ریڈیو زْرمبش بلوچی | ریڈیو زْرمبش بلوچی

بلوچ ورنا ءُ نودربرانی راجمستری ءُ پُر ایمنیں جھد ءَ ریاست تُرس آماچ کرتگ۔ ماما کدیر

بلوچ ورنا ءُ نودربرانی راجمستری ءُ پُر ایمنیں جھد ءَ ریاست تُرس آماچ کرتگ۔ ماما کدیر

SEP

04
04 / 09 / 2022 وی بی ایم پی 73

شال: بیگواھیں بلوچانی توار ( وی بی ایم پی ) ءِ نیمگ ءَ پہ زورانسری بیگواھیں مردم ءُ شھیداں برجاھیں زھرشانی گدان ءَ 4749 روچ سرجم بیتگ۔ یکشمبے ءِ روچ ءَ نیشنل پارٹی ءِ بنجاھی کارگشاد جان مھمد بُلیدی، سینیٹر کبیر مھمد شھی، ڈاکٹر مھمد اسھاک، ڈاکٹر پاروک ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءِ کُنڈ کُنڈ ءَ ورنایاں ھوار ھمک بھرگاں سْیادی داروکیں مردمانی تہ ءَ سرپدی ودی بیتگ کہ آ پہ وتی مردمانی آجوئی ءَ جھد کنگ ءَ اَنت۔ آ چہ ایردستی ءَ آجوئی ءُ وتی سر ءَ بیوکیں زوراکیانی بگیری ءَ جھد کنگ ءَ اَنت۔ دومی نیمگ ءَ ریاست اے سْیاسی جنز ءِ بگیری ءَ وتی توگیں زور ءَ بلوچ ءِ سر ءَ چکاسگ ءَ اِنت۔ یاست پہ بلوچ ءِ پُر ایمنیں جھد ءِ ھلاس کنگ ءَ بلوچ چکچینی ءِ تہ ءَ تیزی آرگ ءَ اِنت۔ ریاست مدام وتی زوراکیانی تہ ءَ تیزی آرگ ءُ لّس آبادیانی سر ءَ بیڑ برگ ءُ مردماں نشانگ کنگ ءُ کشگ ءَ اِنت۔ دومی نیمگ ءَ آئی ءَ وتی کشگ ءُ دور دیگ ءِ روایشت برجاہ داشتگ۔ مرچی بلوچ راج ءَ پُرایمنیں جھد ءِ رد ءَ دیمونی دیگ ءَ وتی سر ءَ بیوکیں زوراکیانی باروا جھان سرپد کرتگ۔ ماما کدیر گوشتگ کہ بلوچ ورنا ءُ نودربرانی راجمستری ءُ پُر ایمنیں جھد ءَ ریاست تُرس آماچ کرتگ۔ ریاست دست ھالیگیں نودربراں نہ تیوک ءَ چہ وانگجاھاں آوار جنگ ءُ شھید کنگ ءَ اِنت بلکیں چہ آیانی کتاب ءُ کتابجاھاں تُرسگ ءَ اِنت۔ ماما کدیر گوشتگ کہ بلوچ نودربر ءُ آدگہ گلانی مردماں وتی گلانی رھبند ءِ سر ءَ پابند بیگ ھژدری اِنت کہ آ وتسر مہ بنت ءُ وتی گلانی رھبند ءِ پابندی ءَ بہ کن اَنت گڑا یک شریں وڑے ءَ وتی جھد ءَ دیم ءَ برت کن اَنت۔ بنشون: درشان | اکس: ماما کدیر