنت۔ ماما کدیر گوشتگ کہ نوں میان استمان ءَ وتی چم پچ کنگ لوٹ اَنت ءُ بلوچ ءِ جیڑہ ءِ سر ءَ ھیالگور کنگ لوٹ ایت۔ پاکستان ءِ نہ تیوک ءَ پہ اے دمگ ءَ رسکے بلکیں پہ سرجمیں جھان ءَ ترسے جوڑ بیتگ۔ ما گوں اکوام متھدہ ءَ لوٹ کن ایں کہ آ بلوچ ءِ زورانسری بیگواھی ءَ ھال ءَ بہ گیت، بلکیں میان استمان ءِ کانود ءِ رد ءَ چہ آیانی کھولاں نام ءُ ڈساں بزوریت ءُ سانمندیں کھولانی آزیزاں یل بہ کناھین ایت۔ بنشون: درشان | اکس: ماما کدیر