ریڈیو زْرمبش بلوچی | ریڈیو زْرمبش بلوچی

رپتگیں سر نمیران اَنت نبشتہ کار : شےمزار

رپتگیں سر نمیران اَنت  نبشتہ کار : شےمزار

NOV

22
22 / 11 / 2022 نبشتانک 88

چہ شُما پد مات چُک ءَ دور بہ دنت چُک بے وت بہ بیت ما اَنچش اِت اِیں۔۔ مَرگ ءَ پد زندگ بوگ اے ھمُک مردم ءِ کارے نہ اِنت ھما مردم زندگ بنت کہ وتی زِند ءِ دُراھیں واھِشتانی کُربانی ءَ دے انت، وتی ھیشیں سر ءَ پہ آیوکیں پدریچ ءَ ندر کن اَنت، ھما مرد زندگ بنت ءُ ھمُک دیوان ءُ مجلس ءَ آیانی نام جْوانیں رنگے ءَ گِرگ بیت آیانی کِرد ءِ ھمُک ھند ءُ دمگ ءَ توسیپ بیت۔ شھید شبیر ءُ شھید واجہ میار گُڈسری وھداں سک ھمراہ بنت دانکہ شھید کنگ بنت، بَلے میان ءَ ھر دو بیست ءُ ھشت روچ ءَ یکشلہ اِے دیم ءُ آ دیم (بِزاں کہ سی پیک ءُ نِگور دیم) ءِ دگ بند کن اَنت۔ اے ھمے وھد اِنت ڈاکٹر اللہ نزر ءِ زھگ گِرگ بنت۔ واجہ میار گُڈسری وھد ءَ چَٹ شاٹ بوان اَت اَنچُش کہ وتی جِند ءِ ھم پرواہ ئِے نیست اَت بس اَنچو روا دیگ ءَ اَت۔ شبیر ءُ واجہ میار ءَ بیست ءُ ھشت روچ ءَ نہ وپتگ اِت اَنت ، یک پیم ءَ آگاھی ءُ وتی کارانی پابند اِت اَنت، ھمک روچیگیں سر ءُ پر ءَ لشکر ءَ چم ءِ چیر ءَ کت اَنت ءُ واب جاہ ءُ نندجاہ اِش چار اِت اَنت، داں گڈی ءَ وابجاہ ءَ شپ ءَ گیرہ اِش دات اَنت ءُ سھب ءَ جنگ بندات اَت، لشکریانی جون یک یک ءَ کپان اِت اَنت، داں گڈی تیر ءَ جنگ اِش دات ءُ شھید بوت اَنت۔ مرچی آیانی نام پہ شان گرگ بیت۔ آیاں چہ پد دَشْت ءِ تہ ءَ بازیں کمی اَتک آیاں مُدام وتی دستکِش پہ بَڈ آپ دات اَنت ، آیاں پد آ دْرچک میزان میزان ءَ گیمُران اَنت آیاں اے دْرچک پہ بَڈ آپ داتگ اَنت، ھمے اُمیت ءَ کہ مارا پد کَسے کیت ھمے وڑ اے دْرچکاں پہ بَڈ آپ دنت، اے دْرچکانی بروداں منی آیوکیں پدریچ یک وشھالیں زِندے گوازین ایت۔ مئے ءُ شُمئے اوست ءَ آیاں یل ءَ داتگ ءُ نمیران بوتگ اَنت، بیا مرچی ھما رپتگیں سرانی پدکِشکاں جُنزاں کن اِیں، آیاں وتی بھاریں زند پہ باندات ءَ ندر کُتگ اَنت۔ شھید واجہ میار ءُ شھید شبیر ءِ وڑیں دو تمردیں سنگت ءِ روگ ءَ پد دشت چورو بوت آ روچ ءَ سیرکگیں وڈّ ءِ سر ءَ ناپاکیں ریاست ءَ دُچار کپ اَنت گُڑا ناپاکیں ریاست ءَ زانت کہ دشت ءَ پہ وت بچ رودینتگ آ روچ ءَ لدیگانی لاش پہ رِد ایر بوَان بوت اَنت...! آیاں اِے گرانیں بوج وتی کوپگاں زرتگ اَت ، بلے آ نمیران بوت اَنت، نو مارا اِے گرانیں بوج زورگی اِنت، اگاں اے بوج ما وتی کوپگاں نہ زُرت گُڑا مارا راجدپتر نہ بکش اِیت، گُڑا آیوکیں پدریچ ءَ چے جواب دات کن اِیں، چماں جھل کن اِیں، ایشی ءِ گُلامی ءَ کن اِیں یا چوش ھمے سرانی وڑ ءَ وتی ھیشیں سراں باھین ایں، وت ءَ بلوچ راجدپتر ءَ نمیران کن اِیں۔۔۔۔۔!