ریڈیو زْرمبش بلوچی | ریڈیو زْرمبش بلوچی

شھیدی چہ رُزوائی ءِ مرگ ءَ ھزار در سد گھتر اِنت۔ ماما کدیر

شھیدی چہ رُزوائی ءِ مرگ ءَ ھزار در سد گھتر اِنت۔ ماما کدیر

OCT

03
03 / 10 / 2022 وی بی ایم پی  ,  ھکپان 58

شھیدی چہ رُزوائی ءِ مرگ ءَ ھزار در سد گھتر اِنت۔ ماما کدیر شال: بیگواھیں بلوچانی توار ( وی بی ایم پی ) ءِ نیمگ ءَ پہ زورانسری بیگواھیں مردم ءُ شھیداں برجاھیں زھرشانی گدان ءَ 4779 روچ سرجم بیتگ۔ دوشمبے ءِ روچ ءَ چہ پَنجْگُور ءَ سْیاسی ءُ چاگردی کارکن داد مھمد،التاپ، منزور ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ پاکستان وتی تیوگیں رستری زور ءَ بلوچ راج ءِ بگیری ءَ چکاسگ ءَ اِنت ءُ وتی درسیں توانمندیں ادراھانی رد ءَ بلوچ راج ءِ پُر ایمنیں جھد ءَ دارگ لوٹ اِیت۔ بلوچ پسگانی زورانسری بیگواھی، گسانی سر ءَ بیڑ برگ ءُ بلوچ پسگاں شھید کنگ آئی ءِ زوراکی ءِ بھر اَنت۔ ریاست وتی اے زوراکیاں کجام ھم راج ءِ سر ءَ پہ وتی زورگپتی ءِ برجاہ دارگ ءَ کارمرز کنت۔ پاکستان پہ وتی زورگپتی ءِ برجاہ دارگ ءَ بلوچ ءِ سر ءَ وتی زوراکیاں تیز کنت ءُ سْیاسی کارکناں ھوار درسیں بھرگانی مردمانی نشانگ کنگ ءِ تہ ءَ تیزی کاریت۔ ماما کدیر گوشتگ کہ بلوچ راج ءِ شھزانت ءُ ھمک بھرگاں سْیادی داروکیں مردماں کہ گوں وتی پجار ءَ مھر اِنت آیاں نشانگ کنگ ءَ اِنت۔ ریاست ءِ زوراکی سرجمیں راج ءَ ھوار جھان ءِ دیم ءَ پدر اِنت کہ بولان، مچ، ھرنائی، کوھلو، مستونگ ءُ ڈیرہ بگٹی ءَ زورانسری بیگواھیں مردم شھید کرتگ ءُ دروگیں میڑ ءِ نام داتگ اَنت۔ مَکران ءَ ھوار زورگپتیں بلوچستان ءَ باز ھنداں لّس آبادیانی سر ءَ لشکر ءَ زوراکی کرتگ۔ بلوچ سرڈگار ءِ سر ءَ گوں بلوچ راج ءَ زوراکی کنگ بیگ ءَ اِنت، سْیاسی کارکن ءُ رھشونانی گساں بیڑ برگ ءُ آیاں شھید کنگ ءَ اَنت۔ ماما کدیر گوشتگ کہ زورانسری بیگواھیں مردمانی گدان ھم ماندارگ بنت کہ اود ءَ زورانسری بیگواھیں مردم ءُ شھیدانی کھول نند اَنت زورانسری بیگواھیں مردمانی کھول پہ وتی آزیزانی سلامتی آجوئی ءَ دواہ لوٹ اَنت ءُ جھان ءَ زوراکی ءِ باروا سرپد کنگ ءِ جھد ءَ کن اَنت۔ زورانسری بیگواھیں مردمانی گدانانی سوچگ ءُ کھولاں زوراکی ءِ نشانگ کنگ پہ آھوکیں پدریچ ءَ پجار جوڑ بنت۔ شھیدی چہ رُزوائی ءِ مرگ ءَ ھزار در سد گھتر اِنت۔ بنشون: درشان | اکس: ماما کدیر