کراچی: بیگواھیں مردم ءُ شھیدانی شُدکشیں زھرشانی گدان ءَ 4946 روچ سرجم بیتگ۔چار شمبے ءِ روچ ءَ چہ پنجگور ءَ سیاسی ءُ چاگردی کارکن جمیل اھمد، راشد ، اللّه بکش ءُ آدگہ گدان ءَ اتکگ ءُ گوں بیگواھیں مردمانی کھولاں ھمدردی درشان کُرتگ۔
وی بی ایم پی ءِ کمک سرکماش ءَ گوں مردماں تران کُرتگ ءُ گْوشتگ کہ ما چہ پاکستان ءِ تھی کارانی وزیر رانا سنااللہ ءَ جُست کنگ لوٹیں کہ تو گْوستگیں سال ءَ شال ءَ بیگواھیں مردمانی گدان اَت ءُ کولے کُرت ءُ شُت ئے،کُج اِنت تئ گزارش ءُ کجام باروا تو کار کُرتگ،مارا ھم سرپدی بہ دئے۔ ما سرپدیں چیریں ادارھانی دیم ءَ شُما بے وس اِت ءُ بیگواھیں سیاسی کن ماں تھاریں کوٹیاں آزار سَگگ ءَ اَنت،شُما پرچہ آیانی دمانے ءِ چارگ ءَ اوپار کُرت نہ کن اِت کہ اود ءَ بلوچ سیاسی ورنا،کماش،زھگ ءُ جنینانی گون ءَ چے بیگ ءَ اِنت۔آئی ءِ ماں بلوچستان ءَ تَر ءُ گرد بس اکس،تامُر ءُ کسمانک بیتگ اَنت۔
آئی ءَ گْوشتگ کہ ھمے وڑ ءَ وھدے کہ بیگواھیں مردمانی پَد جنگ ءِ نام ءَ جوڑ کنگ بیتگیں پَتر بیگواھیں مردمانی کھولاں لوٹائین اَنت گڑا دُرساں پیش ھمے جُست ءَ کن اَنت کہ منانک بیار اِت،ما ھزاراں منانک داتگ،اکس ءُ کھولانی پریس کانپرنس،روتاکانی درشان،پاکستان ءِ پیشیگیں تھی کارانی وزیر آپتاب شیر پاؤ ءِ گپ ھست اَنت،بلوچستان ءِ انیگیں وتگڑیں تھی کارانی وزیر ءِ گپ،وی بی ایم پی ءِ مردمانی جوڑ کُرتگیں لَڈ کہ چنچو بلوچ بیگواہ کنگ ءُ آیانی ژانگولیں جون دور دیگ بیتگ اَنت دُرس یاداشت اَنت۔اے دُرسیں یاداشت ءُ منّانک تئ زِرد ءُ چمانی پچ کنگ ءَ بَس نہ اَنت۔
ماما کدیر ءَ گْوشتگ کہ جُھد ءِ تہ ءَ دزگیری،آوار جنگ،شھیدی،دودمان ءُ مردمی اگبال لپاشگ بنت۔ بلوچستان یک زورگِپتیں دمگے کہ میان استمانی کانود ءِ رد ءَ گوں بلوچ سیاسی بندیگاں جنگی بندیگانی وڑ ءَ کنگ بیگ ءَ اِنت۔
بنشون: درشان | اکس: ماماکدیر
