شال: پہ زور بیگواھیں مردمانی پدجنگ ءَ شدکشیں زھرشان گدان ءَ 5172 روچ سرجم بیتگ۔ یکشمبے ءِ روچ ءَ چہ شال ءَ سیاسی ءُ چاگردی کارکن اَبدُالکریم، نور اھمد، بیبرگ ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ زھرشانی گدان ءَ بلوچ آشوبی شائر مبارک کازی ءِ اکسے ھم ایر کنگ بیتگ۔
وی بی ایم پی ءِ کمک سرکماش ماما کدیر گوں مردماں تراں کرتگ ءُ گوشتگ کہ ھدامرزی ئیں مبارک کازی ءِ آشوبی شئیر ءُ لیکہ مئے پدریچ ءِ راھشونی ءَ کنت۔ بلوچ راجی گوستانک آئی ءَ گوں جوانیں دانکاں گیر کار ایت۔ آئی ءَ گوشتگ کہ پاکستان ءَ بلوچستان ءِ تہ ءَ وتی لشکر ءُ چیریں ادارہ، زرگپتیں کشندہ ٹولی ءِ نیمگ ءَ زوراکی تیز کرتگ اَنت اے درگت ءَ بلوچانی زوریں بیگواھی ءُ ژانگولیں جونانی چگل دیگ یک رندے پد ءَ تیز کنگ بیتگ۔
ماما کدیر گوشتگ کہ پر ایمنیں جھد زور بیگواھیں مردمانی زندگی ءِ بھرے جوڑ بیتگ۔ پاکستان ءُ آئی کمکارانی زوراکیاں بلوچ پسگ چہ وتی مول ءَ یک کدمے پشت ءَ نہ کنز اَنت۔ زور بیگواھیں مردمانی کھول وتی زندگیاں گوں زھرشانیاں گوازینگ ءَ اَنت ءُ جھان ءَ را ھمے کلوہ ءَ دیگ ءَ اَنت کہ مئے زندگی ءِ ھمک وشی گوں وتی بیگواھیں آزیزاں بندوک اِنت پہ وتی مردمانی آجوئی ءَ ھر وڑیں زوراکیانی دیم پہ دیمی کنگ ءَ تیار ایں۔
آئی ءَ گوشتگ کہ پاکستانی ادارہ بلوچستان ءَ وتی زوراکیانی تہ ءَ تیزی آرگ ءَ اَنت، بلوچ پسگانی دیمونی ءُ مات ءُ گھارانی توکل ءَ پاکستان ءِ زوراکی پروش داتگ اَنت۔ مھکمیں پرایمنیں جھد ءُ اکوام متھدہ ءِ بلوچستان ءِ بارو ءَ گامگیج زورگ ءَ پد پاکستانی ادارہ سکا ترس آماچ اَنت۔
ماما کدیر گوشتگ کہ گوستگیں یک ماھے ءِ تہ ءَ سدانی کچ ءَ مردم زور بیگواہ کنگ بیتگ ءُ ژانگولیں جونانی دور دیگ ھمے زوراکیانی درچ اِنت۔
بنشون: درشان / اکس: ماما کدیر
_1.jpg)
