ریڈیو زْرمبش بلوچی | ریڈیو زْرمبش بلوچی

مئے ماہ بندیگ اِنت،مئے ائید نہ بیتگ،شال ءُ کراچی ءَ پہ بیگواھیں مردماں ائید ءِ روچ ءَ زھرشانی کنگ بیتگ

مئے ماہ بندیگ اِنت،مئے ائید نہ بیتگ،شال ءُ کراچی ءَ پہ بیگواھیں مردماں ائید ءِ روچ ءَ زھرشانی کنگ بیتگ

JUL

22
22 / 07 / 2021 بیگواہ 85

شال/کراچی:بیگواھیں بلوچانی توار ءِ چیردستی ءَ بیگواھیں مردمانی پدجنگ ءَ ائید ءِ روچ ءَ شال پریس کلب ءِ دیم ءَ زھرشانی کنگ بیتگ۔دومی نیمگ ءَ بیگواھیں سندیانی توار ءُ سند اجاگی پورم ءَ ائید ءِ شپ ءَ بگر داں ائید ءِ روچ ءِ بیگاہ ءِ ادار شش ءَ کراچی پریس کلب ءِ دیم ءَ زھرشانی بنجلے جتگ ءُ نشتگ اَنت۔بیگواھیں بلوچ ءُ سندیانی کھولاں ابید سیاسی ءُ مردمی اگبالانی کارکناں بیگواھیں مردمانی کھولانی گون ءَ ھمدردی درشان کنگ ءَ زھرشانی ءَ بھر زُرتگ۔ اے بابت ءَ ماما کدیر ءَ گْوشتگ کہ مرچی مارا 14 سال اِنت کہ بیگواھیں مردماں زھرشانی کنگ ءَ ایں ءُ اے 28 ائید اِنت کہ ما زھرشانی کنگ ءَ ایں۔ شال پریس کلب ءِ دیم ءَ گوں مچی ءَ تران کنان ءَ ترانکاراں گْوشتگ کہ پاکستان زورگراں پہ وتی سیتانی پانپانی ءَ جوڑ کُرتگ کہ راجانی ھستی ءَ نہ منّ ایت چے ءَ کہ اے وتگڑیں دو راجی لیکہ ءِ بنیاد ءَ جوڑ کنگ بیتگ ءُ چہ ھما روچ ءَ کہ پاکستان جوڑ کنگ بیتگ چوشیں یک روچے نیست کہ چیردستیں راجانی سر ءَ زوراکی کنگ نہ بیتگ۔ ’مارا راجی جُست سرپد بیگی اِنت۔اے استان ءِ گپ ءُ تران ءِ نام ءَ پندل بازی گْوستانک ھست اِنت،ھان کلات ءَ بگر داں بابو نوروز ءَ ایشی گپ ءُ تران ءِ نام ءَ زوراکی کُرتگ داں وھدے اے زوراکیں نزام ءُ اے استان ءِ ھست اِنت زوراکی ھلاس نہ بیت۔‘ ترانکاراں گْوشتگ کہ بلوچ اگاں استان ءِ بگیری ءَ جُھد کنگ ءَ اَنت ءُ اے میان ءَ دزگیر بنت آیان ءَ اے ھک ھست اِنت کہ آمیدگس ءَ پیش کنگ بہ بنت۔میان استمانی ءُ پاکستان ءِ راھبند ءِ رد ءَ آیاں اے ھک دیگ بیتگ۔استان ءِ تْرامگیج مردماں بیگواہ کن اَنت نہ ایوک ءَ مردمی اگبال بلکیں پاکستان ءِ راھبند ءِ بگیری ءَ کنگ ءَ اَنت۔ ’سمی دین ءِ سروکی ءَ کراچی ءَ زھرشانی کنگ بیتگ‘ کراچی ءَ پہ بیگواھیں مردمانی پدجنگ ءَ ائید ءِ روچ ءَ بیتگیں زھرشانی ءِ سروکی بیگواھیں راھشون ڈاکٹر دین مھمد ءِ جنک سمی دین ءَ کُرتگ۔اے بابت ءَ رسانکدر ءَ تران کنان ءَ آئی گْوشتگ کہ ما چہ ائید ءِ شپ ءَ سندی بیگواھیں مردمانی کھولانی ھواری ءَ کراچی پریس کلب ءِ دیم ءَ زھرشانی گدانے جتگ ءُ نشتگیں۔سرجمیں جھان ءَ مسلمان ائید کنگ ءَ اَنت ءُ ما اِد ءَ زھرشانی ءَ نشتگیں۔ آئی گْوشتگ کہ ھما استان کہ وت ءَ استان ءِ مدینہ گْوش ایت آ وتی مسلمانیں شھریانی گون ءَ چوش کنگ ءَ اِنت کہ بژنی گپے۔مرچی اِد ءَ کسانسالیں زھگ ءُ پیرزالیں مات نشتگ ءُ وتی مردمانی پدجنگ ءَ زھرشانی کنگ ءَ اَنت کہ پہ استان ءِ مردمی اگبالانی تْرامگیجانی دیم ءَ شھماتے کہ مزن مزنیں کرشیانی سر ءَ نشتگ اَنت بلے آیاں مرچی بیتگیں اے زھرشانی مانیارتگ۔ آئی مردمی اگبالانی تْرامگیجانی زھرشانی ءَ بھر نہ زورگ ءِ سر ءَ ایر جتگ اَنت ءُ گْوشتگ کہ پاکستان ءَ مردمی اگبالانی تْرامیجانی نیمگ ءَ مرچیگیں روچ ءِ بابت ءَ یک درشانے ھم دیگ نہ بیتگ کہ اے پہ آیانی کِرد ءَ یک مزنیں جُستے۔ آئی گْوشتگ کہ ما پہ بیگواھیں مردمانی پدجنگ ءَ ھمک در ٹُک اِتگ،ما گوں پاکستان ءِ مزن وزیر ءَ ھم گند ءُ نند کُرتگ کہ آئی مارا سدکی داتگ کہ من پہ بیگواھیں مردمانی یل کنگ ءَ وتی کرد ءَ پیلو کناں ءُ بیگواھیں مردماں آجو کناں۔مئے سادھیں لوٹ اِنت کہ مارا گْوشگ نہ بیت مئے مردم چون اَنت،کجا اَنت اگاں میاربار اَنت آمیدگس ءَ پیش کنگ بہ بنت بلے مرچی چار پنچ ماہ گْوستگ مارا ھچ سرپدی دیگ نہ بیتگ۔ سمی دین ءَ گْوشتگ کہ پہ بیگواھیں مردماں جوڑ بیتگیں کمیشن ءِ سروک جاوید اکبال ءَ تچکی ءَ گْوشتگ کہ سال  2015 ءَ پیش بیگواہ بیتگیں مردمانی بابت ءَ من ھچ گْوشت نہ کناں۔نی پم ءَ چے پشت کپتگ،ماکجا بہ رویں؟‘ آئی گْوشتگ کہ ائید وشیانی روچ اِنت،مردم شاتکامی کن اَنت بلے ما زھرشانی کنگ ءَ ایں،اے پہ شرپمندیں ڈیھاں بلاھیں گپے بلے پاکستان ءَ ھچ پروا نیست،بلےمردمی اگبالانی تْرامگیجانی سروک بایدیں مرچی ھمد ءَ ساڑی بوتین اَنت۔ بنشون: دمگی اھوالکار | اکس: زْرمبش