ریڈیو زْرمبش بلوچی | ریڈیو زْرمبش بلوچی

شال: بیگواھیں بلوچانی توار ( وی بی ایم پی ) ءِ نیمگ ءَ پہ زورانسری بیگواھیں مردم ءُ شھیداں برجاھیں زھرشانی گدان ءَ 4748 روچ سرجم بیتگ۔ شمبے ءِ روچ ءَ بی ایس او مینگل ءِ رسانکدری کارگشاد بالاچ کادر، شوکت ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ توانمندیں زورگر کجام ھم نزوریں ریاست ءِ سر ءَ وتی زورگپتی ءِ برجاہ دارگ ءَ وتی زوراکیانی جتا جتاھیں وڑاں چکاس اِیت۔ آ چیردستیں راج ءِ تبا چاریت ءُ ھما وڑ ءَ وتی زورگپتی ءَ برجاہ داریت۔ آئی ءَ گوشتگ کہ بلوچستان ءَ ریاست ءَ وتی ناشریں کاروائیانی تہ ءَ تیزی آورتگ۔ جتا جتاھیں ھنداں لشکر ءَ گوں وتی ھندی کارمنْدانی رد ءَ وتی لشکری زوراکی ءُ زورانسری بیگواھی ءِ دْرچ برجاہ داشتگ۔ ماما کدیر ءَ گوشتگ کہ پاکستان میان استمانی مردمی اگبالانی رھبند ءَ لپاشگ اِنت بلے آئی ھچ جُست کنوک نیست۔ مردمی اگبالانی گَلانی بٹاک داں درشاناں گندگ بنت۔ بلوچستان ءَ مردمی اگبالانی لپاشگ ءِ رد ءَ ھچ گزارش کنگ بیگ ءَ نہ اِنت، ملک ءُ درملکی رسانکدر ءَ وتی چم بستگ اَنت۔ آئی ءَ گوشتگ کہ مردمی اگبالانی ادارانی نیمگ ءَ لوٹ کنگ ءَ اَبید مردمی اگبالانی لپاشگ ءِ تہ ءَ نہ کمی آتکگ ءُ نہ ایشی ءِ گِر ءُ دار کنگ ءَ گامگیج زورگ بیتگ۔ بنشون: درشان | اکس: ماما کدیر