ریڈیو زْرمبش بلوچی | ریڈیو زْرمبش بلوچی

JAN

11
11 / 01 / 2022 روتاک 143

????روتاک: *ریڈیو زْرمبش بلوچی*


☀️رمس: سَے شمبے،11 جنوری 2022                      


✏️ *سرھال*✏️


 


️✏️*بی آر اے ءِ بیبگر ءُ یو بی اے ءِ مرید وتی ھواریں درشانی ءَ بی آر اے ءُ یوبی اے ءِ ھلاس کنگ ءُ نوکیں گھگیری گل "بلوچ نیشنلسٹ آرمی" (بی این اے) ءِ جوڑ کنگ ءِ جار جتگ* ️


✏️*بی ایل ایپ ءِ جارکش میجر گھرام پنجگور ءَ پاکستانی لشکر ءِ چریک سپی اللہ ءُ دشت ءَ پاکستانی لشکر ءِ یک کارمندے کوش ءِ زمہ واری من اِتگ*


✏️*بی ایل اے ءِ جارکش آزاد ءَ گْوشتگ کہ بولان ءَ زورگریں پاکستانی لشکر ءِ سر ءَ اُرش کُرتگ ءُ چار کارمند کُشتگ* ✏️*کیچ: تمپ ءِ میتگ تَلّوکان ءَ پاکستانی لشکر ءَ چار مردم آوار جنگ ءَ پد بیگواہ کرتگ*


✏️*ھندی میرانی اوست ءَ نندگ ءَ گھتر اِنت کہ بیگواھیں مردمانی کھول وتی مردمانی ڈَس ءُ نشاناں وی بی ایم پی ءِ کِر ءَ یاداشت بہ کنائین اَنت۔ سمی دین مھمد*


✏️*ھاران ءَ لیویز کارمند ءِ دست ءَ آوار جنگ ءُ بدکاری ءِ نشانگ کنگ بیتگیں جنین ءِ کُنٹ دزکپتگ*


✏️*سَے شمبے ءِ روچ ءَ کولواہ ءِ زرباری کوھاں پاکستانی لشکر ءَ لشکرکشی کُرتگ*


✏️*ڈیرہ اللہ یار ءَ پجار نہ بیتگیں سلاہ بندیں مردمانی تیرگْواری ءَ دو مردم بیران ءُ دو ٹپی بیتگ*


✏️*سبی ءَ سلاہ بندیں مردماں پاکستانی لشکر ءِ پانگس ءِ سر ءَ اُرش کُرتگ*


✏️*بیلہ ءَ سلاہ ءِ آس برگ ءَ یک مردمے بیران بیتگ* ✏️*اکوامتھدہ ءَ گْوشتگ اگاں اوگانستان ءَ مالی کمک کنگ مہ بیت اود ءِ مردم چہ گُژن ءَ مِر اَنت*


✏️*گوریچانی کوریا ءَ دگہ یک بیلیسٹک میزائلے ءِ چکاس اِتگ،شش روچ ءِ تہ ءَ اے دومی میزائل چکاس اِنت* ️


✏️*چین ءَ اوگانستان ءِ سپیر چہ وتی اگدہ ءَ دزکش بیتگ،دزکشی ءِ بابت ءَ آئی گْوشگ اِنت کہ تالبان سرکار ءِ آھگ ءَ پد من ءَ ھوار سپارتجاہ ءِ ھچ کارمند ءَ پگار دیگ بیگ ءَ نہ اِنت* ️✏️*یوکرائن ءِ جیڑہ ءِ گیش ءُ گیوار کنگ ءَ امریکا ءُ روس ءِ میان ءَ گپ ءُ تران بیتگ*   


              ✒️ *سرجمیں ھال*✒️ ️


 


✒️ *بی آر اے ءِ بیبگر ءُ یو بی اے ءِ مرید وتی ھواریں درشانی ءَ بی آر اے ءُ یوبی اے ءِ ھلاس کنگ ءُ نوکیں گھگیری گل "بلوچ نیشنلسٹ آرمی" (بی این اے) ءِ جوڑ کنگ ءِ جار جتگ*


 


