ریڈیو زْرمبش بلوچی | ریڈیو زْرمبش بلوچی

یو بی اے ءِ یکِر کُرتگیں جارکش ءَ وتی یکِر کنگ ءِ سْوڑگ رَد کُرتگ

یو بی اے ءِ یکِر کُرتگیں جارکش ءَ وتی یکِر کنگ ءِ سْوڑگ رَد کُرتگ

OCT

08

شال: یوبی اے ءَ گل ءِ بنجاھی جارکش مرید ءِ باسکی ھلاس کُرتگ ءُ چہ جارکشی ءَ یَکِر کُرتگ۔دومی نیمگ ءَ مرید ءَ اے گپ رد کُرتگ اَنت ءُ یو بی اے ءِ نام ءَ وتی گل ءِ چیست ءُ ایرانی برجاہ دارگ ءِ جار جتگ۔ گْوستگیں روچ ءَ یو بی اے ءِ جارکش مزار ءِ نیمگ ءَ شنگ کنگ بیتگیں درشانی ءَ گْوشگ بیتگ اَت کہ سنٹرل کمیٹی ءُ ھائی کمان ءِ تپاکی ءِ دیوانے ءَ سْوڑگ کنگ بیتگ کہ گل ءِ شونداتانی بنیاد ءَ مرچی ءَ پد گل ءِ جارکش تیوک ءَ مزار بلوچ بیت۔مرید چہ باسکی ءُ جارکشی ءَ یکِر کنگ بیت سنٹرل کمیٹی ءِ مدامی پگر کنگ ءَ پد یو بی اے ءِ کماندار سرپراز بنگلزھی چہ گل ءَ کشگ ءُ دیمتر ءَ سرپراز ءِ ھچ پیمیں کار ءُ کِرد ءِ زمہ واری گل ءِ سر ءَ نہ بیت۔ درشان ءِ تہ ءَ گْوشگ بیتگ کہ سنٹرل کمیٹی ءَ گل پہ آوکیں باندات ءِ جاورانی رد ءَ گھتر ءُ توانمند کنگ ءَ بازیں سْوڑگے کنگ بیتگ کہ آ رسانکدر ءَ شنگ کنگ نہ بنت۔ اے بابت ءَ یو بی اے ءِ یکِر کُرتگیں جارکش مرید ءَ وتی درشان ءِ تہ ءَ یکِر کنگ رد کُرتگ ءُ گْوشتگ کہ یو بی اے ءِ ھائی کمان ءُ سینٹرل کمیٹی چہ بندات ءَ نیست۔گل ءَ ھندی ءُ دمگی کماندار سرڈگار ءِ سر ءَ کمان کنگ ءَ اَنے ءُ گل سرپراز بنگلزھی ءِ جپاکشی ءُ گھتریں جنگی شونداتانی بنیاد ءَ برجاہ اِنت۔ما بلوچ راج ءَ سرپد کنگ لوٹیں کہ گل ءِ کماندار ءَ ھم سنتی ءُ ھم پتّی ءِ سزا دئگ بیتگ۔اے بابت ءَ یو بی اے ءِ براس ءِ گون ءَ ھم سنت بیگ ھم ھوار اِنت۔اے بابت ءَ وتگڑیں ھائی کمان تُرس ءِ آماچ بیتگ چے ءَ کہ آ ھم سنت ءُ ھم پتّی ءِ نہ لوٹ اَنت بلکیں آ مدام جھانی زوراکانی پیم ءَ بلوچ زْرمبشت ءَ یک پریشر گروپے ءِ ھدّ ءَ دارگ لوٹ اِنت ایشی ءِ بگیری ءَ گل ءِ کماندار ءَ مدام راھبندی گھگیری کُرتگ۔ درشان ءِ تہ ءَ دیمتر ءَ گْوشگ بیتگ کہ گل ءِ دمگی کماندارانی شور ءُ سلاہ ءَ پد ھمے سْوڑگ کنگ بیتگ کہ گل سرپراز بنگلزھی ءِ چیردستی ءَ وتی جنگی کاراں برجاہ دار ایت۔ جارکش مرید ءَ گْوشتگ کہ شور ءُ سلاہ ءِ گون ءَ یک کماندارانی یک بنجاھی پترے اڈ دیگ ءُ گل ءِ تھی جیڑھانی گیش ءُ گیوار کنگ ءِ جُھد کنگ بیت۔داں گل ءِ تھی بگیری،ترامگیج سازی،زمہ واریانی بھر ءُ بانگ راجمستری ءِ بنیاد ءَ کنگ بہ بنت داں وتسری گر ءُ دار کنگ بہ بنت۔


بنشون: درشان | اکس: دامگ