ریڈیو زْرمبش بلوچی | ریڈیو زْرمبش بلوچی

ریاست ءِ دروگ آئی پروش ورگ ءَ پدر کنگ ءَ اَنت کہ شھریانی ھک دیگ ءَ بے سوب بیتگ۔ ماما کدیر

ریاست ءِ دروگ آئی پروش ورگ ءَ پدر کنگ ءَ اَنت کہ شھریانی ھک دیگ ءَ بے سوب بیتگ۔ ماما کدیر

MAY

18
18 / 05 / 2022 بیگواہ 133

شال: زورانسری بیگواہ ءُ شھیدانی برجاھیں شدکشین زھرشانی گدان ءَ 4646 روچ سرجم بیتگ۔ چارشمبے ءِ روچ ءَ بلوچ وتن پارٹی ءِ آرگنائزر ھیدر رئیسانی، سردار آسپ مری، مھمد اکرم ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ سرجمیں بلوچستان ءِ ھاس مکران ءَ در رھبندی زورانسری بیگواھی ءُ لشکر کشی ءِ درچ چہ گوست ءَ گیش کنگ بیتگ۔ بلوچ جنین زورانسری بیگواھی ءِ نشانگ کنگ بیگ ءَ اَنت۔ ھوشاپ ءَ ناشرکاریں سی ٹی ڈی لشکر ءِ دست ءَ درکانودی دزگیر کنگ بیتگیں جنین نورجان انگت یل کنگ نہ بیتگ نہ آئی کھول ءَ پیش دارگ بیتگ۔ نورجان گوں پزل ء مھمد الی نامیں مردمے ءَ یکیں وھد ءَ دزگیر کنگ بیتگ، چم دیستگیں مردمانی رد ءَ پزل چہ کولواہ ءِ ھند بدرنگ ءَ آوار جنگ بیتگ۔ انوں دوئینانی دزگیری ءَ ھواری ءَ پدر کنگ ءَ اَنت دروگ ءُ سر ءَ دروگ بندگ ءَ اِنت کہ اے اُرشے ءَ روگ ءَ بیتگ اَنت۔ آ چونیں گنوکیں مردمے کہ شپ ءَ وتی گِس ءَ بہ وپس ایت ءُ وتکش جیکٹ ءَ گور ءَ بہ کنت۔ ریاست ءِ دروگ آئی پروش ورگ ءَ پدر کنگ ءَ اَنت کہ شھریانی ھک دیگ ءَ بے سوب بیتگ۔ ماما کدیر ءَ وتی درشان ءِ گڈی ءَ گوشتگ کہ ما گوں میان استمان ءِ ایمن برجاہ داروکیں ادارھاں لوٹ کنیں کہ آ وت اے جنگی میارباری ءِ سر ءَ ھیال گوْر بہ کن اَنت ءُ لّس مردمانی ھک دیگ ءَ کمک ءَ بہ کن اَنت۔ بنشون: درشان |اکس: ماما کدیر