???? بلوچ استمانی لشکر (بی آر اے) ءِ جارکش بیبگر ءُ بلوچ ھم سنتیں لشکر (یو بی اے) ءِ جارکش مرید ماں رسانکدر ءَ وتی ھواریں شنگ کُرتگیں درشانی ءَ گْوشتگ کہ بی آر اے ءُ یو بی اے ءِ بُنجاھی کماندارانی دیوانے ماں زورگِپتیں بلوچستان ءَ برجم دارگ بیتگ،دیوان ءَ بلوچ راجی راجکاری ءُ گھگیری جنگ ءِ سر ءَ گپ ءُ تران کنگ بیتگ۔دیوان ءَ بلوچ گھگیری جنگ ءِ تیز کنگ ءُ پاکستانی لشکر ءِ رستری ءُ ناشرکاری زوراکیانی دیم پہ دیمی کنگ ءَ بلوچ گھگیری ءِ توانمند کنگ ءَ بی آر اے ءُ یو بی اے ءِ ھلاس کنگ ءُ "بلوچ نیشنلسٹ آرمی" بزاں بی این اے ءِ نام ءَ راجی گھگیری ءِ جنگ ءِ برجاہ دارگ ءِ جار جنگ بیتگ۔ بی این اے ءِ رسانکدری جارکش بس مرید ءُ گل ءِ تندجاہ ءِ نام"باسک" بیت۔بی این اے ءِ چو پیشگیں بی ار اے ءِ وڑ ءَ "بلوچ راجی آجوئی سنگر  (براس) ءِ بھر بیت۔ بلوچ نیشنلسٹ آرمی ءِ بنجاھی کماندرانی پتر گل ءِ دُرسیں گھگیری چِست ءُ ایرانی سروکی ءَ کنت۔گل کول کنت کہ داں زورگریں لشکر ءُ آئی ءِ کمکارانی دراھگ ءَ وتی جُھد ءَ برجاہ دار ایت ءُ گوں نوکیں لوٹ ءُ شونداتاں جنگ ءَ تیز تِر کنت۔


✒️*بی ایل ایپ ءِ جارکش میجر گھرام پنجگور ءَ پاکستانی لشکر ءِ چریک سپی اللہ ءُ دشت ءَ پاکستانی لشکر ءِ یک کارمندے کوش ءِ زمہ واری من اِتگ*


 


????بلوچستان آجوئی سنگر (بی ایل ایپ) ءِ جارکش میجر گھرام پاکستانی لشکر ءِ چریک سپی اللہ ءِ کوش ءِ زمہ واری منّ اِتگ ءُ گْوشتگ کہ سرمچاراں دہ جنوری ءَ پنجگور ءِ چتکان تارآپس ءَ پاکستانی لشکر ءِ چریک سپی اللہ  ء ماسٹر اکبر نشانگ کُرتگ ءُ کُشتگ۔ جارکش ءَ گْوشتگ کہ سپی اللہ پاکستانی لشکر ءِ چریکے بیتگ ءُ بلوچانی آوار جنگ ءُ بازیں لشکرکشیاں پاکستانی لشکر ءِ کمکار بیتگ۔پنجگور دمگ ءَ دُزّی،باجگری ءُ دگہ چاگردی سِلکاریاں ھوار بیتگ۔ آئی گْوشتگ کہ سپی اللہ ءُ آئی ءِ برات یک سلاہ بندیں گلے ءِ باسک بیتگ اَنت بلے پد ءَ دوئیناں سلاہ دور داتگ ءُ باجو بیتگ اَنت۔ میجرگھرام گْوشتگ کہ سپی اللہ 27 اپریل2020 ءَ کلہ کور پروم ءَ میجر نورا ءُ آئی ءِ ھمبلانی شھید کنگ ءَ تچکی ءَ ھوار بیتگ ءُ اے میڑ ءَ آئی ءِ مستریں برات شُگراللہ ء ماسٹر اکبر کُشگ بیتگ اَت۔ آئی گْوشتگ کہ سپی اللہ ءِ سر ءَ اُرش کنگ ءِ وھد ءَ ھزور بکش نامیں مردمے بیران بیتگ۔آ بےمیارے ءُ ما گوں آئی ءِ کھول ءَ ھمدردی درشان کن ایں۔یکبرے پد ءَ چہ لس مردماں دزبندی کن ایں کہ آ چہ پاکستانی لشکر ءِ کُشندہ ٹولی ءِ کارمنداں وت ءَ گستاہ بہ دار اَنت۔پاکستانی لشکر ءِ چریک سرمچارانی نشانگ ءَ اَنت چے ءَ کہ آ بلوچ چُکچینی ءَ تچکی ءَ پاکستانی لشکر ءِ کمکار اَنت۔ میجر گھرام ءَ وتی دگہ درشانی ءَ کیچ ءَ پاکستانی لشکر ءِ سر ءَ اُرش ءِ زمہ واری منّ اِتگ: میجر گھرام گْوشتگ کہ ھشت جنوری ءَ سرمچاراں دشت ءِ نوکیں راہ ءَ برجاھیں پاکستانی لشکر ءِ پانگس ءَ اسنائپر توپک ءِ سر ءَ نشانگ کُرتگ ءُ یک کارمندے کُشتگ۔


