ریڈیو زْرمبش بلوچی | ریڈیو زْرمبش بلوچی

شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5157 روچ سرجم بیتگ۔ شمبے ءِ روچ ءَ سیاسی ءُ چاگردی کارکن زاکر، ھیر مھمد ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ پاکستانی لشکر ءِ لشکرکشی ءِ نام ءَ بے میاریں مردمانی نشانگ ءُ شھید کنگ ھمے گپ ءَ پد کنت کہ پاکستان نہ مردمی ھکانی راھبند ءِ ھیال ءَ دار ایت ءُ نہ آئی ءَ ایشی ءِ پرواہ ھست۔ زورگریں ریاست درسیں میان استمانی راھبنداں لگتمال کنگ ءُ بلوچ ءَ ھلاس کنگ لوٹ ایت۔ پاکستان ھمے ناشرکاریاں لشکری کاروائی ءِ نام ءَ دنت اے نہ تیوک ءَ لشکرکشی اَنت بلکیں پہ شوربندی بلوچ ءِ چکچینی کنگ اِنت۔ ماما کدیر گوشتگ کہ جھان ءِ کجام ھم شرپمندیں ڈیھ لشکرکشیانی میان ءَ لّس آبادیانی سر ءَ گوں جیٹ بالیگاں بمبگواری نہ کنت۔ ریاست تچکی ءَ بلوچ ءِ سر ءَ تیرگْواری کنت ءُ چہ ایشی ءَ ھمے گپ پدر اِنت کہ پاکستان ءُ بلوچستان ءِ سیادی بس زورگپت ءُ ایردستی ئیگ اِنت۔ زورگپت ءَ تیوک ءَ زورگپتیں ڈیھ درکار اِنت ءُ اود ءِ جھمنند انہ۔ ماما کدیر گوشتگ کہ جھان ءِ گوستانک ءَ اے وڑیں زوراکی ءُ رستری بادشاہ برے جرنیل یا راجی دروشم ءَ دیستگ اَنت، بلے انوگیں زورگریں ریاست ءَ درسیں زوراکی سرگوز کرتگ اَنت ءُ ناشریانی بازیں درور زندگ داشتگ اے ھچ شموشگ نہ بنت چے ءَ کہ اے ریاستاں چیردست ءُ زبھریں مردم انچیں رستری زوراکیانی نشانگ کُرتگ اَنت کہ چہ ایشی ءَ مردم مُدام شرمندگ بیت۔ آئی ءَ گْوشتگ کہ چہ ما بازیناں زوراکی ءُ رستری کسہ اِش نہ کُرتگ اَنت، ویتنامیانی زار ءُ پریات ونتگ اَنت ءُ الجزائریانی تیر سُپتگیں جون ماں ٹی وی آں دیستگ اَنت۔بنگلہ دیش ءِ سرڈگار ءِ واھُندانی بازیں جونانی بابت ءَ ریڈیو ءَ ھال اِش کُرتگ اَنت۔اے تُرسناک ءُ رستری زوراکیانی پُژدر ءَ پہ مردمگری ءِ رکینگ ءَ گیمُرتگیں زِردانی جوزگ چیست بیتگ اَنت۔ پہ ایشی ءِ گِر ءُ دار کنگ ءَ مارا ھمکوپگ بیگ لوٹ ایت داں کہ بیگواھیں مردم آجو بہ بنت۔ بنشون: درشان / اکس: ماما کدیر