ریڈیو زْرمبش بلوچی | ریڈیو زْرمبش بلوچی

تربت:پولیس ءِ دست ءَ کشگ بیتگیں دہ سالی رامیز ءِ کوش ءِ بگیری ءَ مرچی دومی روچ اِنت زھرشانی برجاہ اِنت

تربت:پولیس ءِ دست ءَ کشگ بیتگیں دہ سالی رامیز ءِ کوش ءِ بگیری ءَ مرچی دومی روچ اِنت زھرشانی برجاہ اِنت

OCT

03

کیچ ءِ بنجاھی شھر تربت ءَ گْوستگیں روچ ءَ بلیدہ پولیس ءِ دست ءَ دہ سالی زھگ رامیز ءِ کوش ءِ بگیری ءَ مرچی دومی روچ اِنت کہ تھتگ بند زھرشانی برجاہ اِنت۔ کھول ءُ سیاسی گلانی ھندی سروک زھگ ءِ لاش ءِ ھواری ءَ شھید پدا چاراہ ءَ نشتگ اَنت۔ آدینگ ءُ شمبے ءِ میانی شپ ءَ کیچ ءِ ھند بلیدہ ءَ پاکستانی پولیس ءَ بی ایس او ءِ سرکماش زریپ رند ءِ گس ءَ بیڑ بُرتگ اَت ءَ تیرگْواری ءِ آسر ءَ زریپ ءِ دہ سالی برازتک رامیز ھلیل بیران ءُ ھشت سالی رایان ھلیل ٹپی بیتگ اَت۔وئیل ءِ بگیری ءَ آل پارٹیز کیچ ءِ دزبندی ءَ تربت شھر ءَ مرچی تھتگ بند ھڑتال کنگ بیتگ،ھڑتال ءِ سْوب ءَ دُرسیں باپاری بنجاہ بند کنگ بیتگ۔ تیر گْواری ءِ آسر ءَ بیران بیتگیں رامیز ھلیل ءِ کھول لاش ھمراھی ءَ زیکین اِنت کہ شھید پدا چاراہ ءَ زھراشانی کنگ ءَ اَنت ءُ زھرشانی نندانک ءَ کیچ ءَ سیادی داروکیں جتائیں پگر ءُ لیکھانی مردماں مزنیں کچے ءَ بھر زُرتگ۔ گْوستگیں روچ ءَ کیچ ءِ کمک دمگدار ھسین جان نندانک ءَ اتکگ اَت ءُ گوں کھول ءِ مردماں گپ ءُ تران کُرتگ اَت بلے گپ ءُ تران بے سوب بیتگ اَت ءُ کھول ءِ مردمانی لوٹ ھمے بیتگ اِت اَنت کہ وئیل ءَ ھواریں کارمند دزگیر کنگ ءُ آمیدگس ءَ پیش کنگ بہ بنت اگاں نہ زھرشانی نندانک لاش ءِ ھواری ءَ برجاہ بیت۔ کمک دمگدار ءِ رد ءَ گْوستگیں روچ ءَ بلیدہ ءَ بیتگیں وئیل ءَ ھندی واکدار ھوار نہ اَنت بلکیں اے کارروائی سی ٹی ڈی ءِ نیمگ ءَ کنگ بیتگ۔ چہ بلیدہ ءَ سیادی داروکیں وتگڑیں بلوچستان اسمبلی ءِ وزیر گھبد زھور بلیدی ءِ رد ءَ بلیدہ ءَ پولیس ءَ نودربر یاسر زپر ءِ کوش ءِ نام گیپتیں کشندہ ءِ دزگیر کنگ ءَ بیڑ بُرتگ کہ ھمے میان ءَ کودکیں زھگ رامیز ھلیل بیران بیتگ۔ زھور بلیدی ءِ گْوشگ اِنت کہ پولیس ءِ رد ءَ میار بار ءِ دزگیر کنگ ءِ میان ءَ پولیس ءِ گون ءَ گھگیری ءَ دو نیمگی تیرگْواری ءَ جانی تاوان بیتگ۔ اے بابت ءَ بی ایس او ءِ سرکماش زریپ رند ءَ سرکار ءِ گپ رد کُرتگ اَنت ءُ گْوشتگ کہ دونیمگی تیرگْواری ءِ گپ دروگ اَنت ءُ سرکار اے گپ ءَ پمشکہ کنگ ءَ اِنت داں وتی میار ءَ چے بہ دنت۔ آئی گْوشتگ کہ پولیس ءَ گس ءَ بیڑ بُرتگ ءُ واب بیتگیں زھگ ءُ جنینانی سر ءَ تیر گْواری کُرتگ چہ ایشی ءَ یک زھگے بیران ءُ یکے ٹپی بیتگ ءُ ھلیل اھمد انگت بیگواہ اِنت۔ما پہ آئی ءِ زندگی ءَ پریشانیں۔ آئی گْوشتگ اگاں اِد ءَ مارا ھک مہ رس ایت گڑا ما لاش ءَ زورین ءُ شال ءَ بلوچستان اسمبلی ءِ دیم ءَ نندانک دئیں۔


بنشون:دمگی اھوالکار/اکس:چاگردی رسانکدر