 


✒️*بی ایل اے ءِ جارکش آزاد ءَ گْوشتگ کہ بولان ءَ زورگریں پاکستانی لشکر ءِ سر ءَ اُرش کُرتگ ءُ چار کارمند کُشتگ*


 


????بلوچ آجوئی لشکر (بی ایل اے) ءِ جارکش آزاد ءَ ماں رسانکدر ءَ وتی شنگ کُرتگیں درشانی ءَ گْوشتگ کہ گْوستگیں روچ ءِ مگرب ءِ وھد ءَ سرمچاراں زورگِپتیں بلوچستان ءِ دمگ بولان ءِ انڈیسہ ءُ جاپری ءِ میانجی ءَ برجاھیں زورگریں پاکستانی لشکر ءِ پانگس ءِ سر ءَ گوں مزن ءُ نوکیں سلاھاں اُرش کُرتگ۔اُرش ءَ دُژمنیں لشکر ءِ چار کارمند مُرتگ۔ جارکش ءَ گْوشتگ کہ اُرش ءَ پد زورگریں لشکر ءِ جنگی بالگرد پہ کمک ءَ اَتکگ اَنت ءُ وتی ٹپی ءُ مُرتگیں کارمندانی کُنٹ بُرتگ اَنت۔ آزاد ءَ وتی درشان ءِ گُڈی ءَ گْوشتگ کہ مئے اُرش زورگریں پاکستانی لشکر ءِ سر ءَ داں زورگِپتیں بلوچستان ءِ آجوئی ءَ برجاہ بنت۔


✒️ *کیچ: تمپ ءِ میتگ تَلّوکان ءَ پاکستانی لشکر ءَ چار مردم آوار جنگ ءَ پد بیگواہ کرتگ*


 


????کیچ ءِ ھند تمپ ءِ میتگ تَلّوکان ءَ دوشمبے ءُ سَے شمبے ءِ میانی شپ ءِ ادار دو ءَ پاکستانی لشکر ءَ بیڑ برتگ زھگ ءُ جنین زوراکی ءِ نشانگ کُرتگ اَنت ءُ سِے مردم زاکر ء ناسر، نجیب ء نور بکش ءُ مُسدک ء ملا ھیدر آوار جتگ ءُ بیگواہ کرتگ اَنت۔ ھمے وڑ ءَ تمپ ءِ ھند بالیچہ ءَ گوستگیں سال ءِ 29 دسمبر 2021 ءِ بیگاہ ءِ ادار پنچ ءَ پاکستانی لشکر ءَ بیڑ برتگ، باھڈ ء یاکوب آوار جنگ ءَ پد گوں وت برتگ کہ انگت بیگواہ اِنت۔


✒️*ھندی میرانی اوست ءَ نندگ ءَ گھتر اِنت کہ بیگواھیں مردمانی کھول وتی مردمانی ڈَس ءُ نشاناں وی بی ایم پی ءِ کِر ءَ یاداشت بہ کنائین اَنت۔ سمی دین مھمد*


 


