ریڈیو زْرمبش بلوچی | ریڈیو زْرمبش بلوچی

شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5159 روچ سرجم بیتگ۔ دوشمبے ءِ روچ ءَ وتن پارٹی ءِ سروک ھیدر رئیسانی ءُ پتر ءِ باسک مھمد ھنیپ مری ءُ بی این پی ءِ دمگی سرکماش گلام نبی مری، بی ایس او ءِ پیشیگیں سرکماش جاوید ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ زورگپتیں بلوچستان ءَ مدام لشکر ءِ زوراکی برجاہ اَنت۔زھگ ءُ جنیناں ھوار نودربر ءُ سیاسی کارکن ھم زوراکیانی دیمپان اَنت۔ پاکستانی ریاست ءِ ناشرکاریاں سرجمیں جھان سرپد اِنت۔ بلے پہ ایشی ءِ گِر ءُ دار کنگ ءَ ھچ پیمیں گامگیج زورگ ءَ نہ اَنت۔نوں ریاستی لشکر ءُ سرکار چہ بلوچانی پر ایمنیں جھد ءِ سوبمندی ءَ پریشان اَنت۔ ماما کدیر گوشتگ کہ اکوام متھدہ ءِ ادارہ بلوچ راجی جیڑہ ءِ گیش ءُ گیوار کنگ ءَ وتی زمہ واریاں پیلو بہ کنت۔ بلوچ راج گوں اکوام متھدہ ءَ ھوار پہ انساپ ءَ درسیں میان استمانی توانمندانی گون ءَ لوٹ کنت کہ آ بلوچستان ءَ پاکستانی لشکر ءِ بلوچ چکچینی ءُ جنگی میارباریانی سر ءَ دلگوش ءَ گور بہ کنت پہ ایشی ءِ گِر ءُ دار کنگ ءَ گامگیج بہ زور ایت۔ زوریں بیگواھی ءِ گِر ءُ دار کنگ ءَ وتی کرد ءَ پیلو بہ کنت۔ بنشون: درشان / اکس: ماما کدیر