ریڈیو زْرمبش بلوچی | ریڈیو زْرمبش بلوچی

شال: پہ زور بیگواھیں مردمانی پد جنگ ءَ برجاھیں شدکشیں زھرشانی گدان ءَ 5160 سرجم بیتگ۔ سے شمبے ءِ روچ ءَ جمائت اسلامی ءِ سروک اَبدُالھک ھاشمی، مولانا ھدایت الرھمان ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ گوستگیں ھپتاد ءُ پنچ سال اِنت کہ پاکستانی ریاست ءِ زوراکیانی آماچ اِنت۔ھر کجام مردم پاکستانی لشکر ءِ دست ءَ بیگواہ کنگ بیتگ آ ناھکیں آزارانی دیمپان بیتگ۔ اے درگت ءَ بلوچ چہ پاکستان ءِ یک ادارھے ءَ مھروان ءُ مردمگری ءِ اوست ءَ نہ دار ایت ءُ وتی چم اِش میان استمانی ادارھانی نیمگ ءَ داشتگ اَنت کہ بلکیں جھان ءِ شرپمندیں راج ءُ مردمی ھکانی ادارہ گامگیج بزور اَنت۔ ماما کدیر گوشتگ کہ چہ میان استمانی ادارہ ءُ شرپمندیں جھان ءَ اوست دارگ ءَ پیش بلوچ ءَ اے گپ الم زانگ لوٹ ایت کہ مچی مانشانی دزکپگ بہ بیت یا ھمک روچ بلوچ پسگانی ژانگولیں جون، بلوچانی کشگ بہ بیت یا چادر ءُ چاردیوالانی لگتمال کنگ، یا مئے جگر ءِ ٹکرانی لشکر ءِ دست ءَ زور بیگواہ کنگ اے درسانی بنیاد بلوچ ءِ ایردستی اِنت ءُ بلوچ سرڈگار ءِ زورگری اِنت۔ آئی ءَ گوشتگ کہ زوراک کدی ھم اے گپ ءِ پرواہ ءَ نہ دار ایت ما وتی آزایزانی جونانی چست کنگ ءَ چنچو رنجیگ بہ ایں۔ پاکستان بلوچستان ءَ پہ لٹ ءُ پل کنگ ءُ لُٹ ءُ پل کنوکانی پھازداری ءَ آتکگ۔ آ چہ بنداتی روچاں بلوچ ءَ نہ بلکیں بلوچستان ءَ لوٹ ایت۔ آ مارا کشگ ءُ مئے مڈیاں لٹ ءُ پل کنگ لوٹ ایت دانکہ اے مڈیاں وتی آدگہ آبادیانی سر ءَ بھر ءُ بانگ بہ کنت۔ بلوچستان ءَ تیوک ءَ مچی مانشجاہ دست کپ اَنت۔ بنشون: درشان / اکس: ماما کدیر