ریڈیو زْرمبش بلوچی | ریڈیو زْرمبش بلوچی

شال: بیگواھیں بلوچانی توار ( وی بی ایم پی ) ءِ نیمگ ءَ پہ زورانسری بیگواھیں مردم ءُ شھیداں برجاھیں زھرشانی گدان ءَ 4764 روچ سرجم بیتگ۔ یکشمبے ءِ روچ ءَ چہ این ڈی پی ءِ بنجاھی سروکاں سرکماش رشید، اشپاک ءُ سناء گوں ماما کدیر ءِ ھواری ءَ گدان ءَ نشتگ اَنت۔ وی بی ایم پی ءِ کمک سرکماش ماما کدیر تران کرتگ ءُ گوشتگ کہ زورانسری بیگواھیں مردمانی آجوئی ءَ مئے گَل ءِ ھواری ءَ کھولانی پُر ایمنیں جھد برجاہ اِنت۔ مئے اے دراجکش ءُ مھکمیں جھد ءَ ریاست تُرس آماچ کرتگ۔ داں انوں پنجاہ ھزار ءَ گیش بلوچ زورانسری بیگواہ اِنت ءُ آزار جاھاں زوراکیانی دیمپان اِنت۔ شھید ءُ زورانسری بیگواھیں ورنا مئے جھد ءِ بامرد اَنت آیانی دیمونیانی برورد اِنت کہ بلوچ ءُ بلوچستان ءَ جھان ءِ تہ ءَ یک جْوانیں پجارے ھست۔ ماما کدیر گوشتگ کہ بلوچستان ءَ زورانسری بیگواھی ءِ ھلاس کنگ ءُ پہ زورانسری بیگواھیں مردمانی آجوئی ءِ جھد ءَ درسیں بلوچاں بیگواھیں مردمانی کھولانی کمک کنگی اِنت ھمک پورم ءَ توار چست بہ کن اَنت۔ میان استمانی ادارھاں بلوچانی زورانسری بیگواھی ءِ گِر ءُ دار کنگ ءَ جْوانیں گامگیجے زورگ لوٹ ایت۔ پاکستان ءِ جوڑ کرتگیں پترانی دلبڈیاں اَبید بلوچستان ءَ زورانسری بیگواھی ءِ برجاھیں درچ اِنگت ھلاس نہ بیتگ۔ ما مدام ھمے گپ ءَ گوش ایں دانکہ توانمندیں ادارہ جُست گرگ مہ بنت زورانسری بیگواھی ءِ درچ ھلاس نہ بیت۔ بنشون: درشان | اکس: ماما کدیر