???? بیگواھیں ڈاکٹر دین مھمد ءِ جنک ءُ بیگواھیں بلوچانی توار ءِ کمک کارگشاد سمی دین گوشتگ کہ بیگواھیں مردمانی کھول ھندانی میرانی اُوست ءَ نند اَنت ءُ وتی بیگواھیں مردمانی بیگواھی ءِ بابت ءَ کانود ءِ رد ءَ یاداشت نہ کن اَنت۔ چہ ایشی ءَ کانود ءِ رد ءَ اے مردمانی پد جنگ مزنیں جنجالے جوڑ بیت۔  آئی گوشتگ کہ ھندی میر ءُ مھترانی اوست ءَ نندگ ءَ گھتر اِنت کہ وتی بیگواھیں مردمانی زندگیاں تُرس ءِ آماچ مہ کن اِت، چہ شمئے بے تواری ءَ آ ژانگولیں لاشانی دروشُم ءَ شُمارا دست کپ اَنت۔ سمی دین گوشتگ کہ من یکبرے پد ءَ گوں بیگواھیں مردمانی کھولاں دزبندی کناں کہ کھول وتی بیگواھیں مردمانی بابت ءَ بیگواھیں بلوچانی توار ءِ گدان ءَ یاداشت بہ کن اَنت۔ آئی گوشتگ کہ بیگواھیں مردمانی کھول ءِ نیمگ ءَ کیس ءِ یاداشت کنگ ءَ گَل آیانی کیساں یاداشت کنگ ءَ پد بیگواھیں مردمانی کیس ءَ کانود ءِ رد ءَ دیم ءَ کاریت۔ آئی ءَ وتی درشان بی بی سی ءِ ھما گزارش دیم ءَ آؤرتگ کہ آئی ءَ بیگواھیں مردمے کہ پاکستانی لشکر ءِ دست ءَ زورانسری آوار جنگ ءَ پد آئی ءِ لاش دور دیگ بیتگ۔ گوں بی بی سی ءَ تران کناں ءَ ھاجی ناسر گوشتگ کہ یک جولائی 2019 ءِ شپ ءَ وھدے آ وتی گس ءَ واب بیتگ اناگت ءَ گس ءِ درا توار کرتگ۔ من در پچ کرتگ لشکر ءُ سادگ پوشاکیں لشکری کارمند ڈن ءَ اوشتوک بیتگ اَنت۔ ھاجی ناسر گوشتگ کہ آئی ءِ زھگ تربت ءَ بند بیتگ ءُ آئی ءِ زھگ ءِ رند ءَ لاش روکپتی بلوچستان ءَ دور دیگ بیتگ۔ آئی گوشتگ کہ من زھگ ءِ آوارجنگ ءُ بیگواہ کنگ ءِ وئیل ءَ پد وتی زھگ ءِ زورانسری بیگواھی ءِ بگیری ءَ ارزی نبشتہ نہ کرتگ۔ ایشی دو سوب بیتگ اَنت۔ یکے ھمے کہ منی زھگ تاوان دیئنت۔ دومی لشکر ءِ داتگیں دلبڈیاں کہ جُست ءُ پرس ءَ پد یل کنگ بیت۔ ھاجی ناسر گْوشتگ کہ من کیچ ءَ گوں استانی واکداراں گند ءُ نند کرتگ ءُ وتی زھگ ءِ یل کنگ ءِ لوٹ کرتگ، آ درساں من ءَ دلبڈی داتگ کہ تئی زھگ یل کنگ بیت۔


 


✒️*ھاران ءَ لیویز کارمند ءِ دست ءَ آوار جنگ ءُ بدکاری ءِ نشانگ کنگ بیتگیں جنین ءِ کُنٹ دزکپتگ*


 


????ھاران:گْوستگیں سال ءِ گُڈی روچاں واشُک ءِ شاھوگیڑی ءِ جھمنندیں 37 سالی جنین لیویز ءِ کارمند ءَ گوں وتی ھمراھاں آوار جنگ ءَ پد کُشتگ ءُ کُنٹ کَل کُرتگ اَت۔ جنین ءِ کُنٹ ھمے ھپتگ ءَ یکشمبے ءِ روچ ءَ دزکپتگ ءُ سرکاری واکداراں ھاران نادراھجاہ ءَ بُرتگ۔ اے بابت ءَ پولیس بُنشون ءِ رد ءَ کُشندہ یک مزنیں مردمے پمشکا پولیس آئی ءَ دزگیر کرت کنگ ءَ نہ اِنت۔ یات بہ بہ اِت کہ جنین لیویز کارمند ءَ گوں وتی ھمراھاں چہ گس ءَ توپک ءِ زور ءَ آوار جتگ اَت ءُ بدکاری ءِ نشانگ کنگ ءَ پد کُشتگ ءُ کُنٹ کَل کُرتگ اَت۔ وئیل ءِ بگیری ءَ جنین ءِ کھول ءَ پولیس ءِ کِر ءَ ارزی نبشتگ اَت بلے پولیس کُشندہ ءَ دزگیر کُرت کنگ ءَ نہ اِنت۔


