ریڈیو زْرمبش بلوچی | ریڈیو زْرمبش بلوچی

شال: زورانسری بیگواھیں مردم ءُ شھیدانی شدکشیں زھرشانی گدان ءَ 4649 روچ سرجم بیتگ۔ شمبے ءِ روچ ءَ سیاسی ءُ چاگردی کارکن سجّاد اھمد، اَبدُلھکیم، شیر مھمد ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ جھان ءِ تہ ءَ زوراکی ءِ بازیں داستانے دست کپ ایت، اسل ءَ ھما چاگرد ءَ کہ زوراکی بناہ بیت گڑا جنگ بندات بیت۔ ھمود ءَ کہ نزوریں مردمانی جون پہ ھک ءِ لوٹگ ءَ دگانی سر ءَ ایر بہ بنت ءُ پیر مرد ورنایانی جوناں کوپگ ءَ بہ کن اَنت۔ مات پہ وتی بیگواھیں زھگانی یاتاں بیران بہ بنت۔ ماما کدیر گوشتگ کہ بلوچستان گوں انچیں جنگی جاورے ءَ گوزگ ءَ اِنت کہ زورگر ءَ وتی زوراکی گوں ترندی ءَ برجاہ داشتگ، اے جنرل نیازی ءِلیکہ اِنت۔ ھمے لیکہ ءَ بنگلہ دیش ءَ پاکستانی لشکر ءَ پروش وارت ءُ بلوچستان ءِ تہ ءَ ھمے لیکہ چکاسگ بیگ ءَ اِنت۔ ماما کدیر گوشتگ کہ بلوچ یک گیرت مند ءُ نہ ترسیں راجے وتی گھارانی آوار جنگ ءِ بگیری ءَ بے توار نہ بیت۔ مرچی تیوگیں بلوچستان ءُ مکران ءَ سیاسی گھگیری ءِ کاروانے چست بیتگ۔ مردماں گوں بازیں کچے ءَ در کپگی اِنت ءُ پہ ھک ءَ ھمتوار بیگی اِنت۔ اے ترندیں زھرشانیانی برجاہ بیگ، ریاست ءِ زوراکیں شونداتانی پروش اِنت۔ بنشون: درشان | اکس: ماما کدیر