ریڈیو زْرمبش بلوچی | ریڈیو زْرمبش بلوچی

شال: پہ زور بیگواھیں مردمانی پدجنگ ءَ شُدکشیں زھرشانی گدان ءَ 5163 روچ سرجم بیتگ۔ آدینگ ءِ روچ ءَ بی ایس او ءِ پیشگیں سرکماش مھیم ءُ آدگہ مردم پہ ھمدردی درشان کنگ ءَ گدان ءَ اتکگ اَنت۔ بیگواھیں بلوچانی توار (وی بی ایم پی) ءِ کمک سرکماش ماماکدیر ءَ گْوشتگ کہ گْوستگیں یک ھپتگے ءَ 12 ءَ گیش مردم دروگیں میڑانی نام ءَ شھید کنگ بیتگ کہ ایشانی تہ ءَ گیشتریں مردم چہ پیش ءَ بیگواہ کُرتگیں مردم بیتگ اَنت۔پاکستان وتی زورگری ءُ لُٹ ءُ پُل ءِ برجاہ دارگ ءَ مردمی ھکانی دُرسیں راھبنداں لگتمال کنگ ءَ اِنت۔ آئی ءَ گْوشتگ کہ پاکستان ءِ ھستی پہ بلوچ ءِ ھستی ءُ سلامتی ءَ تُرسناک اِنت۔ بنداتی روچ بہ بیت کہ گْوستگیں یک دھکے پاکستان پہ جھان ءِ ایمنی ءَ تُرسناک جوڑ بیتگ۔ نوں بلوچ ءِ جیڑہ ایوک ءَ پہ دمگ ءَ نہ بلکیں پہ سرجمیں جھان ءَ یک سنگین ایں جیڑھے جوڑ بیتگ۔ ماما کدیر ءَ گْوشتگ کہ پاکستان مردمی ھکانی لگتمال کنگ ءَ چہ دُرساں دیم ءَ اِنت، پاکستانی لشکر یک نیمگے زورگیپتیں بلوچستان ءَ ھوار سند ءَ ھم مردمی ھکاں لگتمال کنگ ءَ اِنت ءُ دومی نیمگ ءَ سرجمیں جھان ءَ وتی مزھبی گنوکانی ٹولی جوڑ کنگ ءُ آیاں رودینگ ءَ اِنت۔ آئی ءَ گْوشتگ کہ زورگریں ریاست ءِ رسانکدر، آمیدگس ءُ سول سوسائٹی ءَ ھوار دُرسیں ادارہ اے برجاھیں چکچینی ءِ گِر ءُ دار کنگ ءُ بلوچانی بنکی لوٹانی سرجم کنگ ءَ وتی کِرد ءَ پیلو بہ کن اَنت ءُ ما چہ اکوام متھدہ، یورپی یونین ءُ ایمنسٹی انٹرنیشنل ءَ ھوار چہ دُرساں دزبندی کن ایں آ بلوچستان ءَ برجاھیں ریاست ءِ رستری زوراکیانی گَر ءُ دار کنگ ءَ وتی کِرد ءَ پیلو بہ کن اَنت۔ بنشون: درشان / اکس: ماما کدیر