شال:پہ زور بیگواہ کنگ بیتگیں مردم ءُ شھیدانی شُدکشیں زھرشانی گدان ءَ 4776 روچ سرجم بیتگ۔ سیاسی ءُ چاگردی کارکن الی بکش بگٹی،ابدُلگنی سیلاچی پہ ھمدردی درشان کنگ ءَ گدان ءَ اتکگ اَنت۔ وی بی ایم پی ءِ کمک سرکماش ماما کدیر ءَ گوں مردماں تران کنان ءَ گْوشتگ کہ ریاست ءِ چیریں ادارھانی کارمند گوں یک شوربندی یے ءَ لھتیں مردماں ٹوھیں اُگدہ دیگ ءُ سیاسی کارانی سر ءَ پہ وتی نپ ءُ سیتاں کارمرد کنگ ءَ اَنت۔ ریاست ءِ مردماں کُشندہ ٹولی پُرکار کُرتگ کہ آ بلوچ سیاسی،چاگردی ءُ مردمی اُگبالانی کارکناں پہ زور بیگواہ کنگ ءُ کُشگ ءُ دور دیگ ءَ اَنت۔ آئی ءَ گْوشتگ کہ ریاست ءِ کمکار وتی وپاداری ءِ منارینگ ءَ بلوچ پُسگاں کُشگ ءُ چگل دیگ ءُ مُچی مانشاں کل ءُ کسارت کنگ ءَ اَنت۔ آئی ءَ گْوشتگ کہ پہ زوریں بیگواھی ءُ زوراکیاں ما پشت کنز نہ بیں ءُ مئے پُرایمنیں جُھد داں وتی اُگبالانی گرگ ءَ برجاہ بیت۔بلے پہ بلوچستان ءِ مردمانی زور بیگواھیانی گر ءُ دار کنگ ءَ یک توانمندیں توارے ھژدری اِنت، اکوام متھدہ ءُ جھان پاکستان ءَ جُست بہ کنت۔بلوچستان ءَ نوں ریاست ءِ زوراکی پدر بیتگ ءُ نوں ریاست پہ زوراکی کنگ ءَ وتی بیم ءَ مردمانی سر ءَ برجاہ داشت کُرت نہ کنت۔ بنشون: درشان | اکس: ماماکدیر
بلوچستان ءَ ریاست ءِ زوراکی برجاہ اِنت ءُ ما پہ زوراکی ءُ زوریں بیگواھیاں پشت کِنز نہ بیں۔ماماکدیر
