ریڈیو زْرمبش بلوچی | ریڈیو زْرمبش بلوچی

شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5169 روچ سرجم بیتگ۔ پنچ شمبے ءِ روچ ءَ چہ ھزدار ءَ سیاسی ءُ چاگردی کارکن رسول بکش، دین مھمد ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔

بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ سرڈگار ءَ ریاست ءِ نیمگ ءَ چنچو زوراکیاں پد ھم لشکری کشی انگت ءَ ھلاس کنگ نہ بیتگ۔ مرچیگیں دور ءَ جھان ءِ نپ گوں ھمے دمگ ءَ بندوک اَنت، بلوچ پسگانی پرایمنیں جھد مھکم اِنت۔ آئی ءَ گوشتگ کہ بلوچ ءَ شریں وڑے ءَ وتی پرایمنیں جھد برجاہ داشتگ بلوچ پسگ پاکستان ءِ زورگری ءِ بگیری ءَ بے روریں جھد کنگ ءُ ھر وڑیں زوراکیانی دیمپانی ءَ کنگ اَنت۔ زورگر ءَ وتی ناشرکارانی پارست ءَ بلوچستان ءَ وتی زورگپتی مھکم کرتگ، ھمے ناشرکارانی بگیری ءَ بلوچستان ءَ شھیدانی دیمونی ءُ بلوچ پسگانی جھد ءَ گوستانکے زندگ داشتگ۔

ماما کدیر گوشتگ کہ بلوچ پسگانی بے دروریں جھد ءُ دیمونیاں بلوچستان ءَ پاکستان ءِ درسیں زوراکی پدر کرتگ اَنت۔ پاکستانی ناشرکار انگت ءَ بلوچ راج ءِ میان ءَ ساڑی اَنت ءُ وت ءَ راجدوست پیش دارگ ءَ اَنت، ھک ءُ بلوچ راجی مڈیانی گپ ءَ کنگ ءُ بلوچ ءَ پارلیمنٹ ءِ نیمگ ءَ برگ ءَ اَنت دانکہ آ بلوچ ءِ شھید ءُ زور بیگواھیں مردمانی دیمونیاں زوال بہ کن اَنت۔

ماما کدیر گوشتگ کہ بلوچستان ءِ جتائیں ھنداں زانوگریں بلوچانی پرایمنیں جھد ءَ پاکستان ءِ ناشرکارانی نپ ءُ لب واری سیاست نابود کرتگ۔ ھمے ناشرکارانی سروکی ءَ پاکستانی لشکر زوراکی کنگ ءُ مردماں نشانگ ءُ زور بیگواہ کنگ ءَ اِنت۔ بلوچستان ءِ جتائیں ھند ءُ دمگاں پاکستانی لشکر ءِ زوراکی یکشل ءَ برجاہ اَنت۔

بنشون: درشان / اکس: ماما کدیر