ریڈیو زْرمبش بلوچی | ریڈیو زْرمبش بلوچی

شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5170 روچ سرجم بیتگ۔ آدینگ ءِ روچ ءَ امین اللہ مگسی ایڈوکیٹ، امران میروانی ایڈوکیٹ، سدام ایڈوکیٹ ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔

بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ ڈیرہ بگٹی ءَ پاکستانی لشکر ءِ لشکرکشی برجاہ اِنت، چہ جنگی بالگردانی بلوچ آبادیانی سر ءَ تیرگواری کنگ ءَ زھگ ءُ جنیناں ھوار باز مردم ٹپی بیتگ چہ آیاں باز مردم ءِ جاور ناگیگ اَنت۔ اے لشکر کشی ءَ بیست ءَ گیش مردم آوار جنگ ءَ پد بیگواہ کنگ بیتگ۔

ماما کدیر گوشتگ کہ ھمک روچ پاکستانی لشکر ءِ نیمگ ءَ بلوچستان ءَ مردمی ھکانی لگتمال کنگ برجاہ اِنت، اے ھند ءَ میان استمانی رسانکدر ءُ مردمی ھکانی پدجنوکانی بے تواری یک ٹوھیں تباھی یے ودی کنگ ءَ اِنت۔ اے وڑ ءَ بلوچستان مان آرگ مہ بیت ءُ جھان وتی چمان بند بہ کنت گڑا پاکستانی لشکر درسیں راھبنداں سرگوز کنت ءُ بلوچ چکچینی ءَ تیز کنت ءُ بلوچستان ءَ گیش ھونریچی کنت۔

ماما کدیر گوشتگ کہ یک نیمگے ءَ بلوچ آبادیانی سر ءَ آسگواری کنگ ءُ لس مردم کشگ بیگ ءَ اَنت ءُ دومی نیمگ ءَ وتی کشگ ءُ چگل دیگ ءِ کار اِش برجاہ داشتگ۔ مرچی بلوچ پسگانی جھد ءُ دیمونیانی سوب ءَ بلوچ جنز ءَ جھان ءِ دلگوش وتی نیمگ ءَ گور کرتگ ایشی ءِ تہ ءَ نودربرانی بلاھیں کردے ھست۔ اگاں بلوچستان ءَ اے وڑ ءَ کشت ءُ کوش زوریں بیگواھی برجاہ بوت بلوچستان بوسنیا ءِ وڑ ءَ بیت۔

آئی ءَ گوشتگ کہ ما گوں درسیں مردم دوست ءُ مردمی ھکانی پدجنوکانی دلگوش ءَ گور کنگ لوٹ کن ایں بلوچستان ءَ مردمی ھکانی لگتمالی گِر ءُ دار کنگ لوٹ ایت۔ گوں اکوامتھدہ، ایمنسٹی انٹر نیشنل ءُ یورپی یونین ءَ لوٹ کن ایں کہ بلوچستان ءَ بیوکیں مردمی ھکانی لپاشگ ءِ بارو ءَ دلگوش ءَ گور بہ کنت ءُ مردمی ھکانی لگتمالی ءِ دارگ ءَ وتی کرد ءَ پیلو بہ کن اَنت اے آیانی راھبندی پرز اِنت۔

بنشون: درشان / اکس: ماما کدیر