ریڈیو زْرمبش بلوچی | ریڈیو زْرمبش بلوچی

بلوچ سرڈگار ءَ ھمک روچ گوں زوراکیاں بندات ءُ آسر بیت۔ ماما کدیر

بلوچ سرڈگار ءَ ھمک روچ گوں زوراکیاں بندات ءُ آسر بیت۔ ماما کدیر

MAY

20
20 / 05 / 2022 بیگواہ 209

شال: زورانسری بیگواھیں مردم ءُ شھیدانی شدکشیں زھرشانی گدان ءَ 4648 روچ سرجم بیتگ۔ آدینگ ءِ روچ ءَ این ڈی پی ءِ سروک اَبدُلگنی، مھب ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ سرڈگار ءَ ھمک روچ گوں زوراکیاں بندات ءُ آسر بیت۔ ھزارانی کچ ءَ مردمانی بیگواھی پہ ملکی ءُ میان استمانی ادارھانی بے تواری ءَ پہ مردمی پدریچ ءُ آجوئی ءَ جُستے ودی کنت۔ انوں ریاست مئے جنیناں زورانسری بیگواہ کنگ ءَ اِنت۔ نیزگار ءُ جپاکشیں جنینانی سر ءَ ناشرکاری ءِ ناھکیں بھتام ءَ ارزی نبیسگ ءَ اِنت، اے زوراک ءِ زور ءِ پُروش اِنت۔ گوں ھمے وڑیں کاراں پُر ایمنیں جھد ءِ سر ءَ زوراکی کنت۔ ریاست ءَ زانگ لوٹ ایت چہ اے وڑیں کاراں ءَ شری ءِ امیت دارگ نہ بیت۔ آئی گوشتگ کہ من گوں کیچ ءِ لّس مردماں لوٹ کن آں کہ آ زورانسری بیگواھیں جنین نورجان ءُ ھبیبہ ءِ زورانسری بیگواھی ءِ بگیری ءَ پہ آیانی آجوئی ءَ برجاھیں زھرشانیاں شریں وڑے ءَ بھر بزور اَنت۔ اے زوراکی پہ تئی پدریچ ءَ بیگ ءَ اِنت۔ اگاں مرچی پاد نیائے باندا تئی باریگ کیت۔آوار جنگ ءُ بیگواہ بیگ ءَ پیش پاد ءَ۔ بنشون: درشان | اکس: ماما کدیر