 


✒️*سَے شمبے ءِ روچ ءَ کولواہ ءِ زرباری کوھاں پاکستانی لشکر ءَ لشکرکشی کُرتگ*


 


????کیچ:دوشمبے ءُ سَے شمبے ءِ روچ ءَ کولواہ ءِ زرباری کوھاں پاکستانی لشکر گوں بازیں کچے ءَ پترتگ جتا جتاھیں کوراں کنیچی، چَمبُر، چوڑین ءُ جَت ءَ  لشکر کشی کُرتگ۔ پاکستانی لشکر ءَ کورانی دپ ءَ سنگر گپتگ ءُ نشتگ۔اے بابت ءَ دگہ تاوان ءُ آوارجنی ءِ ھال داں مار ءَ سر نہ بیتگ۔


 


✒️ *ڈیرہ اللہ یار ءَ پجار نہ بیتگیں سلاہ بندیں مردمانی تیرگْواری ءَ دو مردم بیران ءُ دو ٹپی بیتگ*


 


????جاپرآباد:ڈیرہ اللہ یار ءَ چاراہ ءَ پجار نہ بیتگیں سلاہ بندیں مردمانی تیرگْواری ءَ دو مردم بیران ءُ دو ٹپی بیتگ۔پولیس بنشون ءِ رد ءَ ڈیرہ اللہ یار چاراہ ءَ سلاہ بندیں مردماں یک کارگاڑی یے ءِ سر ءَ تیرگْواری کُرتگ،چہ ایشی ءَ دو مردم داد اللہ بگٹی ءُ کویل اھمد بگٹی جاھی بیران ءُ دو مردم تارک الی ءُ دگہ یک مردمے ٹپی بیتگ اَنت۔لاش ءُ ٹپی بیتگیں نادراھجاہ ءَ برگ بیتگ اَنت۔بیران ءُ ٹپی بیتگیں بگٹی ٹک ءِ مردم اَنت ءُ وئیل کْوھنیں دینداری ءِ سْوب گْوشگ بیگ ءَ اِنت۔


 


✒️*سبی ءَ سلاہ بندیں مردماں پاکستانی لشکر ءِ پانگس ءِ سر ءَ اُرش کُرتگ*


 


????سبی:تندوری ءَ پجار نہ بیتگیں سلاہ بندیں مردماں پاکستانی لشکر ءِ پانگس ءِ سر ءَ اُرش کُرتگ۔اُرش ءَ پاکستانی لشکر ءِ جانی تاوان ءِ ھال اِنت۔اُرش ءِ زمہ واری انگت ھچ گل ءَ نہ زُرتگ۔


 


✒️*بیلہ ءَ سلاہ ءِ آس برگ ءَ یک مردمے بیران بیتگ*


 


????بیلہ ءَ گْوستگیں روچ ءَ سلاہ ءِ ساپ کنگ ءِ وھد ءَ سلاہ ءَ آس بُرتگ ءُ شست سالی اللہ ڈنہ ھاسھیلی جھمنند ملاں اھمد گوٹ اسھاکانی بیلا ٹپی بیتگ،پہ درمان کنگ ءَ کراچی ءَ برگ بیتگ کہ آئی ٹپانی درد نہ سَگ اِتگ اَنت ءُ نادراھجاہ ءَ بیران بیتگ۔


 


✒️*اکوامتھدہ ءَ گْوشتگ اگاں اوگانستان ءَ مالی کمک کنگ مہ بیت اود ءِ مردم چہ گُژن ءَ مِر اَنت*


 


