ریڈیو زْرمبش بلوچی | ریڈیو زْرمبش بلوچی

تربت:کمک دمگدار کیچ ءِ آل پارٹیز ءُ شھید رامیز ءِ کھول ءِ گون ءَ گپءُ تران بے سوب بیتگ

تربت:کمک دمگدار کیچ ءِ آل پارٹیز ءُ شھید رامیز ءِ کھول ءِ گون ءَ گپءُ تران بے سوب بیتگ

OCT

02

کیچ ءِ کمک دمگدار ءِ آل پارٹیز ءُ شھید رامیز ءِ کھول ءِ گون ءَ گپ ءُ تران یکبرے پد ءَ بے سوب بیتگ۔آل پارٹیز ءَ کمک دمگدار ءِ لوٹ رد کُرتگ اَنت ءُ گوں شھید ءِ کھول ءِ گون ءَ نندانک ءِ جار جتگ۔ شھید رامیز ھلیل ءِ لاش ءِ گون ءَ آل پارٹیز کیچ ءُ کھول ءِ نندانک داں شپ ءَ شھید پدا چاراہ ءَ برجاہ بیتگ۔مرچی دو رند ءَ کیچ ءِ کمک دمگدار ءَ گوں کھول ءُ آل پارٹیز ءِ گون ءَ گند ءُ نند کُرتگ بلے دوئیں رنداں گند ءُ نند بے سوب بیتگ۔ کمک دمگدار ءَ دومی رند ءَ پہ گپ ءُ تران کنگ ءَ کھول ءِ مردم ءُ آل پارٹیز ءِ ٹولی یے وتی منندی جاہ ءَ لوٹائینتگ دراجیں گپ ءُ تران ءَ پد پد ءَ بے سوب بیتگ ءُ گپ ءُ تران ءِ بے سوبی ءَ پد آل پارٹیز کیچ ءِ سرکماش مشکور انور ایڈوکیٹ ءَ نندانک ءَ تران کُرتگ ءُ گْوشتگ کہ کمک دمگدار ءُ واکدار لاش ءِ کَل کنگ ءِ لوٹ ءَ کنگ ءَ اَنت ءُ اے دلجمی اِش داتگ کہ آ گوں بُرز ءِ واکداراں کھول ءِ لوٹاں سر کن اَنت ءُ لوٹانی پیلو کنگ ءِ دزبندی ءَ ھم کنت۔ آئئ گْوشتگ کہ آل پارٹیز ءَ کھول ءِ نیمگ ءَ چہ کمک دمگدار ءَ ھلیل رند ءِ زوت یل کنگ،وئیل ءَ ھواریں کارمندانی بگیری ءَ کارروائی کنگ ءُ گس ءِ سر ءَ بیڑ برگ ءِ سْوب ءِپدر کنگ ءَ پد لاش کَل کنگ بیت۔بلےکمک دمگدار ءَ چہ اے گپاں پد پھلی لوٹ اِتگ۔ آئی جار جتگ کہ آل پارٹیز کیچ زریپ رند ءِ کھول ءِ گون ءَ ھرھساب ءَ ھمراھداری کنت داں وھدے کھول زھرشانی کنگ ءَ اِنت ما گوں آیاں ھمراھدار بیں۔ ھمے درگت ءَ بی ایس او ءِ سرکماش زریپ رند ءَ تران کنان ءَ آل پارٹیز کیچ، تربت سول سوسائٹی ءُ لس مردمانی منت گیپتگ کہ زھرشانی ءَ گوں من ساڑی اَنت۔ آئی گْوشتگ کہ اے کار استان ءِ زوراکی ءُ رستری ءِ منانک اِنت اگاں بلوچ راج ءَ اے زوراکی ءُ رستری ءِ بگیری ءَ توار چِست نہ کُرت گڑا استان ءِ لشکر ھمک روچ یکے ءِ گس ءَ دور کنت ءُ لاشانی چگل دیگ ءَ بندات کنت۔ آئی گْوشتگ کہ اگاں رامیز کُشگ بیتگ گڑا زی ھیات تیر جنگ بیتگ،ایشی ءَ پیش ملکناز شھید ءُ برمش ٹپی کنگ بیتگ اگاں ما بنداتی روچاں اے وئیلانی بگیری ءَ توار چِست بہ کُرتیں گڑا مرچی اے نوبت نیاتکگ اَت۔اے ھما رامیز اِنت کہ پہ برمش ءِ ھک ءُ زوراکی ءِ بگیری ءَ دگانی سر ءَ درکپتگ ءُ زھرشانی یے کُرتگ اَت کہ مرچی آئی ءِ جند ءِ لاش ھک لوٹگ ء ُزھرشانی کنگ ءَ اِنت۔ آئی گْوشتگ کہ رمیز ایوک ءَ منی برازتک نہ اِنت راج ءِ زھگ اِنت اگاں آئی لاش ھمے دگ ءِ سر ءَ بہ گھیت ھم ما چہ اِد ءَ پاد نیائیں۔سرکار ءِ کِر ءَ بمب،ٹوپ ءُ سلاہ ھست بئیت مارا بہ کُش ایت۔چے ءَ کہ گسانی تھا دور کنگ ءُ کُشگ آئی ءِ کار جوڑ بیتگ۔ آئی گْوشتگ کہ بلوچ راج ءِ توانمندی ءُ شرپ ءَ توار پِرینگ ءُ گْوشگ ءَ اِنت کہ آ وتی سرڈگار ءِ سر ءَ ایر دست اِنت۔استان ءِ ترامگیج وتی دل ءِ تب ءَ چے کہ بہ لوٹ اَنت کُرت کن اَنت بلے آئی ءَ سرپد بیگ لوٹیت کہ آ روچ سِلیں روچے بیت وھدے بلوچ جنین ایشاں گْورجیگ ءَ گِر اَنت ءُ جُست کن اَنت۔ پہ نندانک ءِ نشتگیں مردماں جماعت اسلامی کیچ ءِ نیمگ ءَ نوپاد ءُ کمبل آرگ بیتگ۔


 


بنشون:دمگی اھوالکار/اکس:اھوالکار