تربت: زور بیگواھیں ٹیچر ءُ بلوچی زبان ءِ گشندہ رپیک اومان ءِ جنک ءُ آدگہ سیاداں آئی زوریں بیگواھی ءِ نوہ سال سرجم بیگ ءَ تربت پریس کلب ءَ پریس کانپریس کرتگ ءُ رپیک اومان ءِ آجوئی ءَ لوٹ کرتگ۔
پریس کانپریس ءَ آیانی گوشگ اِنت کہ رپیک اومان 21 ستمبر 2014 ءَ پہ سرکاری کارے ءَ زانشتی بھرگ ءِ کارگس ءَ آتکگ ءُ وتی کارنی کنگ ءَ پد ڈنک ءِ نزیک ءَ پجار نہ بیتگیں سلاہ بندیں مردماں آوار جتگ ءُ بیگواہ کرتگ۔ پد ءَ ھما اِنت کہ چہ مئے درسیں جھداں اَبید آ انگت ءَ اجو کنگ نہ بیتگ۔
آئی ءَ گوشتگ کہ رپیک اومان سرکاری وانگجاہ ءَ ھیڈ ماسٹر بیتگ، گوں ایشی ءِ ھواری ءَ آئی بلوچی زبان ءَ سوت گوشتگ چہ اے دوئیں کاراں اَبید نہ کدی چہ گس ءَ ڈن ءَ شتگ ءُ نہ دگہ درکانودی کارے ءَ ھوار بیتگ۔ اگاں آوار جنوکیں مردمانی کِر ءَ رپیک اومان ءِ چہ اے دوئیں کاراں اَبید دگہ درکانودی کارے ءَ ھوار بیگ ءِ گپے ھست مارا بہ گوش اَنت دانکہ ما دلجم بہ بیں راستے آ کانود ءِ چماں میابارے بیتگ۔ اگاں آوار جنوکانی کِر ءَ دگہ ھچ گواہ نیست مئے نوہ سال آزار دیگ ءَ پد رھم بہ کن اَنت ءُ آئی آجو بہ کن اَنت دانکہ آئی ءِ آجوئی ءِ وشی مئے نسیب ءَ بہ بیت ءُ ما نوہ سال ءِ درداں بے ھال بہ کن ایں۔
آئی ءَ گوشتگ کہ پہ رپیک اومان ءِ آجوئی ءَ ما وتی گنجاھش ءِ رد ءَ پہ انساپ ءِ لوٹ ءَ ھمک در ٹک اِتگ، ما گوں واکدار ءُ سروگانی گندگ، وزیر ءُ مشیرانی گون ءَ گند ءُ نند کرتگ بزاں پہ انساپ ءِ لوٹ ءَ ما وتی گُڈی واک ءَ داں آمیدگس ءَ شتگ ءُ وتی کیس یاداشت کرتگ۔ بلے بدبھتی ءَ ڈیھ ءِ آمیدگس ءِ نزام تباہ اِنت ایشی ءِ پارست ءَ انساپ رسگ ءِ ھچ اوست نیست۔ ما لاچار ءُ نادز رسیں پمیشکا چہ آمیدگس ءَ انساپ ءِ لوٹگ ءَ کن ایں۔ اے ڈیھ ءِ آمیدگس پہ انساپ ءَ ھشکیں نامے۔
آئی ءَ گوں چیپسٹس ءُ وتگڑیں وزیر، سیاسی ٹولیانی گون ءَ رپیک اومان ءِ آجوئی ءَ لوٹ کرتگ۔
بنشون: پریس کانپریس/ اکس: اھوالکار