????جنیوا: اکوام متھدہ ءَ وتی شنگ کُرتگیں درشانی ءَ گْوشتگ کہ اگاں جھانی توانمنداں مالی کمک نہ کُرت گڑ ءَ اوگانستان ءِ مردم چہ گُژن ءَ مِر اَنت۔آئی گْوشتگ کہ 2022 ءَ پہ گُژن ءُ جاندراھی ءِ گِر ءُ دار کنگ ءَ کم چہ کم 5 ارب ڈالر درکار بیت۔اکوامتھدہ ءَ گْوشتگ کہ دو دھکاں جنگ زدگیں اوگان راج ءَ چہ تباھی ءَ رکینگ ءَ 4.4 ارب ڈالر درکار اِنت ءُ 62 کروڑ 30 لک پہ اوگان باھوٹیاں کہ دگہ ڈیھاں باھوٹی زند گْوازینگ ءَ اَنت۔ ️


 


✒️ *گوریچانی کوریا ءَ دگہ یک بیلیسٹک میزائلے ءِ چکاس اِتگ،شش روچ ءِ تہ ءَ اے دومی میزائل چکاس اِنت*


 


????سیئول: گوریچانی کوریا ءَ دگہ یک بیلسٹک میزائل ئِے چکاس اِتگ۔شش روچ ءِ تہ ءَ اے دومی میزائل چکاس اِنت۔زرباری کوریا ءِ لشکری واکدارانی رد ءَ گوریچانی کوریا ءَ سَے شمبے ءِ سُھب ءَ میزائل چکاس کُرتگ ءُ رودراتکی زِر ءِ نیمگ ءَ جنگ بیتگ۔امریکی پتر پہ اکوامتھدہ کہ ایشی ءِ تہ ءَ امریکا،پرانس،آئرلینڈ،جاپان،برتانیا ءُ البانیہ ھوار اِنت،گْوستگیں ھپتگ ءُ بیتگیں گوریچانی کوریا ءِ میزائل چکاس اِیرجتگ اَت،بلے گوریچانی کوریا ءِ مھتر کم جونگ ءَ جھانی ایراد مانیارتگ اَنت ءُ ڈیھ ءِ دیمپانی ءِ مُھکم کنگ ءِ جار جتگ۔


 


✒️*چین ءَ اوگانستان ءِ سپیر چہ وتی اگدہ ءَ دزکش بیتگ،دزکشی ءِ بابت ءَ آئی گْوشگ اِنت کہ تالبان سرکار ءِ آھگ ءَ پد من ءَ ھوار سپارتجاہ ءِ ھچ کارمند ءَ پگار دیگ بیگ ءَ نہ اِنت*


 


????بیجنگ:چین ءَ اوگان سپیر جاوید اھمد کائم چہ وتی اُگدہ ءَ دزکش بیتگ۔اوگان سپیر ءَ چاگردی رسانکدر ءَ وتی یک ٹویٹے ءَ نبشتگ کہ گْوستگیں سال ءِ اگست ءِ ماہ ءَ تالبان ءِ سرکار ءِ آھگ ءَ پد سپارتجاہ ءِ ھچ کارمند ءَ پگار دیگ بیگ ءَ نہ اِنت۔


 


✒️*یوکرائن ءِ جیڑہ ءِ گیش ءُ گیوار کنگ ءَ امریکا ءُ روس ءِ میان ءَ گپ ءُ تران بیتگ*


 


????جنیوا: امریکا ءِ دری کارانی وزیر وینڈی شرمین گوں روس ءِ دری کارانی وزیر ءَ گند ءُ نند کُرتگ ءُ یوکرائن ءِ جیڑہ ءِ سر ءَ دوئیں ڈیھاں گپ ءُ تران کرتگ ءُ بازیں گپانی سر ءَ ھم پَتّ بیتگ اَنت۔  دیوان ءَ پد امریکا ءِ دری کارانی وزیر ءَ گْوشتگ کہ جیڑھانی گیش ءِ گیوار کنگ ءِ سر ءَ ھم پَتّ بیتگیں کہ پہ دوئیں ڈیھانی گھتری ءِ سیتاں بندوک اِنت۔بلے اگاں روس ءَ یوکرین ءِ سر ءَ اُرش کُرت گڑا وتی زمہ وار وت اِنت۔ دومی نیمگ ءَ روس ءِ دری کارانی وزیر سرگئی ریابکوپ جتا گوں اھوالکاراں تران کُرتگ ءُ گْوشتگ کہ ما یوکرین ءِ سر ءَ اُرش نہ کنگ ءِ دلجمی داتگ بلے اے گپ ھم گْوشتگ کہ وھد ءُ جاورانی ھساب ءَ ھرچی بوت کنت۔