ریڈیو زْرمبش بلوچی | ریڈیو زْرمبش بلوچی

شال: پہ زور بیگواھیں مردم ءُ شھیداں برجاھیں شدکشیں زھرشانی گدان ءَ 4987 روچ سرجم بیتگ۔ یکشمبے ءِ روچ ءَ چہ مشکے ءَ سْیاسی ءُ چاگردی کارکن، درمھمد ءُ شیھک ھوار آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ راج چہ بزگی ءُ ناگیگیں جاوراں سرگواز اَنت گْوَستانک نبیس اَنت، آ یک راجے ءِ مرگ ءُ زند ءَ پیش دار اَنت۔ کجام مردم چہ گْوَست ءَ پراموش، انوگ ءَ گستا ءُ باندات ءِ سما نہ بوت گڑا آئی ءَ زوراک پروش دنت۔ ماما کدیر گوشتگ کہ مرچی ریاست ءَ پہ بلوچ راج ءِ تباہ ءُ چکچینی کنگ ءَ کشندہ ٹولی ءُ آدگہ ناشرکار پُرکار کرتگ اَنت۔ آ بلوچستان ءِ تہ ءَ ریاست ءِ چیردستی ءَ مردمی اگبالانی بگیری ءَ کنگ ءَ اَنت۔ ماما کدیر گوشتگ کہ پاکستانی پارلینمٹ، آمیدگس ءَ ھوار درسیں ادارہ میارباریاں پہ نیمون کانود ءِ بھر جوڑ کنگ ءَ اَنت۔ وھدے ریاست ءِ رسانکدر بلوچ ءِ چکچینی ءُ زور بیگواھی ءَ بے تواری ءَ ندارگ کنگ ءَ اِنت۔ بلوچ ورنا کشگ ءُ آیانی جون بے کس لیکگ ءُ کل کنگ بیگ ءَ اَنت دانکہ آ وتی میارباریاں چیر بہ دیئنت۔ چشیں روچے نہ گوز ایت کہ کسے زور بیگواہ کنگ مہ بیت۔ ماما کدیر گوشتگ کہ ڈیرہ بگٹی، مشکے، آواران ءُ مکران ءِ جتائیں جاھاں لشکرکشی برجاہ اِنت۔ چہ اود ءَ دزرنانی کَچ ءَ کودک ءُ بے میاریں مردم درکانودی آوار جنگ ءُ بیگواہ کنگ بیگ ءَ اَنت۔ مردمانی گساں ماندارگ ءُ آیانی مال ءُ دلوت پلگ ءُ آیان ءَ پہ لڈ ءُ بار کنگ ءَ لاچار کنگ ءَ اَنت۔ بنشون: درشان | اکس: ماما کدیر