ریڈیو زْرمبش بلوچی | ریڈیو زْرمبش بلوچی

چہ پاکستانی لشکر ءِ ناھکیں لشکر کشیاں لکانی کَچ ءَ مردم پہ لڈ ءُ بار کنگ ءَ لاچار بیتگ۔ ماما کدیر

چہ پاکستانی لشکر ءِ ناھکیں لشکر کشیاں لکانی کَچ ءَ مردم پہ لڈ ءُ بار کنگ ءَ لاچار بیتگ۔ ماما کدیر

SEP

19
19 / 09 / 2022 وی بی ایم پی 102

شال:بیگواھیں بلوچانی توار (وی بی ایم پی ) ءِ نیمگ ءَ پہ زورانسری بیگواھیں مردم ءُ شھیداں برجاھیں زھرشانی گدان ءَ 4765 روچ سرجم بیتگ۔ دوشمبے ءِ روچ ءَ چہ کوہ ءِ سلیمان ءَ نودربر لتیپ شاہ، سدام ، اسپند جان، سلیم جان ءَ ھوار آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ ءِ پُرایمنیں پہ وتی مردمانی آجوئی ءَ شریں وڑے ءَ دیم ءَ روگ ءَ اِنت۔ پاکستان پہ وتی پروش ورگ ءِ تُرس ءَ ناھک ءَ زوراکی کنگ ءَ اِنت ءُ گوں تیزی ءَ مردمی اگبالاں لپاشگ ءَ اِنت۔ پنجاہ ھزار ءَ گیش مردم پاکستانی لشکر ءِ چیریں آزار جاھاں آزار سگگ ءَ اِنت۔ آیانی تہ ءَ بیست ھزار ءَ گیش بلوچ سْیاسی کارکن، شھزانت، نودربر، ڈاکٹر، وکیل زورانسری بیگواھی ءَ پد شھید کنگ ءُ آیانی ژانگولیں کنٹ دور دیگ بیتگ اَنت۔ ماما کدیر گوشتگ کہ پاکستانی لشکر ءِ ناھکیں لشکر کشیانی سوب ءَ لکانی کَچ ءَ مردم پہ لڈ ءُ بار کنگ ءَ لاچار بیتگ اَنت۔ چہ پاکستانی لشکر ءِ نیمگ ءَ لشکر کشی انگت برجاہ اَنت۔ انچو وھد ءِ برجاھیں لشکر کشیاں پاکستان ءِ وتگڑیں مردمی اگبالانی گَل، سول سوسائیٹی، رسانکدر ءُ وتگڑیں آمیدگس ءِ گوشاں مورے ءَ نہ وارت۔ بلے بلوچ پسگانی گرانبھائیں ھوناں میان استمان لاچار کرتگ کہ آ بلوچ ءِ توار ءَ گوش بداریت۔ پمیشکا میان استمان ءَ بلوچ ءِ توار ءِ رد ءَ وتگڑیں ریاست ءَ گوں ترندی ءَ لوٹگ ءَ اَنت۔ ماما کدیر دیمتر ءَ گوشتگ کہ ما گوں اکوام متھدہ ءُ میان استمان مردمی اگبالانی گلانی گوں ءَ لوٹ کن ایں کہ بلوچستان ءَ پاکستان ءِ رستری زوراکیانی گِر ءُ دار کنگ ءَ کردی گامگیج بہ زور اَنت۔ بلوچ چکچینی، شھرانی سر ءَ بمبگواری، آوارجنی ءُ زورانسری بیگواھی ءُ ژانگولیں جونانی دور دیگ ء سر ءَ پاکستان ءَ زوربدے اَنت ءُ پاکستان ءِ کمک ءَ بند بہ کن اَنت۔ پمیشکاکہ پاکستان چہ جھان ءَ پنڈیت ءُ ھمے کمکاں پہ وتی زوراکی ءِ گژن ءِ دور کنگ ءَ نزوریں بلوچ راج ءِ بگیری ءَ چو بمبگْواریانی وڑ ءَ کارمرز کنت۔ بنشون: درشان | اکس: ماما کدیر