ریڈیو زْرمبش بلوچی | ریڈیو زْرمبش بلوچی

چہ جھان ءِ بے تواری ءَ پاکستانی لشکر ءِ زوراکیانی تہ ءَ روچ پہ روچ تیزی پیداک اِنت۔ ماما کدیر

چہ جھان ءِ بے تواری ءَ پاکستانی لشکر ءِ زوراکیانی تہ ءَ روچ پہ روچ تیزی پیداک اِنت۔ ماما کدیر

SEP

15
15 / 09 / 2022 وی بی ایم پی 43

شال: بیگواھیں بلوچانی توار ( وی بی ایم پی) ءِ نیمگ ءَ پہ زورانسری بیگواھیں مردم ءُ شھیداں برجاھیں زھرشانی گدان ءَ 4761 روچ سرجم بیتگ۔ پنچ شمبے ءِ روچ ءَ نیشنل پارٹی ءِ بنجاھی پتر ءِ باسک ھاجی مھمد نیاز لانگو، اَبدُرزاک مری ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ اکوم متھدہ ءِ نیمگ ءَ پہ زورانسری بیگواھیاں چنچو کرار داد پاس کنگ بیتگ آیانی رد ءَ پہ زورانسری بیگواہ کنگ ءَ چونیں کاروائی یے کنگ بہ بیت آ مردمی اگبال ءُ کانود ءِ رد ءَ بگیری زانگ بیت۔ زورانسری بیگواھی اکوام مھتدہ ءِ چارٹر ءِ رد ءَ مردمی اگبالانی ناھکیں لپاشگ اِنت۔ ماما کدیر گوشتگ کہ چہ جھان ءِ بے تواری ءَ پاکستانی لشکر ءِ زوراکیانی تہ ءَ روچ پہ روچ تیزی پیداک اِنت۔ پاکستانی لشکر ءُ چیریں ادارھانی کارمند ھمک روچ بلوچ پسگاں زورانسری بیگواہ کنگ ءَ پد گوں آیاں ناھکیں زوراکی کن اَنت رند ءَ شھید کنگ ءُ آیانی کُنٹاں دور دیگ ءَ اَنت۔ زورانسری بیگواھی ءِ درچ چہ دوھزار یک ءَ بنگیج بیتگ انگت ءَ گوں تیزی ءَ برجاہ اِنت۔ انوں ھزارانی کَچ ءَ بلوچ پسگ پاکستانی ءِ چیریں آزار جاھاں بندیگ اِنت، آیانی تہ ءَ بازیں کچے ءَ جنین، زھگ، پیرزال ءُ کماش ھوار اِنت۔ ماما کدیر گوشتگ کہ اے جاوراں اکوام متھدہ ءُ مردمی اگبالانی ادارھانی پہ پاکستان ءِ بگیری ءَ گامگیج زورگ ءَ ھژدری اِنت۔ نوں آیاں ءَ چہ تیوک ءِ درشانانی شنگ کنگ ءَ درکپگ ءُ تچکی ءَ دزمانجنی کنگ لوٹ ایت۔ اکوامتھدہ ءُ مردمی اگبالانی ادارھاں پاکستان بھتامانی گوش دارگ ءَ اَبید وت دیم ءَ آھگ گوں زورانسری بیگواھیں مردمانی کھول ءُ گوں بلوچ ءِ ھکی ئیں سروکاں گند ءُ نند کنگ لوٹ ایت۔ آئی ءَ گوشتگ کہ اگاں انوں اکوام متھدہ چو گْوَست ءِ وڑ ءَ وتی چماں بند بہ کنت ءُ پاکستانی کارمَنْدانی نیمگ ءَ داتگیں ردیں گپاں سر ءَ بیسہ بہ کنت پاکستان ءِ بگیری ءَ گامگیج مہ زوریت گڑا چہ ایشی ءَ پاکستان ءَ گیش دلبڈی رس ایت ءُ بلوچستان ءَ گیش مردمی گبالانی لپاشگ ءِ تہ ءَ تیزی کاریت۔ گڑا چہ اے بے تواری ءَ پہ مردمگری ءَ یک سکیں مزنیں تباھی ودی بیت، گڑا ایشی زمہ وار اکوام متھدہ ءُ مردمی اگبالانی ادارہ بنت۔ بنشون: درشان | اکس: ماما کدیر