ریڈیو زْرمبش بلوچی | ریڈیو زْرمبش بلوچی

بلوچ ریپبلکن پارٹی ءِ بنجاھی جارکش شیر مھمد بگٹی ءَ شھید اکبر ھان بگٹی ءَ آئی ءِ شھیدی ءِ درگت ءَ ستک شانی ندر کرتگ ءُ گوشتگ کہ مزنشانیں شھید ءُ آئی ھمبلانی دیمونی پما مادنیں راھے۔ بی آر پی ءَ لندن ءَ یک دیوانے برجم داشتگ دیوان ءَ بی آر پی ءِ کارکن ءُ لندن ءِ جھمنندیں مردمانی ھواری ءَ جنیناں بازیں کچے ءَ بھر زرتگ۔ دیوان ءَ بی آر پی ءِ بنجاھی سروک منسور، نسار، کادربکش بگٹی، شاکر ءُ آدگراں بھر زرتگ۔ آیاں شھید اکبر ھان بگٹی ءِ جھد ءُ دیمونی ستک شانی ندر کرتگ اَنت۔ دیوان ءَ تران کنان ءَ شیر مھمد بگٹی ءَ گوشتگ کہ ریاست ھمے سرپد بیتگ کہ راجی سروک ءِ شھید کنگ ءَ بلوچستان ءَ زرمبشت ھلاس بیت، بلے شھید اکبر ھان بگٹی ءُ آدگہ شھیدانی ھوناں بلوچ زرمبشت گیش توان بکش اِتگ ءُ جھان ءِ دلگوش گوں وت گور کرتگ۔ بی آر پی ءِ جارکش ءَ گوشتگ کہ شھید اکبر ھان بگٹی ءِ شھیدی سالروچ ءِ درگت ءَ ھزدار، شال ءُ آدگہ شھراں راجی سروک ءِ یات ءَ دیوان برجم دارگ بیتگ ءُ آ ستک شانی ندر کنگ بیتگ۔ پاکستان ءِ بنّامیں چیریں ادارہ آئی ایس آئی ءَ دیوان برجم داروک بیھار داتگ اَنت ءُ چہ سوئی ءَ سد ءَ گیش مردم آیانی تہ ءَ گیش ورنا بیتگ اَنت، آئی ایس آئی ءَ زور ھمے ھند ءَ آزارجاھے ءَ برتگ اَنت ءُ آزار داتگ اَنت۔ آیانی میار ھمے بیتگ کہ آیاں شھید ءِ بارو ءَ رسانکدر اکس ءَ شنگ کرتگ۔ آئی ءَ گوشتگ کہ آئی ایس آئی مزنشانیں شھید اکبر ھان بگٹی ءِ مھر ءَ چہ مردمانی دل ءَ ھلاس کرت نہ کنت۔ آئی ءَ دیمتر ءَ گوشتگ کہ چیریں ادارہ گوستگیں ھبدہ ھژدہ سال اِنت کہ لشکرکشی کنگ ءَ اَنت، کشت ءُ کوش، زوریں بیگواھیاں اَبید چہ بلوچ راج ءِ دل ءَ شھید اکبر بگٹی ءَ مھر ھلاس نہ کرت کرتگ ءُ نہ کہ بنّامیں آئی ایس آئی ءَ چہ وتی گوست ءَ چیزے دربرتگ۔ بی آر پی ءِ جارکش ءَ گوشتگ کہ نوں بلوچ راج باسما بیتگ ءُ وتی جھد ءَ یک مھکمیں رنگے ءَ دیم ءَ برگ ءَ اِنت۔ بلوچ ءِ دُژمن پروش وارت۔ بنشون: درشان / اکس: بی آر پی